အောက်တိုဘာ ၃၁၊ ၂၀၁၂
“ဆီမီးရယ်က တထိန်ထိန်၊ အိုင်မင်းရေကြည်က ကြာငါးမည်၊ ငုံအာစွင့်တယ်၊ ဖူးပွင့်ခါချိန်၊ အဿဝတီ ယှဉ်ကာချဉ်းပါလို့၊ လင်းလာတဲ့ ငွေတာရိန်ငယ်၊ ပြာမှန်လျက် မြူခြေဆိုင်း၊ ဂါရဝေ သက္ကစံ္စ ပဏာမေနှင့်၊ သဒ္ဒါခြွေ ကန်တော့ပွဲကိုလ၊ မစဲပေါင် ကုသိုလ်ကို နိူးကြတယ်၊ မျိုးမြန်မာ့တိုင်း” ဟူသည့် မဟာဂီတ ဦးပြုံးချို၏ လင်္ကာကဗျာနှင့်အညီ သီတင်းကျွတ်လပြည့်နေ့ (အဘိဓမ္မာအခါတော်နေ့) ၂၀၁၂ခုနှစ်၊ အောက်တိုဘာလ(၃၀)ရက် (အင်္ဂါနေ့) တွင် နာရေးကူညီမှုအသင်း (ရန်ကုန်)၌ မြတ်ဗုဒ္ဓ၏ ပဝါရဏာကျင့်စဉ်ကို စံထားကာ သုခအလင်း ပညာဒါနမှ ဖွင့်လှစ်သင်ကြားသည့် စာသင်စာကျက်ဝိုင်း ၂ဝ၁၂/၁၃ ပညာသင်နှစ် တက္ကသိုလ်ဝင်တန်း ကျောင်းသား/သူများတို့မှ မေတ္တာ စေတနာတို့ဖြင့် သင်ကြားပေးခဲ့သော ဆရာ/မများတို့အား ဝါကျွတ်ကန်တော့ပွဲနှင့် မိဘဆရာတွေ့ဆုံပွဲအခမ်းအနား တစ်ရပ်ကို နေ့လည် (၁း၃ဝ) အချိန်တွင် ကျင်းပပြုလုပ်ခဲ့သည်။
ဆက်လက်၍ ညနေ (၃းဝဝ) နာရီအချိန်တွင် နာရေးကူညီမှုအသင်း(ရန်ကုန်)မှ ၂ဝ၁၁/၁၂ ခုနှစ် ဖွင့်လှစ်သင်ကြားပေးခဲ့သော သုခအလင်း ပညာဒါနမှ (အင်္ဂလိပ်စာသင်တန်း၊ ပန်းချီသင်တန်း၊ ကွန်ပြူတာသင်တန်း၊ ဟိုတယ်ဝန်ဆောင်မှုသင်တန်း၊ စာရင်းကိုင်သင်တန်း၊ လူမှုရေးမျိုးဆက်သစ် သင်တန်း၊ ဂျာနယ်လစ်ဇင်သင်တန်း၊ စွမ်းရည်မြင့်သင်တန်း၊ ခေါင်းဆောင်မှုဆိုင်ရာသင်တန်း၊ ရှေးဦး သူနာပြုစုနည်းသင်တန်း၊ ရုပ်သံမီဒီယာသင်တန်း အစရှိသည့်သင်တန်းများမှ ဆရာ/မများအား တွေ့ဆုံ ဂုဏ်ပြုပွဲ အခမ်းအနား ကျင်းပပြုလုပ်ခဲ့သည်။ ယင်းအခမ်းအနားတွင် သက်ဆိုင်ရာ ဘာသာရပ်အလိုက် ဆရာ/မများတစ်ဦးချင်းမှ သင်ကြားခဲ့သော ဘာသာရပ်များ နှင့် အမည်နာမများဖြင့် မိတ်ဆက်ခဲ့ကြပြီး အတွင်းရေးမှူး ဒေါ်မြင့်မြင့်ခင်ဖေ (ခ) ဒေါ်ရွှေဇီးကွက်မှ သုခအလင်း ပညာဒါန ဖွင့်လှစ်ရခြင်း၏ ရည်ရွယ်ချက်နှင့် စတင်ဆောင်ရွက်ပုံအကျဉ်းအား ရှင်းလင်းပြောကြားသွားခဲ့ကာ သုခအလင်း ပညာဒါနနှင့် ပတ်သက်၍ လိုအပ်ချက်များအား အကြံပြုဆွေးနွေးခဲ့သည်။ ယင်းနောက် ဥက္ကဌ ဦးကျော်သူမှ နှုတ်ဆက်စကားပြောကြားပြီးနောက် ဆရာ/မများနှင့်အတူ အမှတ်တရဓါတ်ပုံ ရိုက်ပြီး အောင်မြင်စွာ ရုတ်သိမ်းခဲ့ပါသည်။
ကောင်းမှုမြတ်နိုး၊ ကောင်းအောင်ကြိုး၍၊ ကောင်းကျိုးကိုယ်၌ တည်စေသောဝ်။