ဘာသာပြန်ကဏ္ဍ သတင်းဆောင်းပါး သာဂိ အခန်းဆက်များ

လုပ်ဇာတ်သတင်း၊ အမှန်လွန်ခေတ်နဲ့ ပုံပြင်ထဲပျော်တဲ့ ကျနော်တို့လူသားတွေ (၂)



လုပ်ဇာတ်သတင်း၊ အမှန်လွန်ခေတ်နဲ့ ပုံပြင်ထဲပျော်တဲ့ ကျနော်တို့လူသားတွေ (၂)
ယူဗဲနိုအာဟာရာရီ၊ The Globe and Mail (စက်တင်ဘာ ၂၀၁၈)
ဘာသာပြန်သာဂိ (မိုးမခ) မတ်  ၁၁၊ ၂၀၁၉

ဟယ်ရီပေါ်တာလို မှော်ဆရာပုံပြင်စာအုပ်နဲ့ ခရစ်ယာန်သမ္မာကျမ်းစာကို နှိုင်းတော့ စိတ်ဆိုးချင်ကြမယ်။ အကယ်၍ သင်ဟာ သိပ္ပွံနည်းကျဆန်းစစ်တတ်သူ ခရစ်ယာန်တဦးသာဖြစ်ရင်တော့ သမ္မာကျမ်းစာထဲက ထူးဆန်းထွေလာ၊ ဒဏ္ဍာရီဆန်တာ၊ အားနည်းချက်၊ လွဲချော်မှုတွေ၊ မဆီလျော်တာတွေကို အာရုံစိုက်ခိုင်းမှာ မဟုတ်ပါဘူး။ သမ္မာကျမ်းစာကို ဖတ်တဲ့နေရာမှာ ၏သည်မရွေးလက်ခံဖတ်ရူတာထက် နက်နက်တဲ့ အနှစ်သာရတွေကို ဖော်ထုတ်နိုင်ဖိ်ု့ ဂမ္ဘီရအဆင်တဆာတွေနဲ့ ဆင်ယဉ်ထားတာကို ကျော်လွန်ပြီး ကြည့်ရမယ်လို့ သူတို့က ဖြေရှင်းပေးကြပါလိမ့်မယ်။ သည်လိုဆိုရင် ဟယ်ရီပေါ်တာပုံပြင်တွေကကော သမ္မာကျမ်းစာလို ဂမ္ဘီရဆန်တာတွေနဲ့ ဖွဲ့စည်းထားတာပဲ မဟုတ်လား။
သို့သော် သင်ကိုယ်တိုင်က အယူသည်းတဲ့ ခရစ်ယာန်သာဆိုရင်တော့ သမ္မာကျမ်းစာထဲက စာတွေ တလုံးမကျန် ယုံကြည်ဖို့ ဖိအားပေးတော့မှာ ဖြစ်ပါတယ်။ ကဲ ဟုတ်ပါပြီ တဲ့။ သမ္မာကျမ်းစာထဲက စာတွေအားလုံးဟာ ဖန်ဆင်းရှင် ဘုရားသခင်၏ နှုတ်ထွက်တွေချည်းဆိုပါစို့။ ဒါဆိုရင် ကိုရမ်ကျမ်းတွေ အခြားဘာသာရေးတွေကဆိုတဲ့ သူတို့ဘုရားသခင်ပြောစကားတွေကို ဘယ်လို သဘောထားမှာလဲ။ သူတို့ ကျမ်းစာတွေ သူတို့ဘုရားသခင်ဆိုတာက ပုံပြင်တွေလား။ သာမန်လူသားတွေက ရေးခဲ့တာလား။ သို့မဟုတ် မကောင်းဆိုးဝါးတွေက ရေးခဲ့တယ်လို့ ဆိုချင်တာလား။
လူတွေကို ပူးပေါင်းစုစည်းလာဖို့ လုပ်ခဲ့တာ ဘာသာရေးနဲ့တင် မဟုတ်ပါ။ လတ်တလောသမိုင်းမှာဆိုရင်လည်း နိုင်ငံတော်တွေက နိုင်ငံရဲ့ဒဏ္ဍာရီတွေ ရေးဖွဲ့ခဲ့ကြပါတယ်။ လှုပ်ရှားမှုတွေဖြစ်တဲ့ ကွန်မြူနစ်၊ ဖက်ဆစ်နဲ့ လစ်ဘရယ်လှိုင်းတွေမှာလည်း သူတို့စီးတဲ့ ယစ်မူးဖွယ်လှိုင်းလုံးကြီးတွေနဲ့ ဆွဲဆောင်ခဲ့ကြပါတယ်။ နာဇီဝါဒဖြန့်ဂုရု ဂျိူးဇက်ဂိုဘယ်က ဘာပြောခဲ့သလဲ ဆိုတော့ – “မုသားကို တခါတည်းပဲ ပြောခဲ့ရင် မုသားလို့ သမုတ်နိုင်တယ်။ မုသားကို အကြိမ် ၁ထောင် ပြောလိုက်နိုင်ပြီဆိုရင်တော့ ဒါဟာ အမှန်ဖြစ်သွားတော့တာပဲ။” တဲ့။ ဟစ်တလာ၏ ကိုယ်ရေး မိန်းကန့် (ကျန်ုပ်၏စွန့်စားမှု) စာအုပ်မှာလည်း – ” ထိရောက်တဲ့ဝါဒဖြန့်ချိမှုဆိုတာ ကိုယ့်အခြေခံသဘောတရားကို စိတ်ထဲ အကြိမ်ကြိမ်မောင်းသွင်းနေဖို့ပဲ။ သူ့မှာ ထိရောက်တဲ့ တိုတိုတုတ်တုတ် စကားလုံးတွေ ပါရမယ်၊ ခနခနလည်း ထပ်ပြောပေးနေရမယ်” ။ သည်လိုဆိုတော့ လက်ရှိမျက်မှောက် လုပ်ဇာတ်ခင်းသတင်းတွေ ဆိုတာ ဒီဟာကို ပိုပြီးကောင်းအောင် မွန်းမံထားတာတွေ မဟုတ်ပါလား။

(ဖြည့်စွက်ချက် – ပြည့်အင်အားသည် ပြည်တွင်းမှာသာ ရှိသည်။ မြန်မာ့အားကစား ကမ္ဘာကို လွှမ်းရမည်၊ တပ်မတော်သာ အမိ၊ တပ်မတော်သာ အဖ။ ပြည်ပအားကိုး ပုဆိန်ရိုး အဆိုးမြင်ဝါဒီများအား ဆန့်ကျင်ချေမှုန်းကြ။ လွှတ်တော်အသံ ပြည်သူ့အသံ … ဆိုတာတွေကော ဘယ်လို သင်တို့ သဘောထားကြပါလိမ့် …)

ဆိုဗီယက်ခေတ်တုန်းကဆိုရင် ပြည်တွင်းက ဒုက္ခတွေကို ဖုံးကွယ်ထားပြီး ပြည်ပမှာလည်း ဆိုဗီယက်ပြည်တော်သာနေတယ်လို့ အစွန်းကုန် ၀ါဒဖြန့်ခဲ့ကြတယ်။ ခုခေတ်ယူကရိမ်းတွေကလည်း ပူတင်တို့ရုရှားမျိူးချစ်တွေဟာ အနောက်အုပ်စုကို နည်းမျိူးစုံနဲ့ လှည့်စားနိုင်ခဲ့ကြတယ်လို့ ဝေဖန်ပြစ်တင်နေကြပါတယ်။ ဒါပေမယ့် ဟိုတုန်းက စတာလင်လက်ထက် လူတွေ သန်းချီသေကြေပျက်စီးခဲ့တာကို ဖုံးကွယ်နိုင်ခဲ့ကောင်းနိုင်ခဲ့သော်လည်း ဖေ့စ်ဘွတ်နဲ့ တွစ်တာခေတ်မှာတော့ဖြင့် ရုရှားတွေ ကျူးကျော်စစ်ကြောင့် လူတွေ သေကျေပျက်စီးတာကို ဖုံးကွယ်ထားလို့ မရတော့တာ အမှန်ပါ။

စီးပွားရေးလုပ်ငန်းကြီးတွေကကော ဘာထူးလို့လဲ။ လုပ်ဇာတ်သတင်းနဲ့ ပုံပြင်တွေဖန်တီးပြီး လူတွေကို လှည့်ပတ်နေရတာပဲ မဟုတ်လား။ နာမည်ကို စွဲသွားအောင် သူတို့တွေဟာ သူတို့ပုံပြင်ကို ခနခန ကြော်ငြာပေးကြရပါတယ်။ ကိုကာကိုလာကို စဉ်းစားလိုက်ရင် သင့်မျက်စိထဲ ဘာမြင်လာသလဲ။ လူငယ်တွေ ကျန်းမာရေးလိုက်စားပြီး အားကစားလုပ်နေကြ ပျော်နေကြတာပဲ မြင်ယောင်တယ် ဟုတ်။ အဲသလိုမဟုတ်ဘဲ ဆီးချိူဖြစ်နေတဲ့ အ၀လွန်လူနာတွေ ဆေးရုံကုတင်ပေါ်မှာ လဲလျောင်းနေကြတာများ မြင်မိပါသလား။ ကိုကာကိုလာတွေ အလွန်အကျွံသောက်ပြီးတော့ သင်ဟာ နုပျိုသွားမှာ မဟုတ်ပါ။ ကျန်းမာလာမှာ မဟုတ်ပါ။ သင့်ကို အားကစားထူးချွန်အောင်လည်း လုပ်ပေးမှာ မဟုတ်ပါ။ သို့သော် ဘီလျံနဲ့ချီသော စားသုံးသူတွေက အဲသည်လိုမျိုး အထင်မှားနေကြပါတယ်။ အမှန်တရားဆိုတာကတော့ ဟိုမိုဆေပီယန်တွေရဲ့ ရည်မှန်းချက်ထဲမှာ အစကတည်းက ဦးစားပေးမဟုတ်ခဲ့တာ အမှန်ပဲ ဖြစ်ပါတယ်။ လူတော်တော်များများ ထင်မြင်ယူဆထားကြတာကတော့ ဘာသာရေးတခုခု အယူဝါဒတခုခုဟာ အမှန်တရားကို မျက်ကွယ်ပြုခဲ့မယ်ဆိုရင် များမကြာခင်မှာပဲ ဗူးပေါ်သလို ပေါ်ကြရမှာ ဖြစ်တယ် ဆိုပါတယ်။ ဘာကြောင့်ဆိုတော့ သူတို့ကို ယှဉ်ပြိုင်လာမယ့် အမြင်မှန်တဲ့ပြိုင်ဘက်တွေကို အရှုံးပေးကြရမှာမို့လို့ ထင်ကြပါတယ်။ ဒါကလည်း လူတွေ ယုံနေကြတဲ့ ယုံတမ်းစကားတခုပါပဲ။

လက်တွေ့မှာကတော့ လူတွေအချင်းချင်း စုစည်းလုပ်ဆောင်လာခြင်းရဲ့ အစွမ်းသတ္တိဆိုတာ အမှန်တရားနဲ့ ပုံပြင်ဖန်တီးခြင်း ၂ ခု ကြားမှာ ချိန်ခွာညာ ညှိလို့ နေပါတယ်။ သင်ဟာ အမှန်ကို သိပ်ပြီးတော့ ပုံဖျက်ပစ်လွန်းရင် လက်တွေ့မကျတဲ့အဖြစ်ကို သင်ကိုယ့်ကိုယ်တွန်းပို့လိုက်သလို ဖြစ်သွားမှာပါ။ ၁၉၀၅ ခုနှစ်တုန်းက အာဖရိကအရှေ့ပိုင်းက ပယောဂဆရာ Kinjikitile Ngwale က သူ့ကို နဂါးမင်းက ပူးဝင်ပြီး ပြောခဲ့တယ်လို့ ကြေငြာလိုက်ပါတယ်။ ဂျာမာန်တွေရဲ့ ကိုလိုနီပြုခြင်းခံထားရတဲ့ အာဖရိကန်တွေအတွက် တော်လှန်ရေးတပ်လှန့်သံ ဖြစ်ပါတယ်။ ငါတို့အားလုံး ညီညွတ်ကြ၊ ဂျာမန်တွေကို မောင်းထုတ်ကြ တဲ့။ ပယောဂဆရာက သူ့နောက်လိုက်တွေအတွက် သေနတ်ပီးဆေးတွေ ထုတ်ပေးတယ်။ ဂျာမာန်တွေရဲ့ ကျည်ဆံတွေဟာ ရေဖြစ်ကုန်မယ်တဲ့။ အဲသည်မှာ Maji Maji ပုန်ကန်မှု ဖြစ်ပွားပါတယ်။ (maji ဆိုတာ အာဖရိကလို ရေ တဲ့။ ရေသူပုန်ထမှုပေါ့)။ တကယ်တန်း စစ်ပွဲထဲလည်းကျရော ဂျာမန်တွေရဲ့ ကျည်ဆံတွေက ရေမဖြစ်ကုန်ဘဲ လက်နက်မပြည့်စုံတဲ့ အာဖရိကန်တွေကို အညှာတာကင်းမဲ့စွာ ဖောက်ထွင်းဝင်ရောက် ဇိဝိန်တွေ ချုပ်ပစ်လိုက်ပါတော့တယ်။

တဖက်က ပြန်ကြည့်ပြန်တော့လည်း ပုံပြင်ဒဏ္ဍာရီတွေ မပါဘဲနဲ့လည်း ထိရောက်တဲ့ လူထုအုံကြွမှု ကို မဖန်တီးနိုင်ပါဘူး။ သင်ဟာ အချက်အလက်လုံးတီးနဲ့ အမှန်ကို ဆုပ်ကိုင်ပြနေရင် သင့်နောက်က လိုက်ပါသူ သိပ်မရှိနိုင်ပါ။ လုပ်ဇတ်တွေဟာ အမှန်အတိုင်းပြောတာထက် ပိုပြီးတော့ လူတွေကို စုစည်းနိုင်တယ်၊ ဆွဲဆောင်နိင်ပါတယ်။ သင်က သင့်အပေါ်လူတွေရဲ့ သစ္စာရှိမှုကို တိုင်းတာချင်တယ် ဆိုရင် လူတွေကို အမှန်ကို ပြောပြပြီး ယုံခိုင်းဖို့ထက် မဟုတ်တန်းတရားတွေကို သင်ပြောတိုင်း ယုံကြည်ကြသလားဆိုတာနဲ့ တိုင်းတာကြည့်ရမှာ ဖြစ်ပါတယ်။ အကယ်၍ ခေါင်းဆောင်ကြီးက ပြောတယ် … “နေသည် အရှေ့ကထွက်၍ အနောက်မှာ ၀င်သည်” ဟု မိန့်ကြားသည်ဆိုရင် လူတွေ လက်ခုပ်တီးထောက်ခံကြတာ သူ့ကို သစ္စာရှိကြောင်း ပြတာ မဟုတ်ပါ။ သို့သော် ခေါင်းဆောင်ကြီးက “အနောက်ကနေထွက်ပြီး အရှေ့က နေ၀င်တယ်” လို့ ပြောလိုက်တယ် ဆိုကြပါစို့။ သူ့အပေါ် သစ္စာစောင့်သိသူတွေချည်းကသာ လက်ခုတ်တီး ထောက်ခံပြကြမှာ ဖြစ်ပါတယ်။ သင့်ရပ်ကွက်ထဲကလူတွေဟာ မဟုတ်တန်းတရားကို ယုံကြည်နေကြခဲ့ရင် အရေးပေါ်အချိန်ကျရင် စိတ်သာချပါ … သူတို့တွေ အတူတကွ ထကြွလာကြမှာ ဖြစ်ပါတယ်။ လက်တွေ့ကျသော အမှန်တရား အချက်အလက်တွေချည်းကိုသာ သိရှိလက်ခံတတ်ကြတဲ့ သူတွေကို ဘာအသုံးချလို့ ရမှာလဲ။

(ဟုတ်တယ်လေ။ မြန်မာပြည်မှာဆိုရင်လည်း လူပြိန်းတွေ စည်းရုံးနိုင်တဲ့သူတွေက လှုပ်ရှားမှုတွေ ပိုလုပ်နိုင်ပါတယ်။ ပညာရှိတွေ ဗဟုသုတရှိသူတွေ အမှန်သိသူတွေကို စည်းရုံးလို့ ဘာအသုံးဝင်မှာမို့လဲ။ လူပြိန်းတွေကမှ လုပ်ဇတ်သတင်းတွေကို ယုံလည်းယုံ ဖြန့်လည်းဖြန့် ရှေ့ကနေ ချီတက်ပြီးလည်း မိုက်လုံးကြီးပြချင် ပြကြပါတယ်။)

ဒဏ္ဍာရီတွေ ပုံပြင်တွေကနေတဆင့် လှုံ့ဆော်စည်းရုံးရတာထက် လူတွေကို  လက်တွေ့ကျတဲ့ အမှန်တရား အချက်အလက်ပေါ် အခြေခံတဲ့ သဘောတူညီချက်ယူပြီး စုစည်းမှုတွေ အများကြီး လုပ်နိုင်ပါတယ် လို့ သင်က ငြင်းချက်ထုတ်ချင်မယ်။ ဥပမာ – စီးပွားရေးလောကထဲမှာ ကြည့်လိုက်ရင် ငွေကြေးနဲ့ ကော်ပိုရေးရှင်းကြီးတွေဟာ လူတွေကို သမ္မာကျမ်းစာထက် ဘုရားသခင်တွေထက် ပိုပြီး စုစည်းညီညွတ်လိုက်နာစေပါတယ်။ လူတွေက ပိုက်ဆံငွေကြေးတွေ လုပ်ငန်းအမည်နာမကြီးတွေဆိုတာ လူတွေ ဖန်တီးထားတာတွေပါလို့ သိကြပါတယ်။ အဲသည်အချက်ကို သဘောတူညီချက် ယူလိုက်တယ်။ လက်ခံပြီး အဲသည်အရာတွေနောက်ကနေ လိုက်ပါ လှုပ်ရှား လုပ်ကိုင်ကြပါတယ်။ ဘာသာရေးမှာ အမှန်ယုံကြည်တဲ့သူက သမ္မာကျမ်းစာကို အဖိုးမဖြတ်နိုင်ဘူးလို့ သူ့ဖာသာသူ ယုံကြည်တယ်။ စီးပွားရေးမှာ အမှန်ယုံကြည်တဲ့သူကတော့ သူများတွေက ဒေါ်လာကို တန်ဖိုးရှိတယ်လို့ ယုံကြည်တာကို သူလည်း လိုက်ယုံကြည်ပါတော့တယ်။ ပိုက်ဆံဆိုတာ လူတွေ ဖန်တီးထားတဲ့ အရာဝတ္ထုသက်သက်ပဲ သို့သော် တကမ္ဘာလုံးက လူတွေအားလုံးက လေးစားလိုက်နာကြပါတယ်။ ကဲ ဒါဆိုလို့ရှိရင်လည်း လူတွေက လူတွေအားလုံး လက်ခံယုံကြည်ထားတဲ့ အရာဝတ္ထုတွေဖြစ်တဲ့ ဒေါ်လာလို့ အမှတ်အသားနောက်ကိုပဲ လိုက်ကြပြီး အတိတ်က ဒဏ္ဍာရီတွေ ပုံပြင်ဆွေကို ပစ်ပယ် မေ့ပျောက်လိုက်ကြပါတော့လား။

သို့သော်ငြားလည်း လူတွေ၏ သဘောတူညီချက်ဆိုတာကလည်း ပုံပြင်ဒဏ္ဍာရီတွေနဲ့ သိပ်တော့ ကွဲပြားမှု မရှိပြန်ပါဘူး။သမ္မာကျမ်းစာနဲ့ ငွေကြေးဆိုတာ အပေါ်ယံကြည့်တော့ ကွဲသလိုလိုနဲ့ တကယ်တမ်းကျတော့ ပုံစံချင်း တူနေပြန်ပါတယ်။ လူတချို့က ငွေကြေးစက္ကူကို မြင်တဲ့အခါ တဒေါ်လာတန်ကို ကြည့်တဲ့အခါ လူတွေ တီထွင်ထားတာပါလား၊ လူတွေ သဘောတူညီချက်တခုမျှသာပါလား ရယ်လို့ မမြင်တော့ပါ။တဒေါ်လာတန်ဆိုတာ စက္ကူအစိမ်းရောင်ပေါ်မှာ ကွယ်လွန်သူ လူဖြူအဖိုးကြီးမျက်နှာ ရိုက်နှိပ်ထားတာကို မြင်တာထက် ကျော်ပြီးတော့ ဒီစက္ကူကိုယ်တိုင်မှာ တန်ဖိုးတစုံတရာ ရှိနေတယ်လို့ ယုံကြည်လာကြပါတယ်။ သည်တော့ တစုံတခုအတွင်းမှာ တန်ဖိုးတစုံတရာ ရှိနေတယ် ကိန်းအောင်းနေတယ်လို့ ယုံကြည်ခြင်း နဲ့ လူတွေဖန်တီးထားတဲ့ အရာတခုခုပဲလို့ သိရှိထားခြင်း သဘောထား ၂ခုဟာ လက်တွေ့မှာ ခေါင်းနဲ့ပန်းလို တွဲလာပါတယ်။ ခွဲခြမ်းကြည့်လို့ မရတော့ပြန်ပါဘူး။ သည်တော့ လူတွေကိုယ်တိုင်ကလည်း သည် ၂ ခုကို ခွဲမမြင်တတ်တော့ပါ။ မေ့ထားလိုက်ကြပါတယ်။ လူတွေရဲ့ ထူးခြားတဲ့ အရည်အချင်းတခုကတော့ တခုခုကို သိသလိုလိုနဲ့ မသိသလိုလို တပြိုင်နက်တည်း ဖြစ်တတ်ကြတာပါပဲ။

(ဖြည့်စွက်ချက် – ငွေကြေးကို ယုံတဲ့သူတွေကိုယ်တိုင်က ငွေကြေးတွေကို ဘာသာရေးအတွက် ပေးကမ်းခြင်းတွေ မြုပ်နှံခြင်းတွေ လုပ်ကြပါတယ်။ ဘာသာရေးကနေ အကျိူးပြန်ရနိုင်သလို ငွေကြေးသမားတွေ အချင်းချင်းကြားထဲမှာလည်း အကျိူးရတာ  ချဲ့ထွင်တာကို လုပ်ယူနိုင်ကြတယ်လို့ ယုံကြည်ကြတယ်၊ အသုံးလည်း ချကြတယ်လေ)

လုပ်ဇတ် ပုံပြင်တွေနဲ့ လက်တွေ့အခြေအနေကို ရောထွေးသွားအောင် လုပ်ကြတာဟာ ရည်ရွယ်ချက်တွေ အမျိုးမျုိး ရှိကြပါတယ်။ အချို့ကတော့ အပျော်တန်း လို့ ပြောပြီး အဲသည်ကနေ အသက်ရှင်ရပ်တည်နိုင်ရေးအထိပါ ရည်ရွယ်ထားကြပါတယ်။ သင်၏ သံသယစိတ်ကို ဘေးဖယ်ထားနိုင်မှသာလျင် ကစားပွဲတွေမှာ ၀င်ကစားနိုင်တယ်။ ၀တ္ထုတွေကို အရသာခံ ဖတ်ရှုနိုင်ပါလိမ့်မယ်။ ဘောလုံးပွဲကို အားပါးတရ အားပေးချင်တယ် ဆိုရင် ဘောလုံးကစားနည်းနဲ့ ဥပဒေသတွေကို သင် လက်သင့်ခံရမယ်၊ ပြီးတော့ မိနစ် ၉၀ လုံးလုံး ဒီဖြစ်ပျက်နေပုံတွေဟာ လူတွေ ဖန်တီးထားချက်အလိုအရ ဖြစ်နေတယ်ဆိုတာကို မေ့ထားနိုင်ရမယ်။ အဲသလို သဘောမထားနိုင်ရင်တော့ လူ ၂၂ဦး ကွင်းထဲမှာ ဘောလုံးတလုံးနောက် လိုက်လုနေကြတာကို သင်က လုံးဝ ရူးကြောင်တဲ့ အဖြစ်အပျက်လို့ မြင်နေမိတာမှာကိုး။ ဘောလုံးအားကစားဆိုတာ ပျော်ရွှင်မှုအတွက် သက်သက်အတွက် စတင်ခဲ့တာ ဖြစ်ကောင်း ဖြစ်နိုင်တယ်။ သို့သော် ဘောလုံးဟာ သည်ထက်ပိုပြီး ရေးကြီးခွင်ကျယ် ဖြစ်လာနိုင်တယ်ဆိုတာ အင်္ဂလန်က ဘောလုံးရူးတွေ အာဂျင်တီးနားက မျိုးချစ်တွေကို ကြည့်ပြီး သဘောပေါက်နိုင်ပါတယ်။ ဘောလုံးက သင်၏ အတ္တကို ပုံဖော်ပေးတယ်။ ပြီးတော့ လူစုလူဝေးကြီးတခုကို စုဝေးပေါင်းစပ်ပေးတယ်။ ပြီးတော့ အကြမ်းဖက်ကြရေးအတွက် မီးစာတခုလည်း ဖြစ်လာနိုင်တယ်။ နိုင်ငံတော်တွေ ဘာသာရေးတွေဆိုတာ အားတိုးဆေးတွေ အဆမတန်သုံးစွဲပြီး တက်ကြွနေတဲ့ ဘောလုံအသင်းတွေနဲ့ တူတယ်လို့ ပြောချင်တယ်။

(ဆက်လက်ဖော်ပြပါမည်)

 


သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ

Similar Posts