>
တောင်သူလယ်သမားများ ကပ်ဆိုက်နေသည်ဟု ဆို
မိုးမခ အထောက်တော် (ရန်ကုန်)
ဇူလိုင် ၂၉၊ ၂၀၀၈
နာဂစ်အလွန် ဧရာဝတီတိုင်းရှိ လယ်သမားများမှာ မိုးရာသီ စပါးစိုက်ချိန်အတွင်း အခက်အခဲပေါင်းစုံဖြင့် ရင်ဆိုင်နေကြရသည်ဟု ဆိုသည်။ ရေစိုစပါးများကလည်း ပြန်လည်ထုတ်ရောင်းကြရာတွင် ဈေးကောင်းမရ၊ ဓာတ်မြေသြဇာများက ဈေးခေါင်ခိုက်နေချိန်တွင် လယ်ထွန်စက်များ ကျွဲနွားများကလည်း အလွယ်တကူ ငှားရမ်း၍ မရကြောင်း၊ စက်သုံးဆီများနှင့် လယ်သူရင်းငှားခများကလည်း အဆမတန်တက်နေသဖြင့် လယ်စိုက်သည့်လုပ်ငန်းက မည်သို့သော အကျိုးအမြတ်ကို မျှော်လင့်ရမည်ကို မသိ ဖြစ်နေကြသည် ဟုဆိုသည်။
လယ်လုပ်ငန်းကို မလုပ်ကိုင်ပါက လက်ရှိ လယ်မြေများကို အစိုးရက ၎င်းတို့လက်ဝေခံ လုပ်ငန်းရှင်များကို လွှဲအပ်လိုက်မည်ဖြစ်ရာ၊ လယ်မြေနှင့် လယ်လုပ်ငန်းများ၊ ၎င်းတို့ဇာတိ ရပ်ရွာများ ရွေ့ပြောင်းဆုံးရှုံးမည်ကို စိုးရိမ်ကြသဖြင့် ကြိတ်မှိတ်ပြီး လယ်လုပ်နေကြရသည်ဟု သိရသည်။ အမတော်ကြေးနှင့် ထောက်ပံ့ကြေးများကိုလည်း အထူးတိုးမြှင့်ပြီး အကူအညီမပေးသည်ကိုလည်း လယ်သမားများက အံ့သြနေကြရသည်။ မျိုးစပါးများကိုလည်း အလွယ်တကူ ၀ယ်မရခြင်း၊ ရရှိသော မျိုးစပါးများကလည်း အပင်မပေါက်ခြင်း၊ စံနှုန်းမမီခြင်းတို့ကိုလည်း ရင်ဆိုင်နေရသည်။
ယခင် စပါးဈေးတက်ခဲ့သည့် နှစ်များက ကုန်သည်ကြီးများအသင်းနှင့် စစ်အစိုးရတို့ ပူးပေါင်းပြီး ဈေးကို နှိမ်ပြီး ထိမ်းချုပ်ဝယ်ယူခဲ့သော်လည်း ယခု ရေစိုစပါးဈေး အဆမတန် ကျဆင်းနေချိန်တွင် လယ်သမားများ သက်သာချောင်ချိစေရန် ကြားဝင်ဆောင်ရွက်ခြင်း လုံးဝ မရှိချေ။
“ စပါးဈေးမှာ ရေမမြုတ်မီက တင်း ၁၀၀ ကို ၆ သိန်း၊ အခု ၁ သိန်းပဲ ရှိတော့တယ်။ မြေသြဇာက ၁ အိတ်ကို ၃ သောင်း ၄ ထောင်၊ အမတော်ကြေးက မနှစ်ကထက် ငွေ ၅ ထောင်ပဲ ပိုထုတ်ပေးတာပါ။ ပြီးတော့ ပြည်တွင်းပြည်ပက အလှူရှင်တွေဆီက အကူတွေနဲ့ဆိုတော့ လက်မှုလယ်ယာကနေ စက်မှုလယ်ယာကို တိုးလုပ်ပစ်လိုက်မယ် ဟဲ့ ဆိုပြီး စိတ်ကို တင်းထားတာကလည်း စစ်တပ်က ချယ်လှယ်ပုံတွေနဲ့ အကုန်ပစ်လိုက်ရတာပေါ့။ ကျွဲတွေ နွားတွေမှာလည်း ခွာနာ လျှာနာတွေ ဖြစ်နေတယ်။ အခုက ကပ်ဆိုက်နေတာ …”
ဟု လယ်သမားများက ပြောကြားခဲ့သည်။
သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ
