>
ငှက်ပျောတောတန်းလှည်းလမ်းကြောင်း နှင့် ရိုးပေါ်က လေညှင်း
ငြိမ်းဝေ၊အောက်တိုဘာ ၂၆၊ ၂၀၁၁
(က)
ရိုးထဲတွင်ရေမရှိတော့သည့်တိုင်ကိုင်းပင်၊ ခြုံပင်များမှာ ထူထပ်လျက်ရှိနေသေး၏။ ရိုးအလယ်သို့ ရောက်သည်အထိဝါးတံတားထိုးဆက်သွယ်ထားသည့် “ရေသိမ်” ကလေးမှာ အကာအရံမရှိ။ ၀ါးတံတားလေးပေါ်မှကြည့်လျင် လေးဖက်လေးတန်ဝန်းကျင်ကို ကောင်းကောင်း မြင်ရ၏။ အထူးသဖြင့် “ချောင်းကျိုး”’ ရွာကလေးဆီမှကွေ့ဝိုက်ပြီး လာနေသည့် ကုက္ကိုပင်တန်းနှင့် ငှက်ပျောပင်တန်းကိုအစအဆုံးလှမ်းမြင်နေရ၏။ ၀ါးတံတားထိပ်သည် လှည်းလမ်းဘေးတွင်မေးတင်လျက်ရှိ၏။ လှည်းလမ်းနှင့်မလှမ်းမကမ်းတွင် “ဘုန်းတော်ကြီးကျောင်း” ရှိနေလေသည်။
“ရေသိမ်”လေးနှင့်ဆက်သွယ်ထားရာ၊၀ါးတံတားပေါ်တွင် တဦးတည်းထိုင်နေစဉ် ကုက္ကိုပင်တန်း၊ ငှက်ပျောတောတန်းကလေးဆီ လှမ်းမျှော်ကြည့်မိသည်။နောက်ထပ် နာရီဝက် (သို့ မ ဟုတ်) တနာရီခန့်ရှိလျှင် ထိုကုက္ကိုပင်တန်းနှင့်ငှက်ပျောတောတန်းကလေးအတိုင်းလမ်းလျှောက်လာနေသည့် “မဒေ၀ီ” ကိုကျနော်တွေ့ရမည်။ ထိုအခါ ကျနော့်နှလုံးသားများရုတ်တရက် စိမ်းစိုလန်းဆန်း လာကာ လှည်းလမ်းကလေးဆီကြိုိပြီးကြည့်နေမိမည်။
ငှက်ပျောတောတန်းအလွန်တောအုပ် ကလေးထိပ်၊ ခေါင်းပြူပြီးထွက်လာသည့် လှည်းလမ်းကလေးပေါ်တွင် ဈေးတောင်းခေါင်းရွက်ပြီးလျှောက်လာနေသည့် ‘မဒေ၀ီ’ ကိုကျနော်တွေ့ရမည်။ ခြေထောက်တွဲလောင်းချပြီး ထိုင်နေသည့်ကျနော့်ဆီသို့ ၀ါးတံတားလေးအတိုင်း သူလျှောက်လာလိမ့်မည်။ ပြီးတော့သူသည်လည်းကျနော့်ဘေးတွင် ခြေထောက်တွဲလောင်းချထိုင်ကာ သူ့ဘ၀ တနေ့တာ အတွေ့အကြုံတချို့ကိုပြောပြနေဦးမည်။
ဝါးတံတားလေးပေါ်တွင်တဦးတည်းထိုင်နေရင်းမနေ့တနေ့က ‘မဒေ၀ီ’ နှင့်စကားလက်ဆုံ ကျခဲ့သည့် အကြောင်းကိုဖြတ်ကနဲတွေးမိတော့ကျနော့်မှာ အလိုလိုပြုံးမိလျက်သားဖြစ်သွားရ၏။
ဒီတခါ ‘အုတ်တွင်း’ပြန်တက်ပြီး မြို့နယ်ရုံးတွင် ‘ဒေါ်အောင်ဆန်းစုကြည်’ နှင့်တွေ့ခွင့်ရသည့်အခါ ‘မဒေ၀ီ’သိချင်သည့်မေးခွန်းတချို့ကိုမေးဖြစ်အောင် မေးကြည့်ဖို့ ကျနော်ပိုင်းဖြတ်ထားပြီးဖြစ်သည်။ ဒါမှမဟုတ် ‘မဒေ၀ီ’ကိုယ်တိုင်က ‘ဒေါ်အောင် ဆန်းစုကြည်’နှင့်တွေ့ဆုံပြီးသူသိချင်သည့်၊ သူမေးချင်သည့်မေးခွန်းကိုကိုယ်တိုင်ကိုယ်ကျ မေးခွင့်ရအောင် ကြိုိးစားပြီး ဖန်တီးပေးရန် ကျနော်စဉ်းစားထားခဲ့၏။
ကုက္ကိုပင်တန်းအောက်တွင်လူတယောက်လမ်းလျှောက်လာနေသည်ကို သစ်ပင်များကြားမှ ပျောက်လိုက် ပေါ်လိုက်တွေ့နေရ၏။၊ငှက်ပျောတောတန်းကလေးနှင့် ကုက္ကိုပင်တန်းအကူးတွင်မူ ဈေးတောင်းခေါင်းရွက်ကာ လှည်းလမ်းအတိုင်းလမ်းလျှောက်လာနေသည့်‘မဒေ၀ီ’ကို ကျနော်တွေ့ရလေတော့သည်။
(ခ)
“ဘယ်လိုလဲဈေးသည်ကြီးဆန်နီရဲ့၊ နေပူတော့မယ်လေကွာ အခုထက်ထိမသွားနိုင်သေးဘူးလား”
“ရွာထဲခဏသွားလိုက်တာပါမောင်ရယ် ကိစ္စရှိလို့ … ဟဲ …ဟဲ…”
ကျနော်ကပြုံးပြုံးရွှင်ရွှင်ဖြစ်နေသည့် ‘မဒေ၀ီ’ ၏ မျက်နှာကိုကြည့်ကာ စိတ်ဝင်စားမိသည်။
“ဘာကိစ္စလဲချဲဂဏန်းသွားတောင်းတာလား”
“အိုးမဟုတ်တာမောင်ရယ်၊ ရွာထဲမှာအသုဘကူငွေလိုက်ကောက်တာပါ”
“ဘာ၊အသုဘကူငွေ၊ ဘယ်သူ့အတွက်လဲကွ၊ ဘယ်သူဆုံးတာလဲ”
“အော်၊ညတုန်းကမောင့်ကိုပြောပြထားတဲ့ ‘ဇရပ်ကြီး’ကအဘိုးကြီးအသုဘအတွက်ပါမောင်ရဲ့၊ရွာထဲမှာကျမနဲ့နားလည်မှုရှိတဲ့ သူငယ်ချင်းတွေလိုက်ပြောပြီးစုတာ၊နှစ်ရာကျော်တောင်ရတယ်မောင်”
ညတုန်းကအိပ်ရာမ၀င်ခင်‘မဒေ၀ီ’ပြောခဲ့သည့် ‘ဇရပ်ကြီး’ရွာကအသက် (၆၀) အရွယ် လူ တယောက်၏အသုဘကိစ္စကိုကျနော်သတိရသွား၏။ စစ်တောင်းမြစ်ဟိုဖက်ကမ်း ကားလမ်းသစ် ဖောက်လုပ်ရေးလုပ်အားလာပေးရင်းက ရုတ်တရက်သေဆုံးသွားရသည့် ‘ဇရပ်ကြီး’ရွာက အဘိုးအို တဦးအကြောင်းကို‘မဒေ၀ီ’ကကျနော့်ကို စီကာပက်ကုံးပြောပြခဲ့၏။
ရွာတွင်ကျောထောက်နောက်ခံမရှိသည့်အပြင် သူနှင့်အတူ လုပ်အားလာပေးနေကြရသည့် ဇရပ်ကြီးရွာသားများလည်းတလကိုးသီတင်း ရွာနှင့်ဝေးလံသည့်နေရာတွင် လုပ်အားပေးနေကြရသဖြင့် ‘အသုဘ’ကိစ္စကို တင့်တောင့်တင့်တယ်ဖြစ်အောင်မစီစဉ်နိုင်ကြ။ တာဘေးကခြုံပုတ်အစပ် နေပူကွင်းကြီးထဲတွင်ဝါးစင်ပေါ်ဖျာနှင့်လိပ်ပြီး အလောင်းစင်ပြင်ခဲ့ကြရ၏။ လုပ်အားပေးအချင်းချင်းတကျပ်တန်သည် နှစ်ကျပ်တန်သည်စုကာ၊ အနီးဆုံးရွာက ဓါတ်စက်ငှားပြီးဖွင့်ရ၏။ ‘မဒေ၀ီ’က လုပ်အားပေးများကိုဈေးတောင်းခေါင်းရွက် မုန့်လိုက်ရောင်းရင်းက အသုဘကိစ္စကိုတွေ့ပြီးစိတ်မကောင်းဖြစ်မိဟန်တူလေသည်။
“ကဲ ဒါဆိုရင်လည်းထွက်တော့ နေပူလိမ့်မယ် ”
“နေအုံးမောင်၊ မောင့်ကိုလည်း ကျမက ပြောစရာရှိသေးလို့ ”
“ဘာပြုတယ်”
“မောင့်ကို ပြောစရာနည်းနည်းရှိသေးတယ်လို့ ပြောတာပါမောင်ရယ် တကတဲ မျက်လုံးမျက်ဆန်ပြူးပြီး ဘယ်လိုဖြစ်သွားတာလဲ ”
“အော် ၊ ဈေးရောင်းထွက်ခါနီးကြကာမှ ဘာမပြောညာမပြော စကားပြောစရာရှိတယ်ဆိုတော့၊အံ့သြသွားလို့ပါကွာ…၊ ကဲ-ပြော ဘာပြောမလို့လဲ”
မဒေ၀ီက တဲပေါက်ဝတွင်ပင် ခြေထောက်တွဲလောင်းချထိုင်ရင်း ကျနော့်ကို ပြုံးပြီးကြည့်နေသည်။
“မော်စီတုန်းတို့ ဟိုချီမင်းတို့က ကဗျာရေးကြတယ်နော်မောင်…”
ကျနော်ကသဲသဲကွဲကွဲကြားလိုက်သည့်တိုင် နားကိုမယုံနိုင်အောင် ဖြစ်ရသဖြင့် သူ့ကို ကြောင်ပြီးငေးကြည့်နေမိသည်။ ရုတ်တရက် ဘာပြောရမှန်းပင်မသိ။
“အော်… ဒီလိုပါမောင်ရဲ့ ၊ ဗီယက်နမ်က ဟိုချီမင်းတို့ တရုတ်ပြည်က မော်စီတုန်းတို့က ကဗျာရေးကြတယ်နော်မောင်”
“အင်း …ဟုတ်တယ်၊ ရေးတယ်လေ၊ အဲဒါ ဘာဖြစ်လဲ၊ မင်းဘာတွေ တွေးနေတာလဲ”
“ကျမ၊ ဒါကိုစဉ်းစားနေတာကြာပြီမောင်ရဲ့၊ ဗီယက်နမ်ခေါင်းဆောင်၊ တရုတ်ခေါင်းဆောင် တွေကကဗျာရေးတယ်၊ ကဗျာကိုခံစားတတ်တယ်ဆိုတော့ အကယ်၍များ ကျမတို့ရဲ့ခေါင်းဆောင် ကလည်းကဗျာရေးတတ်ရင်၊ ကဗျာကိုခံစားတတ်ရင် ဘယ်လောက်များကောင်းလိမ့်မလဲလို့ပေါ့၊ ကျမကကျမတို့ရဲ့ခေါင်းဆောင်ကို ကဗျာရေးတတ်စေချင်တယ်၊ ဒါမှမဟုတ် ကဗျာတွေကိုကောင်းကောင်းခံစားတတ်စေချင်လိုက်တာ အရမ်းပဲ မောင်ရယ် တကယ်ပဲ”
မဒေ၀ီကိုကျနော် သြချယူရလောက်အောင် ဖြစ်သွားရ၏။
“အဲဒီတော့ ”
“အဲဒါ …၊ နောက် နှစ်ရက်ရှိရင် မောင်အုတ်တွင်းကို သွားရမယ်မို့လား၊ ဒေါ်အောင်ဆန်းစုကြည်ကမန္တလေးကအပြန် အုတ်တွင်းရုံးကို ၀င်အုံးမှာပဲမို့လား၊ အဲဒါ ဒီတခါ မောင်အုတ်တွင်းသွားရင် ကျမလိုက်ချင်တယ်၊ ဒေါ်အောင်ဆန်းစုကြည်နဲ့တွေ့ချင်တယ်၊ ပြီးတော့ သူ့ကိုကဗျာရေးတတ်သလား၊ ဒါမှမဟုတ် ကဗျာဖတ်သလား၊ ကဗျာခံစားတတ်သလားဆိုတာ မေးမယ်၊ အဲဒါကျမတွေးနေတာကြာပြီ၊ ကျမ ဒီကိစ္စ အရမ်းသိချင်တာပဲမောင်ရယ်၊ မောင်ဒီတခါ အုတ်တွင်းကိုသွားရင်ကျမလိုက်လို့ရမလားဟင်မောင်၊ ကျမလိုက်ချင်တယ်၊ လိုက်ပါရစေမောင်ရယ် ”
ပြောချင်တာပြောပြီးကျနော်နှင့်ဆွေးနွေးညှိနှိုင်း ကျေနပ်ကာမှ ဈေးတောင်းခေါင်းပေါ်တင်ကာဈေးရောင်းထွက်သည့် မဒေ၀ီ၏ ကျောပြင်ကိုငေးကြည့်ကာ ကျနော့်မှာ သက်ပြင်းချမိလေသည်။
(ဂ)
တောအုပ်ကလေးထဲမှလမ်းလျှောက်ပြီးထွက်လာနေသည့်‘မဒေ၀ီ’ ကို ကျနော်ငေးကြည့်နေရင်းက ‘မဒေ၀ီ’ နှင့်ပြောရဆိုရမည့်စကားလုံးများကို ကြိုတင်စဉ်းစားနေရပြန်သည်။
အမှန်စင်စစ်၊မဒေ၀ီကိုယ်တိုင်၊ အုတ်တွင်းရုံးကို လိုက်လာနိုင်လျှင် ကောင်းလေစွဟူ၍လည်းတွေးမိသည်။အခုတော့ အုတ်တွင်းရုံးကိုမလိုက်လာနိုင်ခဲ့သည့် မဒေ၀ီအဖို့ သူသိချင်သည့် မေးခွန်းများကိုဘယ်လောက်အထိစိတ်လှုပ်ရှားစွာ သိချင်နေခဲ့မည်ကို ကျနော်ခန့်မှန်းမိသည်။ သူ့ကို ကျနော်နားလည်သည်။
ထိုနေ့ကအုတ်တွင်းမြို့အမျိုးသားဒီမိုကရေစီအဖွဲ့ချုပ် မြို့နယ်ရုံးကို မဒေ၀ီ မလိုက်နိုင်ခဲ့ပါ။ အငယ်ဆုံးသားဖြစ်သူကထိုနေ့ကြကာမှ အထက်လှန်အောက်လျှောဖြစ်ကာ ရုတ်တရက်နေမကောင်းသဖြင့် သူ့ခမျာကျနော်နှင့်အတူ အုတ်တွင်းရုံးကိုမလိုက်နိုင်ခဲ့ပါ။ သူသိချင်သည့် မေးခွန်းများကိုသာဒေါ်အောင်ဆန်း ဆုကြည်နှင့် တွေ့သည့်အခါ မေးဖြစ်အောင်မေးခဲ့ဖို့ ကျနော့်ကို အတန်တန်မှာရင်းရွာတွင်ကျန်နေရစ်ခဲ့၏။
ရွာမှထွက်ပြီးနောက်တနေ့တွင်ဒေါ်အောင်ဆန်းစုကြည်တို့အဖွဲ့ ကျွဲပွဲ အမျိုးသားဒီမိုကရေစီ အဖွဲ့ချုပ်ရုံးကိုဝင်ရောက်လာခဲ့ကြ၏။ အမှန်စင်စစ် ဒေါ်အောင်ဆန်းစုကြည်နှင့်အဖွဲ့မှာ ကျွဲပွဲကို ၀င်ရောက်ဖို့ရန်အစီစဉ်မရှိ။ကျနော်သည်ပင်ကံကောင်ထောက်မစွာ ဒေါ်အောင်ဆန်းစုကြည်နှင့် တွေ့ လိုက်ရခြင်းဖြစ်သည်။
ဒေါ်အောင်ဆန်းစုကြည်တို့၏မူလအစီစဉ်က အုတ်တွင်းမြို့နယ်ရုံးတွင်သာ ခေတ္တ ၀င်ရောက်ရန်စီစဉ်ထားခဲ့ခြင်းဖြစ်၏။မူလအစီအစဉ်က အုတ်တွင်းရုံးကို ညနေပိုင်းတွင်ရောက်မည်ဟု အကြောင်းကြားရာက၊မမျှော်လင့်ဘဲ မနက်ခင်းတွင်ရောက်လာခဲ့သဖြင့်၊ ထိုစဉ်က ကျွဲပွဲရုံးတွင်ကင်ရှိနေသေးသည့် ကျနော်မှာ အုတ်တွင်းသို့သွားကာ ဒေါ်အောင်ဆန်းစုကြည်နှင့်တွေ့ဖို့အခွင့်မသာခဲ့။ ထို့ကြောင့် ဒေါ်အောင် ဆန်းစုကြည်တို့အဖွဲ့ကို ကျွဲပွဲရုံးမှသာထိုင်စောင့်နေခဲ့ရ၏။
ဒေါ်အောင်ဆန်းစုကြည်နှင့်အဖွဲ့သည်ကျွဲပွဲရုံးတွင် (၅) မိနစ်မျှသာ ကားရပ်ပြီးနောက် ခရီးဆက် ကြရ၏။စုပြုံဝိုင်းအုံလာသည့် လူထုကိုကျေနပ်အောင် အနည်းဆုံး စကားတစ်ခွန်းတော့ ပြောပေးပါဟုအခမ်း အနားမှူးလုပ်သူ ကျနော်က တောင်းပန်သဖြင့် ဒေါ်အောင်ဆန်းစုကြည်သည် ကားဘေးတွင်ရပ်ကာ စကား တခွန်းနှစ်ခွန်းမျှသာ လူထုကိုပြောဆိုပြီး ခရီးဆက်ကြရခြင်းဖြစ်လေသည်။
တိုတောင်းလှသည့်တွေ့ဆုံပွဲကလေးထဲတွင်၊ မဒေ၀ီသိချင် သည့် မေးခွန်းကို ဒေါ်အောင်ဆန်းစုကြည်အားမေးမြန်းဖို့ရာ အခြေအနေမပေးခဲ့ပါ။ ထို့ကြောင့် ကျနော့်မှာ မဒေ၀ီအတွက်စိတ်မကောင်းဖြစ်ခဲ့ရ၏။
မဒေ၀ီသိချင်သည့်မေးခွန်းများကို မေးခွင့်မရခဲ့သည့်တိုင် သူ ကျေနပ်စေမည့်ပစ္စည်းတခုကိုမူကျနော်ယူလာနိုင်ခဲ့သည်ဟုဆိုရပါမည်။ ရွာသို့ပြန်လာသည့် ကျနော့်လက်ထဲတွင်၊မဒေ၀ီနှစ်သက်မည် ထင်သည့် လက်ကမ်းစာစောင်တခု ပါရှိလာခဲ့၏။ ထိုစာစောင်ထဲတွင်ကဗျာတပုဒ် ပါလာခဲ့သောကြောင့်ဖြစ်သည်။ ထိုကဗျာကိုပြကာ မဒေ၀ီကို စိတ်ကျေနပ်အောင် ဖြောင့်ဖျရမည်ဟုကျနော်တွေးထားခဲ့၏။
“ဟေး… ဘာငေးနေတာလဲ၊ လူကိုမမြင်ဘူးလား”
“အော်၊ဟုတ်သားဘဲ၊ အဝေးကြီးကတည်းက မြင်ပါတယ်ကွာ၊ အတွေးလွန်သွားလို့ပါ။”
မဒေ၀ီကတောင်းအလွတ်ကို ခါးတွင်လက်တဖက်ဖြင့်ချိတ်ကာ ၀ါးတံတားအတိုင်း လျှောက်လာ၏။
“ကဲပြော ဒေါ်အောင်ဆန်းစုကြည်က ဘယ်လိုဖြေလိုက်သလဲ”
“အိုအမောပြေအောင်ထိုင်စမ်းပါအုန်းလေ၊ ပြောတာပေါ့ကွာ၊ လာဒီမှာ ထိုင်အုံး”
“မောင့်ကိုဟိုးအဝေးကြီးကတည်းကလှမ်းမြင်နေတာပဲ ကျမအမောပြေပြီးသား၊ ပြောမှာသာပြောစမ်းကွာ၊ ဘာလဲ၊ ကျမသိချင်ပါတယ်ဆိုမှ မောင်က ဈေးတင်နေတာလား”
“မဟုတ်ရပါဘူးဗျာ”
“ကဲဒါဖြင့်ပြောလေ ဒေါ်အောင်ဆန်းစုကြည်နဲ့ တွေ့ခဲ့တယ်မို့လား”
“တွေ့တယ်အင်း … တွေ့တော့တွေ့တယ်”
ကျနော်ကဖြစ်ကြောင်းကုန်စင်ပြောပြနေစဉ် ကျနော့်ဘေးတွင် ၀င်ထိုင်စဉ်က ရွှင်လန်းတက် ကြွနေသည့်မဒေ၀ီမှာ ခေါင်းငိုက်စိုက်ချကာ နားထောင်နေလေတော့သည်။
“အေးကွာ၊ကျမအရမ်းသိချင်တယ်ဆိုကာမှ နောက်တခေါက်တွေ့မှမေးမယ်ဆိုရင် သူက ဘယ်တော့မှနောက်တခေါက်လာမှာလဲဟင်”
“ဒါတော့မသိဘူးပေါ့၊ မင်းသိချင်တဲ့မေးခွန်းကို ဒေါ်အောင်ဆန်းစုကြည်ကိုယ်တိုင်ကအဖြေမပေးလိုက်နိုင်ပေမယ့်၊ မင်းစိတ်ကျေနပ်လောက်အောင်အဖြေပေးမယ့် စာစောင်တခုကို မောင်ယူလာခဲ့ပါတယ်ကွာ၊ ဒီစာစောင်ထဲမှာ ဒေါ်အောင်ဆန်စုကြည်ဘာသာပြန်ထားတဲ့ကဗျာတပုဒ်ပါတယ်၊ မူရင်းကဗျာဆရာက အင်္ဂလိပ်စာရေးဆရာ `ရူးဒီးယက် ကစ်ပလင်း´တဲ့၊ ဒါကိုဒေါ်အောင်ဆန်းစုကြည်က ဘာသာပြန်ထားတာ၊ ကဲ … မင်းသိချင်တဲ့၊ မင်းဖြစ်စေချင်တဲ့ဆန္ဒကိုအဖြေ ပေးလိုက်တဲ့သဘော ဖြစ်မယ်လို့မောင်ထင်တယ်၊ ဖတ်ကြည့်ပါ”
ရိုးထဲသို့ခေါင်းငိုက်စိုက်ချပြီးငုံ့နေသည့်မဒေ၀ီ၏ခေါင်းမှာ ရုတ်တရက်မော့လာကာ၊ ကျနော့် လက်ထဲမှ စာစောင်ကိုဖြတ်ကနဲဆွဲယူလိုက်၏။စာစောင်ကို စိတ်လှုပ်ရှားစွာဖြန့်ကြည့်လေသည်။
“ဒီ…ဒီလိုလုပ်ပါလားမောင်ရယ်၊ကျ …ကျမစိတ်လှုပ်ရှားလွန်းလို့၊ မောင်ကပဲအသံထွက်ပြီး ဖတ်ပြပါလားဟင်၊ကျမနားထောင်မယ်၊ ဖြေး …ဖြေးဖြေးဖတ်နော်မောင်၊ အောင်မယ်လေး၊ အံ့သြဖို့ ကောင်းလိုက်တာကျမဘယ်လို နားလည်ရမှန်းတောင် မသိတော့ပါဘူးမောင်ရယ်၊ ကြည့်စမ်းပါဦး ကဗျာခေါင်းစဉ်ကလည်း“အကယ်၍” တဲ့ မောင်ဖတ်ပြနော်၊ ရော့… သေသေချာချာဖတ်၊ ကျမနားထောင် မယ်”
ကျနော်ကလည်ချောင်းကို တချက်ရှင်းပြီး အသက်ဝအောင်ရှူကာ “အကယ်၍” ကဗျာကိုဖတ်သည်။
ရိုးထဲတွင်ကဗျာဖတ်သည့် ကျနော့်အသံမှာ ထင်ထင်ရှားရှားဖြစ်နေ၏။ ရွာနှင့်မလှမ်းမကမ်းတွင် ဖြစ်သဖြင့်လူသွားလူလာလည်းမရှိ။ ရိုးထဲသို့ ခေါင်းထိုးပြီးဝင်လာသည့်ဆောင်းလေမှာ ကဗျာရွတ်သံနောက်ကကပ်ပြီးလိုက်နေ၏။
အကယ်၍
မင်းအသိုင်းအ၀ိုင်းကတုန်လှုပ်ခြောက်ခြားပြီး
ဒါတွေဟာမင်းကြောင့်လို့ ၀ိုင်းဝန်းအပြစ်တင်ကြတဲ့အခါ
မင်းဟာခေါင်းအေးအေးနဲ့ရင်ဆိုင်နိုင်မယ်ဆိုရင် …
ကဗျာဖတ်နေရင်းကမဒေ၀ီကို ကျနော်မသိမသာအကဲခတ်သည်။ မဒေ၀ီ၏ခန္ဒာကိုယ်မှာ ကျနော့် ခန္ဒာကိုယ်နှင့်ပိုမိုထိကပ်လာနေသည်ကိုကျနော်သတိပြုမိခဲ့သည်။
အကယ်၍
စောင့်သင့်တဲ့အချိန်ကိုစောင့်နိုင်ပြီး
အဲဒီအတွက်လည်းမမောမပမ်းနေနိုင်မယ်ဆိုရင်
ဒါမှမဟုတ်
မင်းရဲ့အကြောင်းမဟုတ်တရား မုသားစကားကြားရတဲ့အခါ
မင်းကလည်းအလိမ်အညာတွေနဲ့ မတုန့်ပြန်ဘူးဆိုရင် …
ကျနော့်လက်ကိုဆုတ်ကိုင်လာသည့် မဒေ၀ီ၏လက်တဖက်မှာ ပိုမိုတင်းကျပ်လာနေသည်ဟု ထင်မိသည်။ ကျနော်ကကျန်ကဗျာပိုဒ်များကို အာရုံမြှင့်ပြီးမှ ဖတ်၏။
အကယ်၍
အောင်မြင်မှုသုခနှင့်ဆုံးရှုံးမှုဒုက္ခတွေကို ကြုံတွေ့ရတဲ့အခါ
တူညီသောလောကဓံတရားတွေပါလားရယ်လို့
ခံယူထားနိုင်မယ်ဆိုရင်…
ကဗျာဖတ်နေရင်းက၊ကျနော့်မှာအသက်ရှူကြပ်သလိုဖြစ်လာရသည်။ ကဗျာစာသားများမှာ ကျနော့်နှလုံးသားအပေါ်နင်းဖိပြီးတက်လာကြ၏။
အကယ်၍
တိုတောင်းလှတဲ့မပစ်ပယ်နိုင်တဲ့ တမိနစ်အတွင်းမှာ
အဓိပ္ပါယ်ရှိလှတဲ့စက္ကန့်ခြောက်ဆယ်အဖြစ် အသုံးချနိုင်မယ်ဆိုရင် …
နောက်ဆုံးကဗျာပိုဒ်ကိုဆက်လက်ရွတ်ဆိုရန် ကျနော်သည်အသက်ကိုပြင်းပြင်းရှူပြီး အားယူလိုက်၏။ ပြီးတော့မှနောက်ဆုံးကဗျာပိုဒ်ကိုရွတ်သည်။ ကဗျာပိုဒ်အဆုံးတွင် မဒေ၀ီ၏ အခြေအနေကို အကဲခတ်ရန်ခေါင်းကိုငဲ့လိုက်မိ၏။
“ဟေး…”
“ဟ…ဟ၊ ဘယ်လိုလုပ်လိုက်တာလဲကွာ၊ ဘာပြုလို့ တောင်းကိုပစ်ချလိုက်တာလဲ၊ ဒုက္ခပါပဲ တကတည်းမှပဲဒီလောက်တောင်ဖြစ်ရသလားကွာ၊ ဖြစ်မှ ဖြစ်ရပလေ ’
မဒေ၀ီကရိုးထဲသို့ လွင့်ကျသွားနေသည့် ခေါင်းခုပုဆိုးနှင့် တောင်းအလွတ်ကိုကြည့်ကာတဟေးဟေးနှင့် အော်နေသေး၏။
“ကျမအရမ်းဝမ်းသာတာပဲမောင်ရယ် တကယ့်ကိုအံသြစရာပဲ၊ ဒီကဗျာကို ဒေါ်အောင်ဆန်းစုကြည်ဘာသာပြန်တာ၊ဟုတ်လားမောင်၊ ကျမ၀မ်းသာလွန်းလို့ ရုတ်တရက် စိတ်မထိမ်းနိုင်လို့တောင်းကိုလွှင့်ပစ်လိုက်မိတာပါ၊ အံသြစရာပဲ … အံသြစရာပဲ ”
ရိုးထဲသို့ခုန်ချပြီးနောက်ခြုံပုတ်များပေါ် လွင့်ကျသွားသည့် တောင်းနှင့်ပုဆိုးကို လိုက်ကောက်ရင်းက၀ါးတံတားပေါ်ကို ကျနော်မော့ကြည့်မိသည်။
မဒေ၀ီကမူကဗျာစာရွက်ကလေးကို ကိုင်ကာ စိတ်လွတ်လက်လွတ် အော်ဟစ်နေဆဲ …။
ဝမ်းမြောက်ရွှင်မြူးစွာအော်ဟစ်လိုက်သည့် မဒေဝီ၏ အသံမှာ ရိုးကလေးတလျှောက် ကွေ့ဝိုက်ပြီး ပြေးနေလေသည်။ ။
(လတ်ဆတ်စိမ်းလန်း မွှေးမြသော နေ့ရက်များသို့…)
သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ
