မေ ၁၃၊ ၂၀၁၂။
ဦးဝင်းတင်ဖောင်ဒေးရှင်းရဲ့ ဒုတိယအကြိမ်မြောက် အလှူငွေပေးအပ်ပွဲကို ဒီနေ့ နေ့လည် ၂း ၀၀ နာရီက ဗဟန်းမြို့နယ်၊ ရွှေဂုံတိုင်မှာရှိတဲ့ တော်ဝင်နှင်းဆီစားသောက်ဆိုင်မှာကျင်းပခဲ့ပြီး ဖောင်ဒေးရှင်းအဖွဲ့ဝင်များ၊ အလှူငွေပေးအပ်ခြင်းခံရသူများ၊ နိုင်ငံရေးနဲ့စာပေနယ်မှ ပုဂ္ဂိုလ် များ၊ စာနယ်ဇင်းသမားများ စုံစုံညီညီတက်ရောက်ခဲ့ကြပါတယ်။
ဒီအခမ်းအနားမှာ အခမ်းအနားမှူးအဖြစ် ဦးကျော်အောင် (စာရေးဆရာ ကျော်ထက်အောင်) က ဆောင်ရွက်ပါတယ်။ အသင်းနာယကကြီး ဖစ်တဲ့ ဆရာကြီး ဟံသာဝတီဦးဝင်းတင်က အဖွင့်အမှာစကားပြောကြားရာမှာ နိုင်ငံရေးအကျဉ်းသားတွေထောင်တွေထဲမှာ များစွာကျန်ရှိနေ သေးပြီး ၎င်းတို့လွတ်မြောက်ရေးအတွက် ဆက်လက်ကြိုးစားသွားကြရမှာဖြစ်ကြောင်း၊ နိုင်ငံရေးအကျဉ်းသားတွေ၊ နိုင်ငံရေးအကျဉ်းသား ဟောင်းတွေအတွက် ထောက်ပံ့ကူညီမှုကို ဒီ့ထက်မကပိုမိုလုပ်ဆောင်ဖို့လိုအပ်ကြောင်း စသည်ဖြင့် ပြောကြားသွားခဲ့ပါတယ်။
အဖွဲ့ရဲ့ဖွဲ့စည်းမှုနဲ့ အလှူငွေပေးအပ်မှုအခြေအနေများကိုတော့ ရှေ့နေဦးအောင်သိန်းက ရှင်းလင်းတင်ပြသွားခဲ့ပါတယ်။ အလှူငွေပေးအပ် ခံရသူစာရင်းနဲ့ ဘာကြောင့် ပေးအပ်ရတယ်ဆိုတာကို ဦးနေ၀င်း (စာရေးဆရာ နေ၀င်းစံ) က ရှင်းလင်းပြောကြားပါတယ်။ ဒီနောက်မှာတော့ အလှူငွေပေးအပ်ခြင်းခံရသူဆယ်ဦးကို အလှူငွေများ အသီးသီးပေးအပ်ခဲ့ကြပါတယ်။
ဒီနေ့အခမ်းအနားမှာ အလှူငွေပေးအပ်ခံရသူတွေကတော့ ကိုမင်းအောင် (လားရှိုးထောင်)၊ ကိုအေးအောင်(ကလေးထောင်)၊ ဦးကြည်သန်း (နိုင်/ ကျဉ်းဟောင်း)၊ ဒယ်ဒီကြီး (ခ) ဦးမောင်ကြီး (နိုင်/ကျဉ်းဟောင်း)၊ ဦးမဲမောင် (စာရေးဆရာ စောညိုဝေ-ရွှေပြည်သာ) (နိုင်/ကျဉ်း ဟောင်း)၊ ဦးတင်ငွေ (စာရေးဆရာ နီဟိန်း) (နိုင်/ကျဉ်းဟောင်း)၊ ဦးသိန်းထွန်း (စာရေးဆရာ မောင်ရေပြာ) (နိုင်/ကျဉ်းဟောင်း)၊ မပြုံးပြုံးအေး (နိုင်/ကျဉ်း ဟောင်း)၊ ကိုဇာနည်(နိုင်/ကျဉ်းဟောင်း)၊ ဒေါ်ကြည် (နေသူရိန် ရုပ်ရှင်ရုံပိုင်ရှင်၏ဇနီး) တို့ဖြစ်ပြီး ချီးမြှင့်ငွေစုစုပေါင်းကတော့ ၃၄ သိန်းဖြစ်ပါတယ်။
ဆရာဦးဝင်းတင်က နိဂုံးချုပ်အမှာစကားပြောကြားပြီးတဲ့နောက်မှာတော့ အကျွေးအမွေးဖြင့်တည်ခင်းဧည့်ခံကာ ဒီနေ့အခမ်းအနားကို အောင်မြင်စွာရုပ်သိမ်းခဲ့ပါတယ်။
သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ
