ဝင်းအောင်ကြီး(မောင်အောင်မွန်) – အမှောင်ခွင်းလို့ အလင်းဆောင်တာ ဘာသာပြန်စာပေဗိမာန်
ကျနော်တွေးမိသလို ရေးပါမည် (၇၁) စီးရီး၊ ၀င်းအောင်ကြီး ဖေ့စ်ဘွတ်
(မိုးမခ) အောက်တိုဘာ ၁၉ ၊ ၂၀၁၅
ဘ၀တက္ကသိုလ်စာအုပ်တိုက်က စာအုပ်များမြင်တော့ နားထဲမှာ “ အမှောင်ခွင်းလို့ အလင်းဆောင်တာ ဘာသာပြန် စာပေဗိမာန် “ လို့ ကြားယောင်လာပြီး၊ မြန်မာတွေ ကမ္ဘာကိုသိအောင် စာအုပ်ကောင်းတွေ ဘာသာပြန်ထုတ်ဝေးပေးခဲ့တဲ့ ကျေးဇူးလည်းသတိရလိုက်ပါတယ်။ ၁၉၄၇ ခု၊ သြဂုတ်လ ၂၆ ရက်နေ့မှာ တည်ထောင်တဲ့ မြန်မာနိုင်ငံ ဘာသာပြန်အသင်း ဥက္ကဋ္ဌ ဦးနုနဲ့ ဓာတ်ပုံထဲမှာ ဒေါက်တာထင်အော်၊ ဇော်ဂျီ၊ မင်းသုဝဏ်၊ ပါမောက္ခ ဦးအေးမောင်နဲ့ ဦးမျိုးမင်း၊ ဦးခင်ဇော်( K) ၊ ဦးသန့် စသဖြင့် ကြည့်၊ ဘယ်လောက်အားကောင်းလဲ။ ၁၉၄၉ ခု စပြီး အကောင်းဆုံးဝတ္ထုကို စာပေဗမာန် ၁၀၀၀ိ ဆုချီးမြှင့်တယ်။ ဗမာလိုပဲတတ်သူတွေအတွက် သိမှတ်ဖွယ်ရာ ကမ္ဘာ့စာပေအနှစ်တွေ ဘာသာပြန်ထားတာပါ။
ဦးသန့်ရဲ့ ပြန်ကြားရေးဌာနက ကျေးလက်တောရွာများအထိ စာကြည့်တိုက်တွေဖွင့်ကာ စာအုပ်တွေပို့၊ လူတွေသိကြဖတ်ဖြစ်ကြဖို့ ဦးခင်ဇော်က ရေဒီယိုကနေ သီချင်းလေးနဲ့နှိုးဆော်ပေးတယ်။ ဖွင့်လျက်စာအုပ် အမှောင်စာမျက်နှာကို ကလောင်တံက ဖြတ်လိုက်တော့ လင်းသွားပုံဟာ အသင်းထုတ်စာအုပ်ရဲ့ သင်္ကေတ။
ဆရာဇော်ဂျီဟာ ဗေဒါလမ်းကဗျာများ၊ မဟာဆန်ချင်သူပြဇာတ်တို့သာမက ပလေတို၏အတွေးအခေါ်များကို၊ ဆရာမင်းသုဝဏ်ကလည်း လီယာဘုရင်ကြီးကို ဘာသာပြန်ခဲ့ကြတယ်။ အင်္ဂလိပ်စာပါမောက္ခ ဦးမျိုးမင်းက နွယ်စိုးနာမည်နဲ့ ဗမာလိုအရေးကောင်းသလို ပါမောက္ခ ဦးဧမောင်က Burma Research Journal မှာ အင်္ဂလိပ်လိုရေးနေသူပါ။ သခင်ဘသောင်း ဘာသာပြန်ပေးလို့ တထောင့်တည ပုံပြင်တွေ ကျနော်တို့မိဘများ လက်ထက်ကတည်း ရင်းနှီးခဲ့ပြီ။ ကျနော် ၅ တန်းတုန်းက ဗိုလ်အေးမောင် ဘာသာပြန်တဲ့ Adventure of Tom Sawyer စာအုပ် အတန်းထဲခိုးဖတ်တာ ဆရာမိသွားလို့ ၅ မိနစ်မတ်တတ်ရပ်ဒဏ်ပေးခံရဖူးတယ်။ ဒဂုန်ရွှေမျှား၊ ရွှေဥဒေါင်း တို့လိုဘာသာပြန် ဆရာကြီးတွေရဲ့ ကျေးဇူးကြောင့် အဲဒီခေတ်က စာဖတ်သူတွေ အမြင်ကျယ်ကြ။
၁၉၄၈ ခုမှာ ဘာသာပြန်အသင်းက Sir J. Hamilton ရဲ့ Encyclopedia ၁၀ တွဲ ဘာသာပြန်နေတာကို ရပ်လိုက်ပြီး မြန်မာ့စွယ်စုံကျမ်းကြီးကို ပြုစုထုတ်ဝေခဲ့တယ်။ စာပေအဆင့်မြင့်ရေး၊ လူတွေစာဖတ်ကြရေး စတဲ့ ကောင်းမြတ်စိတ်ထားသက်သက်နဲ့ အမှောင်ခွင်းအလင်းဆောင် ဆိုတာလိုက်ဖက်ပါဘိ။ စာရေးဆရာအသင်းရဲ့ နတ်သျှင်နောင်ပြဇာတ်အတွက် ဂီတနက်သန် ကိုစောညိန်းစပ်တဲ့ “ ရာဇ၀င်အမှောင်မှာ တန်ဆောင်ဆီမီးပမာ စာပေအမွေအနှစ်ပါ —“ ဆိုတာလည်းကြိုက်လို့ စာဖတ်သူလူငယ်တို့ အမှောင်ကထွက် အလင်းဘက်ကြည့်ဖို့ ကျနော်တို့ဖြတ်သန်းခဲ့ပုံ မျှဝေလိုက်တာပါ။
၂၀၁၅ ခု၊အောက်တိုဘလ ၁၈ ရက်။
သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ
