 |
| ဖေဖော်ဝါရီ လဆန်းပိုင်းက ရေဘေးဒဏ်သင့် ပွင့်ဖြူမြို့နယ်၊ စည်ပင်သာယာကျေးရွာတွင် ကူညီထောက်ပံ့ရေးအစီအစဉ်တစ်ခုမှ ရရှိထားသော ရေအိမ်တစ်လုံးကို တပ်ဆင်နေသော ဒေသခံတချို့ (ဓာတ်ပုံ – Myanmar Now) |
(မိုးမခ) မေ ၄၊ ၂၀၁၆
ယခုသတင်းဆောင်းပါးအား Myanmar Now မှ ရယူပါသည်။
ပွင့်ဖြူ (Myanmar Now) – မဝင်းသီတာစိမ့်သည် ပြီးခဲ့သည့်နှစ် သြဂုတ်လအထိတော့ ဘဝရှေ့ရေးအတွက် မျှော်လင့်ချက်ထားသူတစ်ဦးဖြစ်သည်။ သူတို့ဇနီးမောင်နှံက ဝက်နှစ်ကောင် အကြွေးဝယ်ပြီး မွေးထားသေးသည်။
ထိုသို့ ဝယ်ယူမွေးမြူပြီး တတိယမြောက်နေ့တွင် သူနေထိုင်ရာ မကွေးတိုင်းဒေသကြီး ပွင့်ဖြူမြို့နယ်၊ မုန်းချောင်းဘေးမှ စည်ပင်သာယာရွာသည် ရေဘေးနှင့် ရုတ်တရက် ရင်ဆိုင်လိုက်ရခြင်းကြောင့် နေအိမ်ပါ နစ်မြှုပ်သွားပြီး မွေးမြူစ ဝက်နှစ်ကောင်လည်း ရေထဲသို့မျောပါသွားသည်။
“အဲဒီအချိန်တုန်းက ကိုယ်ဝန်ကလည်း ရင့်မာနေတဲ့ အချိန်၊ ရေကလည်း တရှိန်ထိုးတက်လာတဲ့ အခါကျတော့ ဘာပစ္စည်းမှ ယူချိန်မရလိုက်ဘူး” ဟု ၂၃ နှစ်အရွယ် မဝင်းသီတာစိမ့်က ပြောသည်။
ရေကြီးပြီးရှစ်လကြာပြီဖြစ်သော်လည်း နေအိမ်အသစ် ပြန်လည်တည်ဆောက်နိုင်ခြင်းမရှိသေးခြင်းကြောင့် ရွာထဲမှ မိခင်အိမ်တွင်ပင် သူတို့ သောင်တင်နေသည်။ စည်ပင်သာယာရွာသည် ပြီးခဲ့သည့်နှစ်က နိုင်ငံတွင်း ရေဘေးဒုက္ခကြုံခဲ့ရသည့်ဒေသများအနက် တစ်ခုဖြစ်သည်။
နိုင်ငံအနှံ့ ၂ဝ၁၅ ဇွန်၊ သြဂုတ်လတို့တွင် ရေဘေး အန္တရာယ်ကျရောက်ခဲ့ရာ စစ်ကိုင်း၊ မကွေး၊ ချင်း၊ ရခိုင်တို့သည် အဆိုးရွားဆုံးခံစားရသည့် ဒေသများဖြစ်ကြောင်း၊ ရိက္ခာ၊ အရေးပေါ်အစားအစာ၊ သေဆုံးမှုထောက်ပံ့ကြေး၊ အိမ်ဆောက်ပစ္စည်း၊ ကယ်ဆယ်ရေး ပစ္စည်း တို့အတွက် စုစုပေါင်းတန်ဖိုးငွေကျပ် ၆၈၅ သန်းဖိုး ကူညီပြီးဖြစ်ကြောင်း ၂ဝ၁၅ သြဂုတ် ၂၇ ရက်နေ့ အစိုးရထုတ်ပြန်ချက်တွင် ဖော်ပြထားသည်။ ရေဘေးကြောင့် သေဆုံးသူ ၁၂ဝ အနည်းဆုံး ရှိပြီး အိမ်ထောင်စု ၄ သိန်းကျော် ထိခိုက်သွားသည်ဟု ဆိုသည်။
နိုင်ငံတကာ ကူညီရေးအဖွဲ့များက အရေးပေါ်ကယ်ဆယ်ရေးလုပ်ငန်းအများအပြား ဆောင်ရွက်ခဲ့ပြီး ပြန်လည်ထူထောင်ရေးလုပ်ငန်းများလည်း လုပ်ကိုင်ခဲ့သည်။ ကုလသမဂ္ဂအဖွဲ့ခွဲများကလည်း ကြေညာချက်များ ထုတ်ပြန်ရာတွင် ကမ္ဘာ့စားနပ်ရိက္ခာအဖွဲ့က ၂ဝ၁၆ နှစ်လယ်ပိုင်းအထိ လူ ၁ဝ၄,ဝဝဝ အတွက် အကူအညီ၊ စားနပ်ရိက္ခာနှင့် စိုက်ပျိုးရေးအဖွဲ့က လယ်သမား၊ ရေလုပ်သား ၁၅ဝ,ဝဝဝ ဝန်းကျင်အတွက် အထောက်အပံ့များ ပေးမည်ဟု မတ်လတွင် ကြေညာထားသည်။
ရေဘေးသင့်သူတို့ မူလအခြေအနေပြန်ရောက်နိုင်ရေးအတွက် ရိက္ခာနှင့်အကူအညီ ဆက်လက်ထောက်ပံ့မည့် နည်းလမ်း ရှာဖွေစီစဉ်ရန် အစိုးရနှင့် အကူအညီပေးရေးအဖွဲ့များကို တိုက်တွန်းကြောင်း ကြေညာချက်တွင် ဖော်ပြထားသည်။ အကြံပြုချက်ထဲတွင် ရေဘေးသင့်သူတို့ ရိက္ခာဝယ်ယူရန် ငွေကြေးထောက်ပံ့မှု၊ ရေလုပ်ငန်းနှင့် စိုက်ပျိုးမွေးမြူရေးအကူအညီ ပေးအပ်ရန်တို့လည်း ပါဝင်သည်။
မဝင်းသီတာစိမ့်ကဲ့သို့သော သဘာဝဘေးအန္တရာယ်နှင့် ကြုံခဲ့ရသူများကမူ လုပ်ငန်းပြန်လည်ထူထောင်ရေးအတွက် အကူအညီလိုအပ်ဆဲဖြစ်ကြောင်း ပြောကြသည်။
“မွေးမြူရေးလုပ်ငန်းတော့ ပြန်လုပ်ကိုင်ချင်တယ်” ဟု မဝင်းသီတာစိမ့်က ဆိုသည်။
● လိုအပ်ချက်များ
ပွင့်ဖြူမြို့နယ် မြို့နယ် အုပ်ချုပ်ရေးမှူးရုံး၏ မှတ်တမ်းများတွင် ရပ်ကွက် ၄ ခု၊ မုန်းချောင်းဘေးမှ ၂ဝ၅ ရွာတို့ ရေနစ်မြှုပ်သွားခဲ့ကြောင်း ဖော်ပြထားသည်။ အိမ်ခြေ ၃၅၅ လုံး၊ စာသင်ကျောင်း ၁၂ ကျောင်း၊ ဆေးရုံ ၂ ခု နှင့် တိရစ္ဆာန်မျိုးစုံ ၁၇, ၉၅၁ ကောင် ထိခိုက်ပျက်စီးသွားသည်။
မဝင်းသီတာစိမ့်ကဲ့သို့ပင် စည်ပင်သာယာရွာတွင်နေထိုင်သည့် ဦးအောင်ကြည်တို့မိသားစုလည်း နေအိမ်ပြိုကျပျက်စီးခြင်း၊ ကြက်အကောင်ရေ ၃ဝ ကျော် ရေထဲမျောပါသွားခြင်းတို့နှင့် ကြုံခဲ့ရသည်။
 |
| ရေဘေးဒဏ်သင့် ပွင့်ဖြူမြို့နယ်၊ စည်ပင်သာယာကျေးရွာမှ ပျက်စီးနေသော နေအိမ်ပေါ်သို့တက်နေသည့် ဒေသခံ အမျိုးသမီးကြီးတစ်ဦး (ဓာတ်ပုံ – Myanmar Now) |
“အရင်က မိသားစု ၆ ဦးရဲ့ စားဝတ်နေရေး လောက်ငှတယ်။ အခုကျတော့ သူများဆီမှာ နေ့စားလုပ်နေရတော့ အဆင်မပြေ ဘူး” ဟု အသက် ၆ဝ အရွယ် ဦးအောင်ကြည်က ပြောသည်။ နေ့စားလုပ်ခ ကျပ် ၁,ဝဝဝ ခန့်သာရသည်ဟု ဆိုသည်။
တစ်ရွာတည်းနေ ၄၄ နှစ်အရွယ် ဒေါ်အေးကလည်း လယ်ထဲရောက်နေသည့် သဲနုန်းတို့ကို ဖယ်ရှားနိုင်မည့် ခေတ်မီစက် ကိရိယာများ မရှိကြောင်း ရှင်းပြသည်။
“နေဖို့အဆင်မပြေသေးသလို လုပ်ကိုင်စားသောက်ဖို့ကျတော့လည်း လယ်တွေ၊ ကိုင်းတွေက သုံးစားလို့မရတော့ပါဘူး” ဟု ၎င်းကပြောသည်။
ဒေါ်အေးက သီးနှံ ပြန်လည်စိုက်ပျိုး လုပ်ကိုင်စားသောက်နိုင်သည့်အနေအထားသို့ ပြန်ရောက်လိုသည်ဟု ပြောသည်။
ဥယျာဉ်ကျစ်အုပ်စု၊ ရှောက်တောတောင်ကွက်သစ်ရွာ နှင့် မုန်းချောင်းကြားတွင် နေထိုင်သူများသည်လည်း မုန်းချောင်းထဲသို့ ၎င်းတို့၏ခြံမြေ ၁ဝ ပေနီးပါး မျောပါသွားကြောင်း ကမ်းနံဘေးတွင် နေထိုင်သည့် မဖြိုးမွန်မွန်က ပြောသည်။
“အခုနောက်ပိုင်း မိုးရွာရင် အိပ်ကိုမအိပ်ရဲဘူး။ ညလုံးပေါက် အလင်းငုတ်တုတ် ထိုင်နေရတယ်။ အိမ်ထဲမှာ နေဖို့လည်း စိတ်မချရ၊ လုပ်ငန်းလည်း ထွက်မလုပ်ရဲဘဲ ဒီအန္တရာယ်များတဲ့ ချောင်းဘေးနားမှာပဲ မရွှေ့နိုင် မပြောင်းနိုင် ဖြစ်နေရတယ်။ ရွှေ့စရာလည်း မြေနေရာ မရှိဘူး” ၎င်းက ရှင်းပြသည်။
● အကူအညီ
မကွေးတိုင်းဒေသကြီးလွှတ်တော်ကိုယ်စားလှယ် တစ်ဦးဖြစ်သည့် ဦးနေမျိုးကျော်က ရေဘေးသင့်သူတို့သည် စက်ကိရိယာ နှင့် အရင်းအနှီး လိုအပ်ချက်များကြောင့် လယ်ယာလုပ်ငန်းခွင်သို့ ပြန်လည် ဝင်ရောက်နိုင်ခြင်း မရှိသေးသဖြင့် အကူအညီပေးရာတွင် လက်မှုလယ်ယာမှ စက်မှုလယ်ယာသို့ ပြောင်းလဲရန်လည်း အစိုးရနှင့် နိုင်ငံတကာအဖွဲ့အစည်းများက တစ်ပါတည်း ကူညီသင့်သည်ဟု သုံးသပ်သည်။
သဘာဝပတ်ဝန်းကျင်ထိန်းသိမ်းခြင်း၊ သဘာဝဘေးကာကွယ်ခြင်း လုပ်ငန်းများကို ဦးစားပေးသည့် ၎င်းတို့၏ပါတီ အမျိုးသားဒီမိုကရေစီအဖွဲ့ချုပ်တွင်လည်း ရေဘေးသင့် ဒေသ ပြန်လည် ထူထောင်ရေးလုပ်ငန်းများ ပြုလုပ်ပေးရန် အစီအစဉ်ရှိကြောင်း ရှင်းပြသည်။
ပြည်ထောင်စုအစိုးရ ရန်ပုံငွေ၊ တိုင်းဒေသကြီး ဖွံ့ဖြိုးတိုးတက်ရေး ရန်ပုံငွေများကို ထိခိုက်နစ်နာသည့် ဒေသများသို့ ပိုမို ပေးအပ်ရန် တိုက်တွန်းမည်ဟု သူက ဆိုသည်။
“ဘတ်ဂျက်ဘယ်လောက်ပမာဏအထိ သုံးနိုင်လဲနဲ့နည်းပညာပံ့ပိုးမှု ဘယ်လောက်ရှိလဲ ဆိုတာကတော့ ကျွန်တော်တို့ အတွက် စိန်ခေါ်မှုတွေပါပဲ” ဟု လွှတ်တော်ကိုယ်စားလှယ်က ပြောသည်။
စည်ပင်သာယာရွာမှ ဒေါ်အေးက ရေကြီးရေလျှံဖြစ်ပွားမှု အချိန်တွင်သာ ကူညီထောက်ပံ့မှုများ ရရှိပြီး ယခုအခါ မည်သူကမျှ အကူအညီပေးအပ်ခြင်း မရှိကြောင်း ပြောပြသည်။
“အခုချိန်မှာ အစိုးရကိုပဲ အားကိုးရမလိုလို နိုင်ငံတကာ အဖွဲ့အစည်းကိုပဲ အားကိုးရမလိုလိုနဲ့ နောက်ဆုံးမှာတော့ ဘယ်သူ့ကိုမှ အားကိုးမရတဲ့ အဖြစ်မျိုး ဖြစ်နေတာ” ဟု သူကပြောသည်။
ရေဘေးကူညီကယ်ရာတွင် တိုင်းဒေသကြီးအတွင်းရှိ အရပ်ဘက်အဖွဲ့အစည်းများကလည်း အရေးပါသည့် အခန်းကဏ္ဍတွင် ရှိခဲ့သည်။ အစောပိုင်းကာလတွင် ဒေသအသီးသီးမှပြည်သူများ၊ အသင်းအဖွဲ့များက ရေဘေးသင့်ပြည်သူများအတွက် ရန်ပုံငွေရှာဖွေရေးလုပ်ငန်းများကို အကြီးအကျယ် ပြုလုပ်ခဲ့သည်။
ယခုအခါ ဘဏ္ဍာငွေ အခက်အခဲကြောင့် ပြန်လည်ထူထောင်ရေးလုပ်ငန်းများ မပြုလုပ်ပေးနိုင်တော့ကြောင်း ဧရာဝတီမြစ် အနောက်ဘက် ဖွံ့ဖြိုးတိုးတက်ရေးအင်အားစုအဖွဲ့ တာဝန်ခံ ဦးသန့်စင်က ပြောသည်။
“ငွေအင်အားနဲ့ မကူညီနိုင်ပေမဲ့ မကွေးတိုင်းအတွင်းက လက်လှမ်းမီသမျှရွာတွေရဲ့ လိုအပ်တဲ့ စာရင်းတွေကို ကောက်ယူလျက်ရှိ ပါတယ်” ဟု ဦးသန့်စင်က ဆိုသည်။
တိုင်းဒေသကြီး လွှတ်တော်ကိုယ်စားလှယ် ဦးနေမျိုးကျော်က ရေဘေးသင့်ပြည်သူများ ပြန်လည်ထူထောင်ရေး မလုပ်နိုင်သေးသည့် အကြောင်းအရင်းမှာ အရင်းအနှီးမရှိသောကြောင့်ဖြစ်သည်ဟု ဆိုသည်။
“ပုဂ္ဂလိက ဒါမှမဟုတ် အစိုးရသစ်ကနေ အတိုးနည်းတဲ့ နှစ်ရှည် ချေးငွေလုပ်ငန်းတွေ လုပ်ပေးဖို့လိုပါတယ်။ အဲဒီလို လုပ်ပေးခြင်းအားဖြင့် အခက်အခဲအားလုံးကို ဖြေရှင်းမပေးနိုင်ရင်တောင် သူတို့အနေနဲ့ အနည်းငယ်ပြေလည်မှုရသွားမယ်လို့ ထင်ပါတယ်” ဟု ဦးနေမျိုးကျော်က ပြောသည်။ ။