ကိုသန်းလွင် – အစိုးရ၏ပြည်သူသို့တင်ရှိနေသောကြွေး
(မိုးမခ) ဧပြီ ၂၉ ၊ ၂၀၁၅
(၁)
၁၉၆၂ ခုနှစ်တွင် မြန်မာတပ်မတော်က အာဏာသိမ်းသည်ဟု ဆိုခါ တိုင်းပြည်က ရွေးချယ်တင်မြှောက်ထား သည့် အစိုးရအဖွဲ့ ကိုထောင်ချပစ်ခဲ့ပါသည်၊ တိုင်းပြည်ကိုကယ်တင်ရန်ဟုကြွေးကြော်ပြီး နိုင်ငံတော်၏ အုပ်ချုပ်ရေး၊ တရားစီရင် ရေး၊ ဥပဒေပြုရေး၊ စီးပွားရေး၊ ကိစ္စ အ၀၀ကိုတာဝန်ယူခဲ့ပါသည်၊ တိုင်းပြည်၏အုပ်ချုပ်ရေးယန္တရားကြီး တခုလုံးတွင် နေရာအနှံ့ ရာထူးအဆင့်ဆင့်တို့၌ စစ်သားများနှင့် အစားထိုးတာဝန်ပေး ခဲ့ပါသည်၊ တသွေး၊ တသံ၊ တမိန့် ဖြင့် အထက် စစ်ဗိုလ်ချုပ်များက ချမှတ်လိုက်သော အမိန့် ကိုအောက်ခြေမှ တသဝေမတိမ်း လိုက်နာကြရပြီး ထိုသို့ မလိုက်နာသူ များမှာ ရာထူးမှဖယ်ရှားခြင်း၊ အပြစ်ပေးခံရခြင်းများ ကိုကြုံကြရပါသည်၊
ယခုအခါ ဒီမိုကရေစီအစိုးရဟုကြေညာကာ ယခင်နည်းများအတိုင်း ဆက်လက်အုပ်ချုပ်ရန်ကြိုးစားနေကြပါသည်၊ နှစ်ပေါင်း(၅၀) ကျော်မျှ စစ်တပ်အစိုးရ အဆက်ဆက် အုပ်ချုပ်ခဲ့ကြခြင်း၏ အကျိုးရလာဒ်ကိုယနေ့ မြန်မာပြည် အခြေ အနေများကိုကြည့်ပြီး၊ သုံးသပ်အကဲဖြတ်နိုင်ကြပါသည်၊ အဖက်ဖက်ကအားရ ဂုဏ်ယူစရာမရှိပါ၊ နေပြည်တော်တွင် ကြီးမားခန့်ညားသော အဆောက်အဦးကြီးများဆောက်လုပ်ကာ အ၀တ်အစား သစ်သစ် လွင်လွင်ဖြင့် ကိုယ်စားလှယ်တော် ကြီး များ၊ တိုင်းပြည်ရေးရာများကို ဆွေးနွေးနေကြသော်လည်း ပြည်သူပြည်သား အများစုမှာ ဆင်းရဲတွင်း သံသရာ တွင်တ၀ဲဝဲလည်နေကြရဆဲဖြစ်ပါသည်။
အုပ်ချုပ်သူအာဏာပိုင်များက မိမိဖါသာ ခရိုနီဟူသော လူတန်းစားကို ဖန်တီးပြီး ထိုသူတို့မှတဆင့် မိမိအိပ်ထည်းသို့ ပိုက်ဆံဝင်လာအောင်လုပ်ကြရပါသည်၊ ခရိုနီ သူဌေးကြီးတဦးက “သူအိမ်ဆောက် မပေး ဘူး သော ၀န်ကြီးမရှိပါ” ဟုပြောနေသံကို ကြားရဘူးသည်၊ ထိုစကားသည် အဘယ်မျှ မှန်သည်ကို ကျွန်တော် မသိပါ၊ သို့ပေမဲ့ မြန်မာနိုင်ငံ စီးပွားရေးမှာ ခရိုနီ စီးပွားရေး ဟု ခေါ်ရလောက် အောင် ခရိုနီများနှင့် ကြီးစိုးနေသေည် မှာ အထင်အရှားပင် ဖြစ်ပါသည်၊
တိုင်းပြည်မှာ ခြစားအကျင့်ပျက် ၀န်ထမ်းတွေကို တွေ့နေရဆဲဖြစ်ပါသည်၊ ခြစားတတ်သော ၀န်ထမ်းများ၏ အကျင့် ပျက်လုပ်ရပ်ကို တွေ့ရှိပြီဆိုသည်နှင့် စစ်ဆေး၊ အပြစ်ပေးရုံသာဖြစ်ပါသည်၊ ယခင်အစိုးရခေတ်က ခိုးဝှက်ပြီးချမ်းသာ သူတွေကို အပြစ်မပေးနိုင်ဘူးဆိုစေ ယခုအချိန်မှစပြီး ကာကွယ်တာဆီး အပြစ်ပေးမည်ဆိုလျင် နှစ်ပေါင်းအနည်း ငယ် အတွင်း ခြစားအကျင့်ပျက်မှုတွေ ပပျောက်သွားရပါမည်၊
သို့ပါလျက် ခိုးဝှက်သူ ခြစားအကျင့်ပျက်သူများကို အစိုးရကဖမ်းဆီခြင်းမရှိ၊ စစ်ဆေး အပြစ်ပေးခြင်းမရှိ၊ ဆိုင်ရာပိုင်ရာ တွေနှင့် အကျင့်ပျက်ဝန်ထမ်းတွေကို လစ်လျူရှုထားခြင်းမှာအစိုးရ၏တာဝန်ပျက်ကွက်မှုသာဖြစ်ပါသည်၊
ပြည်သူတို့ခံစားရသော အခြေအနေမှာ တိုးတက်မှုမရှိ၊ တိုင်းပြည်ကြီးဖွံ့ဖြိုးတိုးတက်မှု မရှိရခြင်းမှာ အုပ်ချုပ်သောအစိုးရ တွင် တာဝန်ရှိပါသည်၊ ပြည်သူတို့ အပေါ် အခြေအနေကောင်းတွေ ဖြစ်ပေါ်စေရန် စစ်အစိုးရအဆက်ဆက်မှာ တာဝန်ရှိခဲ့ ပါသည်၊ အစိုးရများအနေဖြင့် ပြည်သူတို့အပေါ်အကြွေးတွေ တင်ရှိနေပါသည်၊ ထိုကြွေးတွေကို ပေးဆပ်ရန်၊ ပြည်သူ တို့ လူနေမှု အဆင့်မြင့်မားလာအောင် ဆောင်ရွက်ပေးရန် လိုအပ်နေပါသည်၊
(၂)
မကြာသေးမီက ရန်ကုန်တွင် တက္ကစီမောင်းသူ တစ်ယောက်နှင့် ကျွန်တော်စကားပြောရသည်၊
“ အဆိုးဆုံးကတော့ လမ်း တွေပေါ်မှာ ကူညီရိုင်းပင်းချင်တဲ့စိတ် ပျောက်သွားတာဘဲဆရာ တခုခုဖြစ်ကြည့် လူတွေက၀ိုင်းကြည့်ပြီး ရှောင်သွားကြ တာဘဲ၊ ရဲနှင့် မပတ်သက်ချင်ကြတာဘဲဆရာ ’’
“ ပြဿနာ ဖြစ်လို့ကတော့ ဟန်းဖုန်းတွေနဲ့ခေါ်၊ တာဝန်ရှိတယ်ဆိုတဲ့ လူကြီးက ယူနီဖောင်းအပြည့်နဲ့ ရောက်လာတာဘဲ သူက သူ့လူဘက်ကနေဆုံးဖြတ်မှာဘဲ၊ နားမလည်လို့ကတော့ခံပေတော့”
မြန်မာတ်ို့၏ ဖြူစင်လှစွာသော ကူညီရိုင်းပင်းတတ်သည့် စိတ်သည် အလွန်ထူးခြားသည့်စိတ်ဖြစ်ပါသည်၊ ဖော်ရွေပျူငှာ သော မြန်မာတို့၏ စိတ်နေသဘောထားမှာ ကမ္ဘာကြီးတစ်ခုလုံးက သတိပြုမိရသောအရာ များဖြစ်ပါသည်၊ ယခု ထိုလှပသော မြန်မာ တို့၏ စိတ်နေသဘောထားသည် ပျောက်ဆုံးသွားပြီလော ဟုတက္ကစီဆရာက ငြီးတွားသည်၊ သူ့တွေ့ဖူးသောလမ်းပေါ်မှ ကား Accident ပြဿနာများ အကြောင်း ကျွန်တော်ကို ပြောပြနေပါသည် ။
ထို့ပြင် ’’တစ်ခါတုန်းက ယုဇနပလာဇာရှေ့လမ်း၊ ကား ကြပ်နေလို့နောက်ဖက် ကွေ့လမ်းက ၀င်မိပါတယ်၊ လမ်းပေါ်မှာ ကားတစ်စီးက ပိတ်ရပ်ထားပြီးလူက ပျောက်သွားတော့ ကျွန်တော့် မှာ ရှေ့တိုးမရ နောက်ဆုတ်မရနဲ့ ကားပေါ်မှာ ၂နာရီလောက်ဒုက္ဒခံ လိုက်ရတယ်” ဟုဆိုသည်။
ကားလမ်းကိုပိတ်ပြီးရပ်ထားသောကားကို ဖယ်ရှားရန်၊ ထိုဒရိုင်ဘာကိုပညာပေးရန်၊ လမ်းကိုရှင်းပေးရန် ဘယ်သူတွေမှာ တာဝန်ရှိပါသနည်း၊ အုပ်ချုပ်ရေးစံနစ်ကြီးကို တာဝန်ယူထားသူတို့၌ ထိုကဲ့သို့သော အရေးပေါ်အခြေအနေတွေကို ပြုပြင်ရန် နည်းလမ်းတွေမရှိပြီလော၊ နေကကျဲကျဲတောက်ပူနေသည်၊ ကားအပြင်ကိုမထွက်ရဲ ကားတွေကမရွေ့၊ ထိုအရာ တွေကို လောကငရဲဟုအချို့ကခေါ်ကြသည်၊ အမှန်မှာလူကဖန်တီးသော ပြဿနာတွေ မဖြစ်စေရန် ၊ဖြစ်လာလျင် ဖြေရှင်းရန် နည်းလမ်း တွေကို တာဝန်ရှိသူတွေက စီမံထားရှိရပါမည်။
(၃)
ကျွန်တော့်တွင်တူမတယောက်ရှိရာ ခုနှစ်တန်းတွင် မြို့နယ်လူရည်ချွန်အရွေးခံရပါသည်၊ သူ့ကို သူ့မိဘတွေက အစိုးရ ကျောင်းမှ နှုတ်ပြီး ရေဦးရှိ အလွတ်ပညာသင်ကျောင်းဘော်ဒါသို့ ထားရန် စီစဉ်နေကြပါသည်၊ ထိုဘော်ဒါကျောင်းက သမီး ဖြစ်သူကို လက်ခံရန် ကျောင်းဝင်ခွင့် စာမေးပွဲဖြေဆိုခွင့် ရရေးအတွက် ကျပ် တသိန်းပေးသွင်းရပါသည်၊ အရွေးမခံရပါက ထိုငွေ ကိုပြန်မပေးတော့ပါ၊ ကျွန်တော်တို့ ရ တန်းကျောင်းသားဘ၀က အစိုးရ အထက်တန်းကျောင်းသည်သာ တခုတည်း သော ပညာသင်ရာဌာနဖြစ်ပါသည်၊ အခုမိဘတွေက ငွေကုန်ကြေးကျ ကြီးစွာခံ၍ အပြင်ကျောင်းမှာထား ကြရခြင်းဖြစ်ပါ သည်၊ သူတို့ရင်ထဲမှာ ဘယ်လိုရှိမည်မသိ၊ အစိုးရကျောင်းက နှုတ်ရမှာဆိုတော့ အဖိုးဖြစ်သူ ကျွန်တော့်မှာ ဘယ်လိုမှ စိတ်က မကောင်းနိုင်၊ အစိုးရကျောင်းကို အားမကိုးရသော အခြေအနေမှာ ၀မ်းနည်းစရာကောင်းသည်၊
မန္တလေးမြို့နေ နောက်ထပ်တူမတယောက်မှာ ရ တန်းအထိ အပြင် ပရိုက်ဗိတ် ကျောင်းမှာနေခဲ့သည်၊ အင်္ဂလိပ်စာကို အထူးပြု သင်ကြား သောကျောင်းဖြစ်သည်၊ အခု သူတို့က ဆယ်တန်းအောင်လျင် ဆရာဝန်လိုင်းကို ရနိုင်ရန် အစိုးရကျောင်း ကိုပြောင်းပြီး ထားကြမည်ဟုဆိုသည်၊ ပဌမ တူမနှင့် ဗြောင်းပြန်လိုက်နေသော ဆရာဝန်ဖြစ်ချင်သည့် ကလေး၏မိဘများက ဘယ်လို တွေးသည် ကျွန်တော်နားမလည်၊ ကျွန်တော်ကတော့ မယုံစားရသော ပညာရေးစံနစ်ကြီးကို သာအပြစ်ဖို့ မိ တော့သည်၊
ကျွန်တော်တို့ နိုင်ငံတွင် အများလေးစားလောက်သည့် ပညာသင်ရာဌာနကြီးများ မရှိတော့သည့်နည်းတူ အများက အားကိုး ရသည့်ပညာရေးစံနစ်ကြီး မရှိတော့သည်မှာလည်း အများသိဖြစ်ပါသည်၊ အစိုးရ က ပညာရေး ဆိုင်ရာ ဌာနများ တွင် စစ်ဗိုလ်တွေကို နေရာပေးခါ လုပ်ချင်သလို လုပ်ခဲ့ကြပြီး ရလာဒ်မှာ လူငယ် လူရွယ် ကျောင်းသားများ ကို ပညာတတ် ကလေး များဖြစ်အောင် ပညာသင်မပေးနိုင်တော့ခြင်းပင် ဖြစ်ပါသည်၊ လူငယ် ကလေးများမှ ခေါင်းဆောင်ကောင်း၊ မန်နေဂျာကောင်းများ မမွေးထုတ်နိုင်တော့ခြင်းပင်ဖြစ်သည်၊ စက်ရုံအလုပ်ရုံများအတွက် အင်ဂျင်နီယာကောင်းများ ရှားပါးသွားခြင်းပင်ဖြစ်သည်၊
ကျန်းမာရေးဆိုင်ရာ ကိစ္စများတွင်လည်း အခြေအနေမှာ အားရှိစရာဘာမှမရှိ၊ အစိုးရ ဆေးရုံဆေးခမ်းများမှာ ရံပုံငွေ မလုံ လောက်မှု နှင့် ကိုယ်သုံးရမည့် ပါတ်တီးကို လူနာတွေက အပြင်မှ ၀ယ်လာကြရပါသည်၊ ထိုပြဿနာတွေ ကိုဖြေရှင်း ရန် နည်းလမ်းတွေ မရှိတော့ပြီလော၊ ခေါင်းဆောင်ကြီးတွေကအစ ဖြစ်ပြီဆိုသည်နှင့် နိုင်ငံခြားဆေးရုံ တွေကို သာ အားကိုး နေရခြင်းမှာ မြန်မာ့ဆေးလောက ၏ချို့ယွင်းနေမှုကိုပြပါသည်၊ ကျွန်တော်သိသော ဆရာဝန်ဘွဲ့ရ တယောက် မှာ ကျောင်းပြီး ကတည်း က အီလက်ထရောနစ်ပစ္စည်းတွေ ရောင်းနေလေသည်၊
တရားစီရင်ရေးကိစ္စတွေမှာလည်း စိတ်ပျက်ဖွယ်ရာများကိုသာ တခုပြီးတခုကြားနေရပါသည်၊ကျောင်းသားတွေက ဆန္ဒထုတ်ဖေါ်သည်၊ တာဝန်လက်ပါတ်နီနှင့် လူများက ထိုကျာင်းသားတွေကို ရိုက်နှက် နှိမ်နင်းရန် ဘယ်သူက စီစဉ်လိုက် သည်မသိ၊ ထိုအကြမ်းဖက်မှုတရားခံကို ထုတ်ဖေါ်ရန် အစိုးရက စိတ်ဝင်စားဟန်မပြချေ၊ မကြာမီကမှ ဟောင်ကောင်တွင် ဆန္ဒပြသူ ကျောင်းသားများကို အစိုးရက ငြိမ်းငြိမ်းချမ်းချမ်း ပြေလည်အောင်ဖြေရှင်းပြခဲ့ပါသည်၊ ထိုလုပ်ရပ်ကို အတုယူ သင့်ပါလျက် ရဲယူနီဖေါင်းဝတ်များက လက်ပံတန်းမှ ကျောင်းသားများကို အကြမ်းဖက် ဖမ်းဆီးကြပြန်ပါသည်၊ ထိုစိတ် မချမ်းမြေ့ ဘွယ်ကိစ္စများမှာ အစိုးရ၏လုပ်ရပ်ကို အကြည်ညိုကင်းမဲ့စေနိုင်ပါသည်၊
(၄)
နိူင်ငံတကာမြို့ကြီးတွေမှာ လူအမြောက်အများကိုတနေရာမှတနေရာသို့ အမြန်ပို့နိုင်သော ရထားတွေ၊ ကားတွေရှိကြ သည်၊ ကျွန်တော်တို့နိုင်ငံ၏ မီးရထားပို့ဆောင်ရေး စံနစ်မှာ အနှစ်၅၀လောက်နောက်ကျနေပါပြီ၊ ရန်ကုန်မြို့နေ လူထု အတွက် မြို့ပါတ်ရထား မြေအောက်ရထား စံနစ်တွေ ရှိရန် လိုသလို၊ ရန်ကုန်-မန္တလေး-မြစ်ကြီးနား – မော်လမြိုင် မြို့ကြီး တွေသို့သွားသော Bullet Train တွေရှိရန်လိုအပ်နေပါသည်။ ရန်ကုန်မန္တလေး ခရီးမှာ သုံးနာရီထက်ပို မကြာ အောင် ဆောင်ရွက်ပေးရပါမည်၊
ပြည်သူကိုပို့ဆောင်ပေးသော Bus Car တွေမှာ Air Con Bus တွေဖြစ်ရန်လိုသလို ကားတစီးလာသည်နှင့် အတင်းအကြပ် ကြိတ်ထိုးကာ တိုးဝှေ့တက်ရသော အဖြစ်တွေကလည်း မဖြစ်သင့်တော့ပါ။ ၄င်းတို့မှာ လူဖန်တီးသော ငရဲဟုသာ ဆိုရတော့မည်၊
လျှပ်စစ်မီးပျက်တာတွေလျော့နည်းသွားသော်လည်း လျှပ်စစ်ဓါတ်အားမပြည့်သည့်ပြဿနာ ရှိနေပါသည်။လျှပ်စစ်က မလုံလောက်သောအခါ လေအေးစက်ကို အသုံးချ၍မရ။ လူတိုင်းက step up ထရန်စဖော်မာ တွေသုံး ကြရသောအခါ မသုံးနိုင်သူတွေက လက်မှိုင်ချ၍သာ နေကြရသည်။
“ခေတ်သစ်၏ တီထွင်မှုများတွင် လေအေးစက် တီထွင်မှုက လူ့ဘ၀တွင်အခြေအနေတွေကို အကောင်ဆုံးပြောင်းလဲ စေခဲ့ပါသည်” ဟု စင်္ကာပူ ခေါင်းဆောင်ကြီး လီကွမ်ယူး က ပြောခဲ့သည်၊ ထိုခေတ်သစ်၏ တီထွင်မှု များသည်မြန်မာ ပြည်သူတို့လက်ဝယ်သို့ မရောက်နိုင်ဖြစ်နေပါသည်။ ရာသီဥတုပူပြင်းသော ကာလတွင် နေစရာမရှိ၊ နေ၀င်ချိန်ကိုသာ ထိုင်စောင့်နေရသော အခြေအနေမှာ စက်မှုဖွံ့ ဖြိုးမတိုးတက်စဉ်က ကမ္ဘာဦးလူသားတို့၏ အခြေအနေသာ ဖြစ်ပါသည်။ ကမ္ဘာကြီးက တဟုန်ထိုး တိုးတက်နေချိန်မှာ လူတို့၏ စီမံခန့်ခွဲမှုညံ့ဖျင်းမှုကြောင့် ပြည်သူလူထုထံ လျှပ်စစ်အလုံအလောက် မရောက်ရှိခြင်းမှာ မဖြစ်သင့်ပါ။
စက်မှုထွန်းကားသောခေတ်ကြီးမှာ လူနေမှုအဆင့်အတန်းမြင့်မားစေရန် အလွယ်တကူလုပ်ပေး၍ရပါပြီ၊ ကဏ္ဍ အသီးသီး၌ ပညာရှင်အသီးသီးမှာ ပြည်တွင်းမှာ၎င်း၊ ပြည်ပတွင်၎င်း အလွယ်တကူ ရှာဖွေတွေ့ရှိ တာဝန်ပေးနိုင်ကြပါပြီ၊ အစိုးရ၏ တာဝန်မှာ တိုင်းပြည်တိုးတက်ရေးကို ဦးတည်အလုပ်လုပ်ကြရန်သာဖြစ်ပါသည်၊ ဖွံ့ဖြိုးရေးလုပ်ငန်းများမှာ ပြည်သူတို့ လက်ဝယ် သို့ လုံလောက်အောင်မရောက်ရှိဘဲ ရံပုံငွေ များမှာဇီးသီးဗန်း မှောက်သကဲ့သို့ ကွဲပြားကုန်ကြပါသည် ဟု အရာရှိကြီးတဦးပြောသံကို ကြားလိုက်ရဘူးပါသည်၊
စက်မှုတော်လှန်ရေးကြောင့် လူ့အသုံးအဆောင်၊ လူမှု့အဆင့်အတန်းမြင့်မားစေသော ပစ္စည်းကရိယာများ ပေါ်ထွန်းခဲ့ သော်လည်း လူထုက မသုံးစွဲနိုင်ကြပါ၊ ပညာတတ်ဦးရေများပြားပြီး၊ သယံဇာတ နှင့် အကွက်အကွင်းကျယ်သော မြန်မာနိုင်ငံ တွင်ဤလူမှုဒုက္ခများ ရှိနေခြင်းမှာ မဖြစ်သင့်တော့ပါ၊
နွေရာသီရောက်၍ ပူပြင်းချိန်တွင် ရေမလာသည်မှာလည်း လူမှုဒုက္ခကြီးဖြစ်ပါသည်။ အထပ်မြင့်နေမိသူတို့မှာ ပို၍သာ ဆိုးတော့သည်။ အစိုးရက ဤုအခြေခံလိုအပ်ချက်များကို ဦးစားပေးဆောင်ရွက်သင့်ပါသည်။ မိမိတို့ နိုင်ငံအတွင်းရှိ ပြည်သူပြည်သားအားလုံး၏ အခြေခံလိုအပ်ချက်အားလုံးကို ဖြည့်ဆည်းပေးရပါမည်၊ လူဦးရေတိုးပွားလာသော ခေတ်ကြီး တွင် ထိုလူဦးရေကို နေစရာ အမိုးအကာများ ဖန်တီးပေးဖို့ လူနေတိုက်တာ အဆောက် အဦးတွေဆောက်ပြီး ပြည်သူတွေ ကို နေရာပေးရပါမည်၊
(၅)
တခါက တောင်ဒဂုံ ရှိ အိမ်နှင့် လမ်းဘေးဓါတ်တိုင်သို့ ဆက်သွယ်သော လျှပ်စစ် ဆားဗစ်(စ) ကြိုးကို သူခိုးက ဖြုတ်ပြီး ခိုးသွားပါလေသည်၊ ကျွန်တော်တို့သည် ဘာလုပ်ရ ဘာကိုင်ရမည်မသိ ၊ ရဲစခန်းသို့ သွားပြီးအကြောင်းကြားရသည်။ ရဲနှစ်ယောက်လိုက်လာပါသည်၊ သူတို့လည်းဘာမှ အကူအညီမပေးနိုင် ကျွန်တော်တို့ ပြန်တော့မယ်ဟု နှစ်ခါနှုတ်ဆက် နေသောကြောင့် တစ်ယောက် တစ်သောင်းနှင့် ငွေ၂သောင်း ထုတ်ပေးလိုက်ရပါသည်၊ သူတို့အကြံပေးသောကြောင့် လိုင်းမင်းကို ဆက်သွယ်သောအခါ လိုင်းမင်းက ၀ါယာကြိုးဖိုးဆိုကာ ပိုက်ဆံ၂သောင်းခွဲလောက်ပေးလိုက်တော့ ကြိုးအသစ်ကိုဆင်ပေးသွားပါသည်။
အလုပ်သဘောအရ ကျွန်တော်တို့သည် တယ်လီဖုန်းလိုင်းကို အပျက်ခံ၍ မရပါ။ သို့ပေမဲ့ ဖုံးလိုင်းပျက်သည်က အကြိမ်ကြိမ်၊ ဖုံးခေါ်ပြီး အပျက်တိုင်နေရုံ ဖြင့် ဘာမှ ထူးခြားမလာ၊ လိုင်းမင်းကိုသာ ခေါ်ကြရသည်၊ လိုင်းမင်း တစ်ခါခေါ်လျင် ခြေကြွခ ၃၀၀၀ မှ ၅၀၀၀ ပေးရပါသည်၊ ပိုက်ဆံပေးရသည်ထက် စိတ်သောက ရောက်လိုက်ရသည်က သွေးပျက်လောက်သည်၊ ထိုကဲ့သို့သောယိုယွင်းနေသည့် ပြဿနာများကို အစိုးရက စည်းကမ်းတကျဖြစ်အောင် ဆောင်ရွက်ပေးရန် လိုပါသည်။
တစ်ခါကလည်းအိမ်ကို သူခိုးကဖောက်ပြီး ပစ္စည်းတွေ မ သွားသောကြောင့် ရဲနှင့်ပတ်သက်ရပြန်သည်၊ ရဲက ကျွန်တော်တို့က စာရေးသား တိုင်ကြားရမည်ဟုဆိုသည်၊ အိမ်မှာနေသူတွေကို မသင်္ကာသောကြောင့်သူတို့ကို ခေါ်စစ်မည်ဟုဆိုသည်၊ကျွန်တော်တ်ို့က ပစ္စည်းပြန်ရဖို့ကိစ္စကို လက်လျော့လိုက်ကြပါသည်၊ အိမ်ရှိလူကုန်ု တစ်ဦးစီရဲစခန်းကို သွားပြီး အစစ်ခံရမည့်ကိစ္စကို ကျွန်တော်တို့မတွေးဝံ့ပါ။
အစိုးရတရပ်သည် ခြစားမူတွေကိုလည်း မတိုက်ဖျက်၊ ပြည်သူ တို့လိုအပ်ချက်တွေကိုလည်းမဖြည့်ဆည်းပေးဘူး ဆိုလျင် အစိုးရတာဝန်ကျေပွန်သည်ဟုမဆိုနိင်ပါ။
(၆)
ကျွန်တော်သည် ဘယ်အစိုးရတက်၍ ဘယ်သူတွေအာဏာရသင့်သည်ဟု မဝေဖန်လိုပါ၊ သို့ပေမဲ့ လုပ်ပိုင်ခွင့်တွေယူထား သည့် အစိုးရတာဝန်ရှိသူများသည် ပြည်သူတ်ို့ လိုအပ်ချက်များကို ဖြည့်ဆည်းပေးရန် တာဝန်ရှိသည်ဆိုခြင်းကို အထူးပြု ပြောလိုပါသည်၊ အစိုးရလုပ်သူတွေ က လစ်လျူရှုထားလျင် တာဝန်မဲ့သူများ အပေါ်ပြည်သူက ပိုမိုအကြည်ညိုမဲ့ လာရန် သာ အကြောင်းရှိပါသည်၊ အခြေခံ လူမှုပြဿနာများနည်းပါးပြီး၊ အဆင့်အတန်းမြင့်မြင့် နေနိုင်ကြပြီဆိုလျင် ဘယ်အစိုးရ အုပ်ချုပ်သည်ဖြစ်စေ ပြည်သူက ထောက်ခံကြမည်သာ ဖြစ်ပေသည်။
မြန်မာပြည်မှာ စီးပွားရေးလုပ်ဖို့ အဆင်သင့် မဖြစ်သေးဘူး၊ စံနစ်က တကယ်မပြောင်းသေးဘူး၊ အရင်အတိုင်းပါဘဲ ဆိုသည့် ဝေဖန်သံများကို အမြဲတစေ ကြားနေရပါသည်၊ ပြည်သူတွေ မှာလည်း တာဝန်ရှိသူများ စီစဉ်မပေးနိုင်မှုကြောင့် ကြုံနေကြရသည့် လူမှုဒုက္ခတွေကလည်း များပြားလှပါသည်၊
ထိုသို့ အစီအစဉ်ညံ့ဖျင်းတာတွေကို မပြုပြင် နိုင်ခြင်းမှာ အာဏာသိမ်းခဲ့သော အစိုးရနှင့် အဆက်ဆက် အုပ်ချုပ် လာခဲ့ ကြသူများတွင် တာဝန်ရှိသည်ဟုကျွန်တော်ယူဆပါသည်၊ အစိုးရသည် ပြည်သူများအပေါ် တင်ရှိနေသော ကြွေးတွေ ရှိနေပါသည်၊ ထိုကြွေးတွေကို အမြန်ဆုံး ဆပ်ကြရပါမည်၊
ကိုသန်းလွင်
သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ
