ကဗျာ

စိုးနေလင်း ● စိတ်ကုကဗျာ


စိုးနေလင်း ● စိတ်ကုကဗျာ
(မိုးမခ) ဇန်နဝါရီ ၂၆၊ ၂၀၁၇

တခါတခါမှာ…
သဘာဝတရားရဲ့အလှအပမှာနှစ်မြှုပ်
ရုပ်နဲ့စိတ်ကို အငြိမ်သက်ဆုံးထား
အခါးသီးဆုံးဖြစ်ရပ်မှန်များမှခွာ
ကန့်လန့်လာတခုကို ဖြည်ချထားချင်သောခဏ
အချိန်ဘယ်လောက်ရနိုင်အုံးမလဲ
ဖြစ်မြဲဓမ္မတာ
မသေချာမရေရာမှုတန်ဘိုးတိုးများလာရာမှ။

ဖြစ်တည်မှုဘဝကိုဆန်းစစ်
နစ်မွန်းနေကြသူချည်းသာ
လားရာအသီိးသီးကိုပြန့်ကျဲ
ငွေကြေးနဲ့ လဲနှုန်း အခြေအနေအလိုက်ပြောင်းလဲ
မိုးခါးသည်းသည်းရွာသွန်းဆဲမှာ။

ရှည်ကြာလွန်းသောမှားယွင်းမှုများအောက်
မျဉ်းကောက်များစွာပေါက်ဖွားရုန်းရုန်း
စတော့ဟုမ်းစင်ဒရုမ်း*
လွှမ်းဖုံးသိပ်သည်းလာမယ့်အဖြစ်
ညစ်စွန်းစာမျက်နှာပေါ်မှာ
အဝါရောင်လွန်ကဲလွန်းလှရဲ့။

အဲဒီပုံရိပ်စစ်တွေကိုစိတ်ထဲမှာထား
အားကိုတင်း ရင်ကိုကော့…

“ငါ့အတွက်တော့…
ဂျာမန်နာဇီတွေလက်အောက်မှာ တော်လှန်ရေး
လုပ်ခဲ့ရတဲ့အချိန်ဟာ အလွတ်လပ်ဆုံးပါပဲ” ဆိုတဲ့
ယန်းပေါဆတ်#ရဲ့စကားကိုသတိရ
ကိုယ်စီကိုယ်စီက
လွတ်လွတ်လပ်လပ်ရွေးချယ်ဆုံးဖြတ်ကြရုံသာ။   ။

*Stockholm syndrome
(တံဆာခံ အဖြစ်ဖမ်းဆီးခံထားရသူက ဖမ်းဆီးသူများကိုသဘောကျ ဘက်ပြောင်းရပ်တည်ပေးလိုသော စိတ္တဗေဒ တုန့်ပြန်မှု အခြေအနေ)

#Jean-Paul Sartre(1905-1980)
(ပြင်သစ် စာရေးဆရာ၊တွေးခေါ်ပညာရှင်နှင့် တော်လှန်ရေးသမား)

 


သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ
My Friend Tin Moe By Maung Swan Yi - Selection of MoeMaKa Articles

Similar Posts