>
မောင်သော်က
နိုဝင်ဘာ ၉၊ ၂၀၁၁
ဆိုဗီယက်ခေါင်းဆောင်ကြီး ဂေါ်ဘာချော့ဗ်က ဂလက်စ်နော့ လုပ်ကောင်းလုပ်မည်။ ဟုတ်ကောင်း ဟုတ်မည်။ သူ့ဂလက်စ်နော့မှာ ပွင့်ပွင့်လင်းလင်း ပြောစေလိုခြင်း အရင်းခံသည်။
မြန်မာပြည်တွင်မူ မောင်သော်ကတို့ လူတစ်စုဟာ ဂလက်စ်စမော့လုပ်နေသည်မှာ ကြာပြီဖြစ်သည်။ ဂလက်စ်မော့ဟူသည်မှာ အလျဉ်း သင့်ရာ ဖန်ခွက်တွင် မော့ဝီစကီ၊ သို့မဟုတ် အလျဉ်းသင့်ရာ ယမကာကို ဆိုဒါ၊ သို့မဟုတ် သဘာဝရေနှင့်ရောစပ်ကာ ညနေခင်း မော့ကြ သည်ဖြစ်ခြင်းကြောင့် ဂလက်စ်မော့ (ဝါ) ဖန်ခွက်မော့ညနေခင်းဟု ခေါ်ခမှတ်ပြုသည်။ ပွင့်ပွင့်လင်းလင်း ပြောကြားကြရန်ကိုမူ တိုက်တွန်း လှုံ့ဆော် ရန်ပင် မလို၊ သူ့အလိုလို ပွင့်ထွက်လာမည်မှာ စိတ်ချယုံကြည်ရသည်။
မောင်သော်က၏ ဂလက်စ်မော့ညနေခင်းမှာ လူစုံသည်။ လူစုံသည်ဆိုသော်လည်း သုံးယောက်ထက် မည်သည့် အခါမျှမပို။ မောင်သော်က သည် တစ်ယောက်တည်းမူငြီးငွေ့၏။ နှစ်ယောက်ဆိုသော် ပျော်မွေ့၏။ သုံးယောက်ဆိုလျှင် လူစုလူဝေးပင်ဟု သတ်မှတ်ထားသည့်အတိုင်း သုံးယောက်ထက်ပိုသော် ရှောင်ကြဉ်၏။
သို့သော် လူစုလူဝေးသည်ပင် အလှည့်ကျစုဝေး၍ရှိသည်။ ပင်တိုင်အားဖြင့်လျှင် တပ်မတော်မှ အငြိမ်းစားအရာရှိတစ်ဦးနှင့် စာရေးစရာ အယ်ဒီတာတစ်ဦးတို့ဖြစ်သည်။ ရံဖန်ရံခါမူ ရုပ်ရှင်သရုပ်ဆောင် ဒါရိုက်တာတစ်ဦး၊ တေးသံသွင်းပိုင်ရှင်တစ်ဦး၊ မှောင်ခိုလုပ်ငန်းနှင့် ကြီးပွား နေသူတစ်ဦး၊ ကျူရှင်ဆရာတစ်ဦးတို့ ရောက်လာဝိုင်းဖွဲ့တတ်ကြသည်။
ယနေ့ညနေတွင် တပ်မတော် ပင်စင်နာနှင့် အယ်ဒီတာတို့ရောက်လာကြသည်။ အယ်ဒီတာ၏လက်တွင် အထုပ်တစ်ထုပ်၊ ပင်စင်နာကြီး လက်တွင် မန္တလေးရမ်တစ်ပုလင်းကိုင်ဆောင်လာကြသည်ကြောင့် ဝမ်းသာလှိုက်လှဲစွာ ဆီးကြိုရသည်။ သည်နေ့အချိန်တွင် သည်လိုသိ တတ်သူများ အလွန်ရှားပါးသည်။ မောင်သော်က အိမ်မှာ ဖန်ခွက်နှင့်သဘာဝရေမတတ်နိုင်ခြင်းကြောင့် ချိုးဖြူရေကို စိုက်ထုတ်ကုန်ကျခဲ့ ရသည်။ ဖန်ခွက်မှာမူ အစုံများပဲ့ကုန်ပြီဖြစ်သည့်အတွက် ဖန်ခွက်သုံးလုံး ပုံစံသုံးမျိုးပင် မြိုင်မြိုင်ဆိုင်ဆိုင်ရှိလှသည်။
ကဲ လာကြဗျာ၊ လာကြ၊ အယ်ဒီတာကြီးလည်း မတွေ့ရတာကြာပြီဗျာ …
ကျွန်တော်က ဆီးကြိုပြောရသည်။
မတွေ့တာကြာဆို သင်တန်းတက်နေရသကိုးဗျ။ စနေ၊ တနင်္ဂနွေနေ့မှာပဲ အားတယ်ဟု ရှုံ့တွတွ ပြောသည်။ ကုန်းချိချိလည်း ဖြစ်နေပေသည်။
ပင်စင်နာကြီးက အေးဗျာကျုပ်လည်း အခုမှ သူ့ကိုကြည့်ပြီး စောစောစီးစီး ပင်စင်သွားရခြင်းရဲ့ ကောင်းကျိုးချမ်းသာမင်္ဂလာကို သိရတော့ တယ်ဟု ပြော၏။
အားလုံးထ်ိုင်မိကြသည်တွင် ကိုယ်ဖန်ခွက်တွင် ကိုယ်လိုသလောက်ဖြည့်ကာ ဂလက်စ်မော့ခြင်းကို တစ်တောင်ဆစ်ကွေးယဉ်ကျေးမှုနယ် ပယ်၏ ထုံးစံအရ ချီးယားစ်ပြုပြီး တစ်ငုံစီလီ၍ မြုံကြသည်။
ကဲ ခင်ဗျားလည်း အခု ဘာတွေရေးနေသလဲ ဟု အယ်ဒီတာကြီးကမေးသည်။ ဤသည်မှစကာ ဂလက် စမော့ ဆွေးနွေးပွဲဖြစ်သွားတော့သည်။
သော် ။ ။ မရေးအားဘူးဗျ။ စာအုပ်တစ်အုပ်ရလို့ ဖတ်ကြည့်နေတယ်။
ပင် ။ ။ ဘာစာအုပ်များလဲဗျ။
သော် ။ ။ သချိန်းဂျင်းအော့ဖ်ကင်းစ်တဲ့ဗျ၊ မြန်မာလိုတော့ မင်းပြောင်းမင်းလဲကာလကျပ်ကြီးလို့ စာရေးသူက သူ့စာအုပ်ကို အမည်ပေးထား ထယ်။
အယ်။ ။ ဘယ်သူရေးတာလဲဗျ။
သော်။ ။ စစ်မဖြစ်ခင်က မြန်မာပြည်မှာလာပြီး အိုင်ဒီအက်စ်အရာရှိလုပ်သွားတဲ့ လက်စလီဂလက်စ် ဆိုတဲ့ပုဂ္ဂိုလ်ပဲ။ ၁၉၃၉-၁၉၄၉ အမှတ် တရ မှတ်တမ်းလို့ဆိုထားတယ်။
ပင် ။ ။ဟင်း ခင်ဗျားကလည်း အိုင်စီအက်စ်ကို အခုထက်ထိ အထင်ကြီးတုန်းပါလားဗျ။
သော် ။ ။ကြီးစရာရှိလည်း ကြီးရပေမှာပဲ ကိုယ့်လူ။ ဒီပုဂ္ဂိုလ်ဟာ အသက်ငယ်ငယ်ရွယ်ရွယ်မှာ မြန်မာပြည်ကိုရောက်လာတဲ့ အိုင်စီအက်စ် မိုးကျရွှေကိုယ်ပေမဲ့ မြန်မာပြည်၊ မြန်မာ့စရိုက်တွေကို ခရေစေ့တွင်းကျ လေ့လာပြီး ရေးသားထားတာပါ၊ မောရစ်ကောလစ်လို ပုဂ္ဂိုလ်ပါ၊ အဲရစ်ဘလဲယားခေါ်တဲ့ ဂျော့အော်ဝဲလို အမြင်မျိုးနဲ့ရေးတာ မဟုတ်ဘူး။
အယ်။ ။ ခင်ဗျားသဘောကျတဲ့အချက်ကို ပြောစမ်းပါဦး။
သော်။ ။ ဒီလူက ပထမဆုံး မုံရွာကို အလုပ်သင်အဖြစ် အပို့ခံရတယ်။ အဲဒီကနေ ဟိုနယ်စွန်နယ်ဖျား ကချင်ပြည်နယ် ဆင်လုံကမ္ဘာကို အပို့ခံရတယ်။ နောက် မန္တလေး၊ သာယာဝတီ စသည်ဖြင့်ပေါ့ဗျာ နေရာအနှံ့ပဲ။
အယ်။ ။ ဒါတော့ဗျာ သူတို့ခေတ်က မျက်နှာဖြူ အိုင်စီအက်စ်တွေ ဘယ်လောက်များများရတယ်ဆိုတာ သိတယ်မဟုတ်လား။ ရှားရှားပါးပါး မြန်မာအိုက်စီအက်စ်တောင် သမက်ဖမ်းချင်သူအပေါသား။
သော် ။ ။ လခကြီးရတာကတစ်ပိုင်း သူတို့ ခက်ခဲပင်ပန်းကြီးစွာ အလုပ်တာဝန်ကိုဆောင်ရွက်မှုကတစ်ပိုင်းစီထား ပြောရလိမ့်မယ်။ သူဟာ မြန်မာအရာရှိတွေလက်အောက်မှာ လုပ်ရလုပ်ရ ဘယ်လိုမှသဘောမထားဘူး။ သူ့အလုပ်ကို သူလုပ်၊ သူ့ထက်အရာရှိကို အထက်အရာ အနေနဲ့ လေးစားတတ်တယ်။ ကျွန်တော်အံ့သြတာက ဟိုတုန်းက ကျွန်တော် ဘယ်လိုမှ အထင်မကြီးခဲ့တဲ့ ကြေးတိုင်နှင့် မြေစာရင်း မင်းကြီး ဌာနမှာ သူဆောင်ရွက်ခဲ့ပုံတွေကို ရေးသားထားတာပဲ။
ပင်။ ။ ဘယ်လိုများလဲ၊ သဘောလောက်ပြောပြစမ်းပါဦး။
သော် ။ ။ အပင်ပန်းခံတာတော့ ပြောမနေနဲ့ဗျာ။ နေလောင်မခံနိုင်တဲ့ ဥရောပတိုက်သားအသားအရေကြောင့် နံနက်အစောကြီးထပြီး ကွင်း ဆင်းရတယ်၊ လယ်မြေတွေကိုသံကြိုးတိုင်းရတယ်၊ မြေအမျိုးအစား သတ်မှတ်ရတယ်၊ စိုက်ပျိုးလို့သင့်တဲ့သီးနှံကို လေ့လာရတယ်၊ ဒီမြေ ယာမှာ ဒီသီးနှံ စိုက်ပျိုးလို့ဖြစ်ထွန်းမယ်ဆိုတာကို အကြံပြုရတယ်။
အယ်။ ။ နောက်ပြီးတော့ကော။
သော်။ ။ နောက်ပြီးတော့ စပါးဈေးသတ်မှတ်တာ သူတို့ကအဓိကဗျ။ ဒီမြေကွက်မှာ ထွန်ဘယ်နှစ်ရှဉ်းဝင်ရမယ် ကောက်စိုက်ခ၊ ပျိုးနုတ်ခ၊ ရိတ်သိမ်းခ၊ စပါးလှေ့စပါး နယ်မယ့်လုပ်အားခနဲ့ အချိန်ကစပြီး လယ်သမားတစ်ယောက်ရဲ့လုပ်အား၊ အချိန်ကုန်ကျစရိတ်ပေါ်မူတည်ပြီးမှ စပါးဈေးနှုန်း သတ်မှတ်တာဗျ။အရမ်းကာရော သတ်မှတ်တာ မဟုတ်ဘူး။ ဒီအင်္ဂလိပ်တွေဟာ ဘာမဆိုလုပ်ရင် သိပ်သေချာတယ်။ ကန် သင်းရိုးပေါ်မှာ မိုးကျရွှေကိုယ် လာလုပ်ပြီး လက်ညှိုးထိုးတာ မဟုတ်ဘူး။
ပင် ။ ။ အင်း စိတ်ဝင်စားစရာတော့ အကောင်းသား။ အဲဒီအချိန်မှာ မြန်မာပြည်ဟာ သူတို့ရဲ့ကိုလိုနီအဖြစ်ပဲ ရှိသေးပေမဲ့ အခြားနယ်ချဲ့တွေရဲ့ ကိုလိုနီဘဝနဲ့စာရင် အင်္ဂလိပ်ကိုလိုနီတွေဟာ အများကြီးသာတယ်ဆိုတာကိုတော့ ဝန်ခံရမှာပဲ။
သော် ။ ။ နေရူးလို ပုဂ္ဂိုလ်မျိုးကတောင် ကိုလိုနီနယ်ချဲ့ဝါဒကိုတိုက်ပြီး သူ့တိုင်းပြည်လွတ်လပ်အောင်ဆောင်ရွက်ရပေမဲ့ အင်္ဂလိပ်ကို အထူး ကျေးဇူးတင်တယ်လို့ ဝန်ခံခဲ့သေးတာပဲ။ အဲဒီပုဂ္ဂိုလ်က တွဲရေးခွဲရေးကာလာအပြီးမှာ မြန်မာပြည်ပြန်ရောက်လာကတည်းက သူ့ကိုယ် သူ မြန်မာလို့သတ်မှတ်တယ် သူ့နာမည်ကိုတောင် ဦးမှန်လို့ ခေါ်မှကြိုက်တယ်။ မြန်မာဆေးပေါ့လိပ်ကို စီးကရက်ထက် ပိုကြိုက်တယ်။
ပင် ။ ။ မြန်မာတွေကော မကြိုက်ဘူးတဲ့လား၊ ဟဲ…ဟဲ။
သော်။ ။ မြန်မာမတွေက ချစ်စရာကောင်းတယ်၊ သန့်ရှင်းတယ်၊ ဖော်ရွှေတယ်လို့တော့ပြောတယ်။ မြန်မာ အငြိမ့်ပွဲကြိုက်တယ်၊ ဒါပေမဲ့ က နေစဉ်မှာ လိပ်ပြာလေးပျံနေသလိုလှတဲ့မင်းသမီးက နားနေတဲ့အခိုက်မှာ ချွဲဟပ်ပြီး ဇာတ်စင်အောက်ကြမ်းပေါက်ကြားက ထွေးချတာကိုတော့ လက်မခံနိုင်ဘူး။ နောက်ပြီး မြန်မာဆ်ိုင်းဝိုင်းမှာ ဘာကြောင့် ဘောလုံးပွဲမှာမှုတ်တဲ့ ဝီစီမှုတ်သလဲမသိဘူးတဲ့၊ ဒီလိုမြင်တယ်။
အယ်။ ။ သူက မြန်မာပြည်မှာ ဘယ်လောက်ကြာကြာ နေသွားသလဲ။
သော်။ ။ ၁၉၃၄ ခုနှစ်ကစပြီးတော့ပဲ။ စစ်ဖြစ်တော့ မုံရွာ၊ ကလေးဝ မောင်သော်က၏ ညနေခင်းများ တမူးကနေ အိန္ဒိယဆုတ်တဲ့အထဲ ပါသွားတယ်၊ စစ်ပြီးတော့ မြန်မာပြည် ပြန်လာတယ်။ မြန်မာပြည်မှာဖွဲ့တဲ့ ဗြိတိသျှသံရုံးမှာ အတွင်းဝန်လုပ်သေးတယ်။
ပင်။ ။ ဒါကြောင့် သူ့စာအုပ်ကို မင်းပြောင်းမင်းလွဲ ကာလကျပ်ကြီးလို့ အမည်ပေးခဲ့တာကိုးဗျ။ တကယ့် သမိုင်းအလှည့်အပြောင်းကာလမှ မြန်မာပြည်ရောက်တာပဲ။
သော်။ ။ ဒေါက်တာဘမော်ကိုလည်း ကိုယ်တိုင်တွေ့ခဲ့ဖူးတယ်၊ ဂဠုန်ဦးစောကိုလည်း လူချင်းတွေ့ စကားပြောဖူးတယ်။ ဒေါက်တာဘမော်ဟာ မြန်မာအစစ် မဟုတ်ဘူး။ အာမေးနီးယန်းကပြားလို့ ဆိုတယ်။
အယ်။ ။ သူ့အမြင်က ဘယ်လိုရှိသလဲ။
သော်။ ။ ဒေါက်တာဘမော်နဲ့ သူနဲ့တွေ့တဲ့အချိန်မှာ သူဟာရေနံချောင်းမှာရှိတယ်။ ရေနံမြေ သပိတ်တိုက်ပွဲမှာ သူကလက်ထောက်ရေနံမြေ အရာရှိ၊ သပိတ်ကိစ္စကို သူက အလုပ်ရှင် အလုပ်သမားအမြင်နဲ့ပဲ ဖြေရှင်းဖို့ကြိုးစားနေတယ်၊ ဒေါက်တာက သူ့ကို ဟေ့ ဂလပ်စ် ဒါဟာ အလုပ်သမား ပြဿနာမဟုတ်ဘူးကွ။ နိုင်ငံရေးပြဿနာ။ ရန်ကုန်က တက္ကသိုလ်ပညာတတ် သခင်ပေါက်စတွေလာပြီး မြှောက်ပေးနေတာ။ နောက်ကွယ်က နိုင်ငံရေးသွေးထိုးမှုကို မင်းမြင်တတ်ရမယ်လို့ ပြောသွားတယ်ဆိုပဲ။
အယ်။ ။ ဂဌုန်ဦးစောကိုကော။
သော်။ ။ ဦးစောကို နန်းရင်းဝန်ဖြစ်စဉ်က သာယာဝတီလာတော့ သူမီးရထားပေါ်မှာ သွားတွေ့တယ်။ အမယ် ဆာလို့ ရိုရိုသေသေထားပြီး စကားပြောသားပဲ။ သူကမီးရထားပေါ်ရောက်တော့ ဟေ့ ဂလပ်စ် အရက်သောက်ကွာလို့ ဖိတ်မန္တကပြုတယ်။ အဲဒီတော့ ဂလပ်စ်က ဟုတ်ကဲ့ ဝန်ကြီးချုပ်၊ ဘာသောက်နေပါသလဲလို့မေးတော့ ဦးစောက မျောက်သွေးနဲ့ရမ် ရောသောက်နေတယ်။ ကောင်းတယ် သောက်ကြည့်ပါလား ၊ သိပ်အားရှိတယ်လို့ပြောတယ်။ ဂလပ်စ်က တော်ပါပြီ ဝန်ကြီးချုပ်၊ ကျွန်တော် ဝီစကီပဲသောက်ပါရစေလို့ တောင်းပန်ယူရတယ်ဆိုပဲ။
ပင်။ ။ ဂျပန်ခေတ်အတွင်းက သူအိန္ဒိယရောက်နေခဲ့မှာပေါ့။
သော်။ ။ ဟုတ်တယ်၊ ဂျပန်ခေတ်က အိန္ဒိယပြည်မှာ မြန်မာအစိုးရရုံးစိုက်တဲ့ ဆင်းမလားမှာရှိတယ်။ နောက် မောင့်ဘက်တန်ရဲ့ဌာနချုပ် ကန္ဒီမှာ၊ နောက်မြန်မာလိုထုတ်ဝေရိုက်နှိပ်ပြီး လေယာဉ်ပျံပေါ်ကနေကြဲတဲ့ လေနတ်သားစာစောင်မှာ ဦးသိန်းဖေမြင့်တို့နဲ့တွဲပြီး သတင်း နဲ့ဝါဒ ဖြန့်ချိရေးအရာရှိအဖြစ်လုပ်ကိုင်ခဲ့တယ်။ အိန္ဒိယပြည်ရောက် မြန်မာအစိုးရအရာရှိအဖြစ် လုပ်ကိုင်ခဲ့တယ်။ အိန္ဒိယပြည်ရောက် မြန်မာ အစိုးရ အရာရှိကြီးများနဲ့လည်း ရင်းနှီးတယ်။ သူတို့ဟာ အိန္ဒိယပြည်မှာ နွေလယ်အိမ်မက်တွေ မက်နေခဲ့တယ်။ သူတို့မြန်မာပြည်ရောက်ရင် ဘယ်လိုစနစ်များနဲ့ အုပ်ချုပ်မယ်ဆိုတာပေါ့လေ။
ဒါပေမဲ့ သူတို့ရည်ရွယ်ချက်ကတော့ ကောင်းကြပါတယ်။ တိုင်းပြည်ကို ပိုမိုတိုးတက်အောင်ပေါ့လေ။ စစ်ဘေး စစ်ဒဏ်ကပြန်ပြီး နလန်ထူ အောင်ပေါ့လေ။ သို့သော် ပြန်ရောက်တဲ့အချိန်မှာ ပကတိအချိန်တွေဟာ ပြောင်းလဲသွားပြီဖြစ်တယ်။ စစ်ပြီးစ မြန်မာပြည်သူလူထုဟာ သူတို့စွန့်ခွာခဲ့တဲ့ စစ်မဖြစ်ခင်က မြန်မာပြည်သူလူထု မဟုတ်တော့ဘူးဆိုတာ တွေ့ရတော့တယ်။ အဲဒီမှာထူးခြားတဲ့ ပုဂ္ဂိုလ်နှစ်ဦးကတော့ အရှေ့တောင်အာရှ စစ်သေနာပတိချုပ် လော့ဒ်လူဝီမောင့်ဘက်တန်နဲ့ ဗိုလ်ချုပ်အောင်ဆန်းပဲတဲ့။
အယ်။ ။ သူရဲ့ထင်မြင်ယူဆချက်က ဘယ်လိုတဲ့လဲ။
သော်။ ။ တစ်စုံတစ်ရာပြောင်းလဲဖို့ဆိုရင် အကြောင်းအရာတွေဟာ တိုက်ဆိုင်လာတယ်။ စစ်ပြီး အင်္ဂလန်မှာ လေဘာအစိုးရတက်လာတယ်။ နောက်ပြီး မောင့်ဘက်တန်ကိုယ်တိုင်က မြန်မာပြည်နဲ့ အိန္ဒိယပြည်ကို လုံးဝလွတ်လပ်ရေးမပေးရင် မဖြစ်တော့ဘူး။ ကိုလိုနီနယ်ချဲ့စနစ်ဟာ ခေတ်မမီတော့ဘူး။ လုံးဝလွတ်လပ်တဲ့နိုင်ငံအနေနဲ့ ဗြိတိသျှဓနသဟာယနိုင်ငံထဲမှာ ဝင်စေချင်တယ်။ ဗိုလ်ချုပ်အောင်ဆန်းတို့အုပ်စုက တော့ ဓနသဟာယနိုင်ငံထဲမှာတောင် မပါဝင်နိုင်ပဲ ဗြိတိသျှနဲ့အပြတ်ခွဲခဲ့ကြတယ်။ ဗိုလ်ချုပ်အောင်ဆန်းကို စစ်အတွင်းက လူသတ်မှုနဲ့ အရေးယူဖို့ပြင်ဆင်ပြီးကာမှ မောင့်ဘက်တန်ကိုယ်တိုင် ဝင်ရောက်စွက်ဖက်တားဆီးခဲ့ရတယ်။
ပင်။ ။ ဗိုလ်ချုပ်အောင်ဆန်းနဲ့ပတ်သက်လို့ကောဗျာ။
သော်။ ။ အဲ စိတ်ဝင်စားစရာ တချက်ပါတယ်။ စစ်ပြီးနောက်သူဟာ ကမ္ဘာအနှံ့ ရာထူးတာဝန်အမျိုးမျိုးနဲ့ သွားရောက်ခဲ့ရတယ်။ ကုလသမဂ္ဂ ကိုယ်စားလှယ်အဖြစ်နဲ့လည်း လုပ်ခဲ့တယ်။ တစ်နေ့တော့ အင်္ဂလန်မှာ ဗိ်ုလ်ချုပ်အောင်ဆန်းရဲ့သမီး မစုနဲ့တွေ့တယ်။ မစုဟာ လက်ထပ်ပြီး စဖြစ်တယ်တဲ့။ မစုက သူ့ကို ကျွန်မအဖေကို ရှင်တွေ့ဖူးသလားလို့ မေးတယ်။ သူက တွေဖူးပါတယ်လို့ပြောတဲ့အခါ ကျွန်မအဖေဟာ ဘယ် သူနဲ့တူသလဲလို့မေးတယ်။ သူလည်း အတော်အဖြေရကျပ်နေပြီးမှ မင်းရုပ်ရှင်ကြည့်တယ်မဟုတ်လား။ အေး ရုပ်ရှင်မင်းသား ယူလ်ဘရိုင် နာနဲ့တူတယ်လို့ပြောလိုက်တော့ မစုက ဟုတ်တယ်၊ ကျွန်မအမေကလည်း အဲဒီလိုပဲပြောတယ်လို့ ပြောရှာသတဲ့။
ပင်။ ။ အေးဗျာ စစ်ပြီးစ မြန်မာပြည်ရဲ့အခြေအနေကို ကျုပ်တို့တွေမီလိုက်ပေမဲ့ အမှတ်တမဲ့မို့ သိပ်တိတိကျကျ ဘာမှမသိရဘူး။ မောင့် ဘက်တန် အစီရင်ခံစာတစ်အုပ်ပဲ အားကိုးစရာရှိတယ်။ သမိုင်းကိုဖြစ်စဉ်အတိုင်း မော်ကွန်းတင်တဲ့ ခိုင်လုံတိကျတဲ့ စာအုပ်တစ်အုပ်လောက် တော့ လက်ကိုင်ပြုစရာရှိဖို့ကောင်းတယ်။
သော်။ ။ လက်စလီဂလပ်စ်က ပုဂ္ဂိုလ်အရမှတ်မိသမျှ မီမွိုင်အနေနဲ့ရေးတာပါ။ သိပ်အလေးအနက်ထားယူလို့ မရပါဘူး။ ဒါပေမဲ့ အင်္ဂလိပ်တွေ ဟာ အလုပ်လုပ်တဲ့နေရာမှာ သိပ်စေ့စပ်သေချာတယ်။ မှတ်တမ်းပြုစုတဲ့နေရာမှာ ဟာကွက်မရှိစေရဘူး။ သမိုင်းကို ဖြစ်စဉ်အတိုင်း စာပေအ ထောက်အထားများနဲ့ ရေးသားထားတဲ့စာအုပ်ရှိပါသဗျာ။ လျှို့ဝှက်စာတမ်းများဥပဒေအရ နှစ်ပေါင်းသုံးဆယ်ကာလတာ စောင့်ပြီး ထုတ်ဝေ လိုတဲ့စာအုပ်ကတော့ ဘုရင်ပုံနှိပ်တိုက်က ရိုက်နှိပ်လိုက်ပြီး ဟယူတင်ကာဆိုသူတည်းဖြတ်တဲ့ မြန်မာ့လွတ်လပ်ရေး ကြိုးပမ်းမှုသမိုင်း၊ ၁၉၄၄-၁၉၄၈ ဆိုတဲ့ စာအုပ်ပါပဲ။ ပေးစာ၊ ပြန်စာ၊ အကြောင်း ကြားစာ၊ အစီရင်ခံစာတွေအတိအကျနဲ့ မှတ်တမ်းတင်ထားပါတယ်။ အုပ်တွဲ နှစ်တွဲရှိတယ်။
လုပ်စမ်းပါဦး။ ဒီစာအုပ် ခင်ဗျားဆီမှာရှိသလား။ ဖတ်ကြည့်စမ်းပါရစေ။
ကြံကြံဖန်ဖန် ဘယ်ကလာရှိရမှာလဲ။ ကျွန်တော်ထင်ပါတယ်။ ဒီစာအုပ်တွဲ နှစ်တွဲစလုံးဟာ မြန်မာပြည်မှာရှိလှရင် ပုဂ္ဂိုလ်သုံးလေးဦးစီမှာသာ ရှိပါတယ်။ ကျွန်တော်တို့က မ၀ယ်နိုင်ခဲ့ပါဘူး။ စာအုပ်က တစ်အုပ်ကို စတာလင်ပေါင်တစ်ရာနီးပါး ကျပါတယ်။ ခု မြန်မာပြည်မှာရှိတယ်ဆိုတဲ့ စာအုပ်ကလည်း အယ်ဒီတာလုပ်သူ ဟယူးတင်ကာက ပုဂ္ဂိုလ်အရ လက်ဆောင်ပေးပို့တဲ့စာအုပ်သာ ဖြစ်ပါတယ်။
ခင်ဗျားက ဘယ်လိုလုပ်သိသလဲ။ ဘယ်သူတွေဆီမှာရှိသလဲ။
အဲဒီ လက်စလီဂလစ်ရဲ့ မီမွိုင်မှာဖော်ပြထားတယ်လေ။ နောက်ပြီး အယ်ဒီတာ ဟယူးတင်ကာကိုယ်တိုင် တစ်လောဆီက မြန်မာပြည်လာ သွားပါတယ်။ ဘယ်သူတွေဆီမှာရှိသလဲဆိုတာကိုတော့ ကျွန်တော် အတိအကျမသိသေးပေမဲ့ ခေတ္တငှားရမ်းဖတ်ရှုနိုင်ဖို့တော့ ကြိုးစားနေပါ တယ်။
ဘာလဲ ခင်ဗျားက လက်သိပ်ထိုးဘာသာပြန်ဦးမလို့လား။
ထပ်သရီး၊ ကျွန်တော်က ဒါမျိုးဘာသာပြန်နိုင်တဲ့ အရည်အချင်းမရှိပါဘူး။ နောက်ပြီး ကျွန်တော်တို့ စာဖတ်ပရိသတ်ကလည်း ဒီလိုစာအုပ် ဘာသာပြန်ကို ဖတ်ချင်လောက်အောင် မရင့်ကျက်ကြသေးပါဘူး။ နောက်ပြီးတော့ ဘာသာပြန်ရင်ကော ဘယ်မှာလဲ၊ စက္ကူဆိုသာရုံ တစ်ပတ်ကျော် စက္ကူပွနဲ့တောင် ဈေးကြီးလွန်းလို့ တတ်နိုင်မှာမဟုတ်ပါဘူး။ စာပေငတ်မွတ်ခေါင်းပါးခြင်းတမျိုးလို့ ဆိုရမှာပါပဲဗျာ။
ခင်းဗျားအတွက် အယ်လ်ကိုဟောချို့တဲ့ခြင်းထက် ပိုလို့များဆိုနိုင်မလား။ ပင်စင်နာ အရက်လျှောက်လွှာတင် ၀ယ်ယူနိုင်ဖို့ပဲ ပထမကြိုးစား ကြည့်စမ်းပါဦးလေ။ ကဲ ကဲ ဒီညနေ ဂလက်စမော့မှာတော့ လက်စလီဂလစ်စ်ရဲ့ မင်းပြောင်းမင်းလွဲ ကာလကျပ်ကြီးနဲ့ပဲ စခန်းသိမ်းကြဦးစို့ရဲ့။
www.shwezinu.com မှ ကူးယူဖော်ပြပါသည်။
ဆက်လက်ဖော်ပြပါမည်။
သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ
