>
တကိုယ်တော် အကြမ်းဖက်သမားများမှသည် အကြမ်းဖက်နိုင်ငံတော်များ ဆီသို့
မောင်ရစ်
သြဂုတ် ၁၃၊ ၂၀၀၈
ရုရှားပြည်ထောင်စုကြီးသည် တရုတ်အိုလံပစ်ပွဲတော်တွင် ရွှေ ၂၊ ငွေ ၇၊ ကြေး ၃ ဆုဖြင့် ရှေ့တန်းတွင်ရှိနေပါလျက် ဂျော်ဂျီယာပြည်ထောင်စုအတွင်းသို့ အမြောက်လက်နက်များ ပစ်ဖောက်လျက် ကျုးကျော်ဝင်ရောက်လိုက်သည့် သမိုင်း အချိုးအကွေ့တွင်မူ နိုင်ငံပေါင်းစုံ၏ မှင်တက်မှုဖြင့် “ကမ္ဘာ့အကြမ်းဖက်ကျူးကျော်သူ” စံချိန်ကို ၂၁ ရာစုတွင် ချိုးလိုက်လေပြီဟု ဆိုရတော့မည်။
ယခင်က အမေရိကန်ပြည်ထောင်စုသည် အီရတ်ကို စစ်လက်နက်တို့ဖြင့် တိုက်ခိုက်သိမ်းပိုက်ဖို့အရေး နိုင်ငံတကာ နိုင်ငံရေး ဇာတ်ခုံတွင် အမျိုးမျိုး အဖုံဖုံ ဇာတ်ခင်းပြီး အသုံးတော်ခံပြီးမှသာ အီရတ်ကို “တရားဝင်” စစ်ခင်းခဲ့ရသော်လည်း ရုရှားပြည်ထောင်စုကြီးကမူ ဂျော်ဂျီယာပြည်ထောင်စုနှင့် နယ်မြေအငြင်းပွားမှုကို အရင်းပြုလျက် လွန်ခဲ့သည့် ၈ သုံးလုံးနေ့က စစ်အင်အား အစွမ်းကုန်သုံးလျက် ချင်းနင်းဝင်ရောက်ခဲ့လေပြီ။
၂၁ ရာစုအ၀င်ကတည်းက အစွန်းရောက်အကြမ်းဖက်သမားများသည် အမေရိကန်မြေပေါ်တွင် လျပ်တပြက်ဝင်ရောက် စစ်ခင်းလိုက်သည်က စပြီး ကမ္ဘာပေါ်တွင် စစ်မီးများ တောက်ခဲ့ရသည်။ အာဖဂန်နစ္စတန်နှင့် အီရတ်တို့သည် အကြမ်းဖက်အုပ်စုများကို လက်ခံသူများဟု အမေရိကန်က စွပ်စွဲလျက် စစ်လက်နက်ဖြင့် ကျုးကျော်ပြီးနောက်ပိုင်း ကုလသမဂ္ဂနည်း၊ နိုင်ငံရေးနည်း၊ စားပွဲဝိုင်းနည်းတို့ဖြင့် နိုင်ငံတော်တို့အချင်းချင်း၊ အာဏာရနှင့် အာဏာမဲ့တို့အချင်းချင်းတွင် စေ့စပ်ဆွေးနွေးရေး လမ်းစတို့ အမှောင်ဖုံးကုန်လေသလားဟု ထင်မှတ်ရပေတော့သည်။
အာဖရိကနိုင်ငံများတွင် ရွေးကောက်ပွဲတို့သည် အသုဘကို မိတ်ကပ်လိမ်း ပန်းပန်ပေးသည့် အဆင့်ဆီသို့ ကျဆင်းခဲ့ရသည်။ အရှေ့အလယ်ပိုင်းနိုင်ငံများတွင်လည်း ရေနံအားကိုး တန်ခိုးတိုးသည့် အာဏာရှင်တို့က မျက်နှာပွင့်လျက်ရှိသည်။ အာရှတွင်လည်း အတိုက်အခံခေါင်းဆောင်တို့ကို လုပ်ကြံသတ်ဖြတ်မှုများ၊ လက်နက်မဲ့ ဆန္ဒပြသည့် ပြည်သူနှင့် ဘုန်းကြီးတို့ အကြမ်းဖက်ဖိနှိပ်မှုများနှင့်သာ ရင်ဆိုင်တိုးနေကြရသည် ဖြစ်ရာ လက်နက်မဲ့၊ အာဏာမဲ့၊ သြဇာမဲ့သည့် သာမန် ပြည်သူလူထု လူတန်းစား အသီးသီးတို့ ဘ၀ရှေ့ရေးကား ရေနည်းငါးအဖြစ်သို့ ရောက်ရတော့မည်သို့ ဖြစ်နေလေပြီ။
လက်နက်နိုင်ငံတော်တို့၏ အကြမ်းဖက် ကျုးကျော်ရေး လမ်းစဉ်သည်သာ အမှန်တရားဟု တထစ်ချလျက် ထိုထို အကြမ်းဖက်သမား အစုအဖွဲ့များမှသည် ထိုထို အကြမ်းဖက် နိုင်ငံတော်များ၏ ခြေလှမ်းများနောက်သို့ လိုက်ကြမည်သာ ဆိုလျှင် – မြောက်ကိုရီးယားသည် တောင်ကိုရီးယားကို ၀င်ရောက် သိမ်းပိုက်ခြင်းဖြင့်လည်းကောင်း၊ တရုတ်ပြည်မကြီးသည် တိုင်ဝမ်ခွဲထွက် ကျွန်းနိုင်ငံလေးကို စစ်ဆင်ခြင်းဖြင့်လည်းကောင်း အနိုင်ယူ ဖြေရှင်းသင့်လှပေသည်။
လက်နက်မဲ့သော၊ အာဏာမဲ့သော၊ ဥစ္စာဓနနှင့် သြဇာမဲ့သော ကမ္ဘာအရပ်ရပ်က လူသားများ၊ ညီအကိုမောင်နှမ မိသားစုများကား ဘယ်သို့သော အားကိုးရာကို ရှာကြရလိမ့်မည်နည်း။ ကုလသမဂ္ဂ လုံခြုံရေးကောင်စီကြီးတွင် ထိုထိုသော လက်နက်နိုင်ငံတော်တို့က အခန့်သား နေရာယူလျက် ရှိပေသည်။ သူတို့ထိုးသော လက်ညှိုးက တခုတည်းဖြစ်သော်လည်း ကျန်လက်ချောင်းတို့က သူတို့ကို သူတို့ ထိုးလျက် ရှိကြလေရာ ဘယ်သို့သော နတ်ကောင်းနတ်မြတ်တို့က အမိုက်ဖုံးနေသူတို့ကို မည်သို့သော ဉာဏ်အလင်းကို ပေးသနားမူပါအံ့မည်နည်း။
မြန်မာ့အရေး ဆောင်ရွက်နေသူတို့သည် တိဗက်အရေး ဆောင်ရွက်နေသူ၊ ဒါဖိုးအရေး ကြွေးကြော်နေသူ၊ ကျုးကျော်စစ်ကို အံတုကာ ဆန္ဒပြ တိုက်ပွဲဝင်နေသူ၊ ဘာသာရေး လူမှုရေး ဖိနှိပ်မှုတို့ကို အနှိပ်စက်ခံ၊ အရိုက်ခံပြီး သွေးချင်းချင်းနီသည့်ကြား အံခဲနေသူ လူသားများ အချင်းချင်း၊ လူသားများအရေးကို ဦးစားပေးလျက် ကျောချင်းကပ်ကြမည့် အချိန်ကို ရောက်နေပြီ ဖြစ်ကြောင်း၊ လက်နက်မဲ့တို့သည် ငြိမ်းချမ်းရေးကို တွေးမျှော်၍ ကမ္ဘာလူသားအချင်းချင်း ကိုယ်ချင်းစာနာ စောင့်ရှောက် ယိုင်းပင်းရေး စိတ်ဓာတ်ကို ၀ိုင်းဝန်းလွှင့်တင် တည်ဆောက်ကြရုံမှ တပါး အခြား မရှိပါကြောင်း အကျိုးမျှော်၍ နိုးဆော်လိုက်ရပါသည်။
သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ
