ဝင်းဖေ ပင်တိုင်ကဏ္ဍ

သကြားမှန်ကူ အုန်းမှန်ကူ – Win Pe’s short story


ဝင်းဖေ ၀တ္ထုတို
သြဂုတ် ၁၂၊ ၂၀၁၂

http://shweamyutay.com/images/news/s_nov11/winphay.jpg
ကိုမြရှင်နဲ့ ပတ်သက်ရင် ကျုပ်တော့ နားမလည်တာ များပါတယ်။ ကျုပ်ကို ကြိုက်ပါတယ်လို့ စပြောခဲ့ ကတည်းက စပြီး နားမလည်ခဲ့တာပါတော်။

တော်တို့ပဲ စဉ်းစားကြည့်လေ။ ကျုပ်က ငါးသည် (ငါးသယ်)။ ဗျပ်ကလေးနဲ့ ပျံကျဈေးလမ်း ဘေးမှာ ကြုံသလို ချရောင်းရတဲ့ ငါးသည်။ သူက ကျောင်းဆရာ၊ တကယ်ဆို သူကြိုက်စရာ ရှားသမို့လား။ အရပ်သူ ချောချော ကလေးတွေ၊ ကျောင်းသူလေးတွေ၊ သူလိုထဲက ဆရာမ လှလှကလေးတွေ ပြည့်လို့။ ကျုပ်ကို ကြိုက်ပါတယ်လို့ လာပြောတော့ ကျုပ်က နားမလည် နိုင်လွန်းလို့ ဘာကြောင့် ကြိုက်ရတာ လဲလို့ မေးပါတယ်။

သူဖြေပုံ ကျတော့လည်း လွယ်လိုက်တာ။ “နဖူးစာလေ”တဲ့။ ကဲ-ကျုပ်ကလည်း အဲဒီ နဖူးစာ ဆိုတာကြီးကို နားမလည် တော့တာ။ ကျုပ်က ဒီတုန်းက သူ့ကို ပြန်ကြိုက်တာ၊ မကြိုက်တာ အသာထားလို့၊ စိတ်က ရပ်နေတာ။ ဒါနဲ့ လွယ်လွယ်ပဲ ပြောလိုက်တယ်။“တော်က ကျောင်းဆရာ မဟုတ်ဘဲ ကျုပ်တို့လို တံငါသည် ဆိုလည်း ကောင်းသား” လို့။ အဲဒီတော့ ကိုမြရှင် ရယ်လေ။ ဘာမှတောင် မစဉ်းစားဘူး။ “ဒါဆိုရင်တော့ သိပ်လွယ် သွားပြီ”တဲ့။ “ကျုပ် ကျောင်းဆရာ မလုပ်တော့ဘူး။ တံငါသည်ပဲ လုပ်တော့မယ်” တဲ့။

ကျုပ်ကတော့ နောက်နေတယ်ပဲ ထင်တာ။ မဟုတ်ဘူး တော်ရေ့။ တကယ် ပြောနေတာတဲ့။
“ဒီမယ် ခွေးမ။ နင့်အကြောင်း ငါကောင်းကောင်း သိပြီးသား၊ နင့်မှာ အမေလည်း မရှိတော့ဘူး။ အဖေ တံငါသည် အဘိုးကြီးနဲ့ နေရတာ။ သူ့ကို နင် မခွဲနိုင်သလို သူကလည်း နင့်ကို မခွဲနိုင်ဘူး။ သူကလည်း သူ့တံငါ အလုပ်ကို မစွန့်နိုင်ဘူး၊ ဒီတော့ ရှင်းရှင်းလေးရယ်။ နင်သာ ငါ့ကို ယူမယ်ဆိုရင် ငါနင်တို့နဲ့ လာနေမယ်။ ငါလည်း တံငါပဲ လုပ်တော့မယ်။ ငါ နင့်ကို သိပ်ချစ်တယ်”တဲ့။

ကျုပ်ကို သိပ်ချစ်ရအောင် ကျုပ်က အရုပ်ဆိုး အကျည်းတန်မ မဟုတ်ပေမယ့် လှမှ မလှတာ ကြီးကို။ ပြီးတော့ လူမပြောနဲ့ နာမည်တောင် မလှဘူး။ “ခွေးမ” တဲ့။ အလုပ်က ငါးသည်၊ စာက ကောင်းကောင်းမတတ်၊ ငါးသည်ဆိုတော့ ၀တ်တာ စားတာကရော စုတ်ပြတ်နေတာ။ လင်စိတ် သားစိတ်ဆိုတာ သူက ကြိုက် ပါတယ်လို့ လာပြောတော့မှပဲ ဖျတ်ခနဲ ပေါ်လာတော့တာ ပါတော်။ မိုးကြိုးပစ် ကျိန်ရဲပါရဲ့။ ဒီတုန်းက သူတံငါသည် လုပ်တော့မယ် ဆိုတော့ ဘယ်ယုံလိမ့် မှာတုံး။ ဒါနဲ့ ပြီးစလွယ် ပြောလိုက်တယ်။

“တော်က တံငါသည် လုပ်မယ် ဆိုလို့မှ ကျုပ်က တော့်ကို ပြန်မကြိုက်ရင် ကျုပ်အဆိုး ဖြစ်တော့မပေါ့ တော်” လို့ ပြန်ပြောလိုက်တယ်။

အဲဒီ နေ့လယ်က ကျုပ် ငါးတွေ ရောင်းလို့ကုန်တော့ ကျုပ်တို့ အိမ်ရှိတဲ့ ကျွန်းထဲကို လှေကြုံနဲ့ ပြန်ခဲ့တယ်။ ကျုပ်တို့နေတဲ့ ကျွန်းဆိုတာက မန္တလေး အနောက်ဘက် ဧရာဝတီ မြစ်ကြီးထဲက နန်းတော်ကျွန်းတို့။ သမင်ခြံပတ် ၀ဲတို့ဆိုတဲ့ ကျွန်းကြီးတွေရဲ့ နောက်ဘက်ကို ကျသေးတာ၊ နောက်ပေါ်တဲ့ ကျွန်းပေါက်စ ကလေးပါ။ တော်တော်ကို ခေါင်တာပါ လို့ဆို၊ အဲ… အိမ်ထဲလည်း ၀င်လိုက်ရော အဖေနဲ့ထိုင် စကားပြော နေတဲ့ သူ့ကို တွေ့တော့တာပဲ။ အံ့ ရော… ကျုပ်တော့ နားကို မလည်တော့ဘူး။ သူက အဖေ့ကို ဇာတ်စုံ ရှင်းပြီးသား ဖြစ်နေပြီ။ အဖေက ကျုပ်ကို တန်းမေးတာပဲ။

“ခွေးမ၊ သူက တံငါ လုပ်မယ်ဆိုရင် နင် သူ့ကို ယူပါ့မယ်လို့ ပြောလိုက်တယ် ဆို” တဲ့။

ဒီတော့-
“ဟုတ်တော့ ဟုတ်ပါတယ်။ ဒါပေမဲ့…”ပဲ ပြော ရသေးတယ်။

“ဒါပေမဲ့တွေ ဘာတွေ လုပ်မနေနဲ့။ ဒီကောင် ငါ့လိုပဲ ဒိုးတူပေါင်ဖက် တံငါလုပ်မယ် ဆိုလို့ကတော့ ငါလည်း သဘောတူတယ်”တဲ့။

“သူ့မိဘတွေ ပြီးရင် ပြီးပြီ”တဲ့။ အဲဒီမှာ ကိစ္စက ပြတ်တော့တာပဲ။ သူ့မှာက မိဘတွေမှ မရှိတော့တာ။ သူက တစ်ကောင်ကြွက် ဥစ္စာ၊ ကျောင်းဆရာ အလုပ်ဆိုတာ တံငါသည် အလုပ်နဲ့ အကွာကြီး ပါတော်။ သူက မူလတန်း ကျောင်းဆရာ ဆိုပေမယ့် ၀င်ငွေက ငါးဖမ်းစားတာ ထက်တော့ ပုံမှန် ၀င်သေးတာပဲ။ ဘယ်နည်းနဲ့မှ ရေရှည် ခံနိုင်မှာ မဟုတ်ဘူးလို့ ကျုပ်ကတော့ သေချာပေါက် တွက်ထားလိုက်တယ်။ ကျုပ်အဖေနဲ့ လိုက်ပြီးတော့ ပင်ပင်ပန်းပန်း ခက်ခက် ခဲခဲနဲ့ကို တံငါ အတတ်ကို သင်ယူရတာ ပါတော်။ ကျုပ်လည်းကျုပ် စကားနဲ့ကျုပ်၊ သူနဲ့ ညားတော့ တာပါပဲ။ ညားလည်းပြီးရော ဒေါ်ကျုပ်ကြီး ပြောသလိုပါပဲ၊ ကျုပ်လည်းသူ့ကို သိပ်ချစ်သွားတော့ တာပါပဲ။ သူလည်းကျုပ်ကို တကယ် ချစ်ရှာတာပါ။ ကျုပ်က ပြောပါသေးတယ်။

“တံငါသည် မလုပ်ပါ နဲ့တော့။ ကျောင်းဆရာပဲ ပြန်လုပ်ပါ။ အဖေ့ကို ပြောပေးပါ့မယ်”ပေါ့။ ကိုယ်က ချစ်လာပြီကိုး။ မရပါဘူးတော်။ “အဖေ စိတ်ညစ် သွားလိမ့်မယ်” တဲ့။ ပြီးတော့ တံငါသည်နဲ့ ငါးသည်နဲ့ ညားတာပဲ သဘာဝ ကျပါတယ်တဲ့။ ပြီးတော့ အဖေနဲ့ သူနဲ့က လိုက်လည်းလိုက်တယ်။

“ဒီကောင် တကယ် ကြိုးစားတဲ့ကောင်။ ငါ့လို မဟုတ်ဘူး၊ တံငါ ဆိုပေမယ့် ကြီးပွားမယ့်ကောင်။ ခွေးမ- နင် ကြည့်နေ။ ဒီမြရှင် ဆိုတဲ့ ကောင်ဟာ တစ်နေ့ကျရင် တံငါတော့ တံငါပဲ။ ဒါပေမဲ့ အင်းသူကြီးတွေ ဘာတွေ တက်ဖြစ်မယ့် ကောင်ကွ” တဲ့။

ကိုမြရှင် ကလည်း ကြိုးစား လိုက်တာမှ အချိန် မရွေးကို လုပ်တော့တာ။ တံငါသည် ပီသလိုက်တာမှ ငါးကြီး၊ ငါးကလေး ငါးမရွေး၊ အလုပ် အကြီးအသေး။ ရာသီအဆိုး အကောင်း ဘာမှ ကြည့်နေတာ မဟုတ်ဘူး။ အဖေက “မြရှင်ရေ…” လို့ ခေါ်လိုက်ရင် သူက လှေပေါ် ရောက်နှင့်နေပြီ။ အဖေ အရက်သောက်ရင် သူလည်း သောက်။ ကြက်တိုက်ရင် သူလည်းတိုက်ပဲ၊ ကျုပ်တို့ အသိုင်းအ၀ိုင်း တံငါသည် တွေက ပထမ သူ့ကို ကျောင်းဆရာ လူထွက်ဆိုပြီး အားနာတာနဲ့ အတော်ကလေး ခပ်တန်းတန်းနဲ့ ပေါင်းကြတာ။ သူက ဘယ်ဟုတ်လိမ့် မှာလဲ။ တစ်ခါတည်း ရောပစ်လိုက်တာ တစ်လတောင် မကြာလိုက်ပါဘူး။ ကိုမြရှင်ဟာ တစ်သက်လုံး ဒီကျွန်း ရွာကလေးပေါ် ကြီးလာပြီး တစ်သက်လုံး ငါးဖမ်းစား လာတဲ့လူ ကျနေတာပဲ။ သူလည်း တံငါအတတ် ကောင်းကောင်း တတ်လို့ ၆ လလောက်လည်း ကြာရော အဖေ လေဖြတ်ပါ လေရော။ညာလက်နဲ့ ဘယ်ခြေထောက် ဒေါင့်တန်းဆွဲ။ အကြောတွေ သေသွားပါ ကောလား။ တစ်သက်လုံး တံငါအလုပ် မလုပ်နိုင် တော့ပါဘူး။

ဒါနဲ့ ကျုပ်က ကိုမြရှင်ကို ပြောပါသေးတယ်။ “အဖေလည်း တံငါ မလုပ် နိုင်တော့ဘူး။ တော်လည်း တံငါ မလုပ်ရင် ဘာမှ ပြောတော့မှာ မဟုတ်ဘူး။ ကျောင်းဆရာ ပြန်လုပ်ချင် လုပ်လေ”လို့။ ဒီတော့ “သူက အဖေ စိတ်မကောင်း ဖြစ်မှာ သေချာတယ်” တဲ့။ ခုလို ဒုက်္ခိတ ဖြစ်နေတဲ့ အချိန်မှာ သူ စိတ်ချမ်းသာအောင် ထားဖို့ ပိုလိုတယ်တဲ့။ သူက စာတတ်တယ် မဟုတ်လား။ သူက ပိုသိတာပေါ့။ ခက်တာက ကိုမြရှင်နဲ့ ရွာခံတွေနဲ့ သိပ်ရင်းနှီး လာတော့ ရွာခံတွေက သူ့ကို မနာလို တတ်လာကြပြီလေ။ သူက စာတတ်ပေတတ် မဟုတ်လား၊ ဘာလေးပဲ ပြောပြော ကျန်တဲ့ လူတွေက သူ့ကိုမီအောင် ပြောနိုင်ကြတာမှ မဟုတ်ဘဲ။ ကြာလာလေ ကိုမြရှင် ဘာပြောပြော ကြွားတယ်၊ လူတတ် လုပ်တယ်လို့ ထင်လာ ကြလေပဲ။

တစ်နေ့တော့ အကြီးဆုံး ပြဿနာ ပေါ်တော့တာပဲ။ ကျုပ်တို့အိမ်မှာ စုပြီး အရက်သောက် ကြတဲ့ တစ်ည၊ အရက်ဝိုင်း ဆိုတော့ ရောက်တတ်ရာရာ သီချင်းတွေ ဘာတွေ ဆိုကြတာပေါ့။ တွံတေး သိန်းတန်သီချင်း တွေပဲ များတာပါပဲ။ နောက်တော့ တစ်ယောက်က မာမာအေး သီချင်းဆိုတယ်။ အစအဆုံး မဟုတ်ပါဘူး။ ရသလောက်ပါပဲ။ အဲဒါ ကလေးကိုပဲ အားလုံး သိပ်ကြိုက် ကြပြီးတော့ မာမာအေး ချီးမွမ်းခန်း ဖွင့်ကြ တော့တာပေါ့။ အဲဒီမှာ ကိုမြရှင်က ဘာဝင်ပြော လိုက်သလဲဆိုတော့ သူကိုယ်တိုင် မာမာအေးနဲ့ တွေ့ဖူးတယ်တဲ့။ ဒီမှာတင် အားလုံးက ၀ိုင်းဟား ကြတော့တာပဲ။ ကိုမြရှင်ကလည်း မလျှော့ဘူး။ တွေ့ရုံတင် မဟုတ်ဘူးတဲ့။ သူဆိုတဲ့ သီချင်းကို မာမာအေးက လိုချင်ပါတယ် ဆိုလို့ သူက သင်ပေးလိုက် ရတဲ့အကြောင်း။ အဲဒီမှာတော့ တစ်ဝိုင်းလုံး ဗြောင်းဆန် ကုန်တော့တာပဲ။ လှောင်ကြပြောင်ကြ၊ ရိကြ ကလိကြနဲ့ ၀ိုင်းဟားကြတာ။ ဖြီးတာလည်း ဖြီး၊ ကြွားတာတော့ ကြွားပေါ့။ ဒါပေမဲ့ အလွန် အကျွံတော့ မလုပ်ဖို့။ တံငါသည်တွေ၊ တောသား တွေဆိုပြီး ထင်တိုင်း လှိမ့်လို့ ရလိမ့်မယ်တော့ မထင်ဖို့ ဘာညာပေါ့၊ ဆူညံနေတာ ပါပဲ။

ကျုပ်ကတောင် ၀င်ပြောမိ သေးတယ်။ “ကိုမြရှင်ရယ်၊ ဟုတ်ကော ဟုတ်ရဲ့လား” လို့။ ဒီတော့ “ဒုက္ခပါပဲ ခွေးမရယ်…ငါ့စကားကို ငါ့မယားတောင် မယုံတော့ ပါလား” တဲ့။ ဟုတ်တယ်။ ကျွန်မလည်း မယုံတာတော့ အမှန်ပဲ။ ကိုမြရှင်က မန္တလေးသား။ မြို့ပေါ်က ဆိုပေမယ့် မိုးကြိုးပစ် ဘုရားစူး ရယ်ပါ၊ မန္တလေးမြို့ရဲ့ အနောက် မြောက်ထောင့် ရွှေပြည်၊ မင်းတဲ၊ အီကင်းကျော်ပြီး ထီးတန်ဆောင်း ဘုရားမြောက်ဘက် အရပ်က သူ့ဇာတိလေ။ ကျောင်းဆရာ လုပ်တော့လည်း ရပ်ကွက် မူလတန်းကျောင်း ဆရာလေးပါ။ မာမာအေးနဲ့ ဘယ်လို နီးစပ်မှာလဲ။ နောက်ပြီးတော့ သူ့ဟာက မြင်ဖူးပါတယ် ဆိုတာ လောက်ဆိုတော်သေး၊ ခုတော့ လူကိုယ်တိုင် တွေ့ဖူးရုံတင် မကဘဲ သူကတောင် သီချင်းတက်ပေး လိုက်ရသေးတယ် ဆိုတော့ ကျုပ်လည်း ဘယ်ယုံလိမ့် မှာလဲ။ အဲဒီ တစ်ညလုံး ကတော့ ကိုမြရှင်ကို နောက်ကြပြောင်ကြ တော့တာပါပဲ။ မာမာအေးကို သီချင်းသင် ပေးတုန်းက ရိုက်ရသေးလား။ သင်ပေးရုံပဲလား ဘာညာနဲ့ တ၀ါးဝါးပါပဲ။ ကျုပ်ကတော့ ကိုယ့်ယောက်ျားကို ဒါလောက်တောင် ၀ိုင်းလှောင်နေကြ တာကိုတော့ မကြိုက်ပါဘူး။ ကိုမြရှင်ကတော့ “မယုံလည်း နေကြပေါ့” တဲ့။ သူ ဘာမှ ဆက်မရှင်း တော့ဘူးတဲ့။ ဘထွေးကြီး ဖိုးထူးကတော့ “နေကြစမ်း ပါဦးကွာ၊ သူ မာမာအေးကို ဘယ်မှာ ဘယ်လိုတွေ့လို့ ဘာ့ကြောင့် ဘာသီချင်းကို ဘယ်လို တက်ပေးရတယ် ဆိုတာလဲ မေးဦး မှပေါ့ကွ” လို့ ၀င်ပြီး ပြောရှာပါတယ်။

ဒါပေမဲ့ ကိုဝက်က မူးမူးနဲ့ ၀င်ပြီး “တွေ့တာက အိပ်မက်ထဲမှာ။ တက်ပေးတဲ့ သီချင်းက ချိုမိုင်မိုင်ဗျာ” လို့ နောက်လိုက်တော့ တစ်ဝိုင်းလုံး တ၀ါးဝါး တဟားဟားနဲ့။ ကျုပ်လင်ကတော့ မချိ ပြုံး ကလေးနဲ့ပဲ “ဟုတ်ပါ တယ်။ ဟုတ်ပါတယ်” နဲ့ နေလိုက်ရရှာတာ ပေါ့ရှင်။ ကျုပ်ကတော့ ကိုယ့်လင်ကိုယ် မယုံတာက တစ်ပိုင်းပဲ။ ဒါလောက်တောင် ၀ိုင်းပြီး လှောင်နေ ကြတာကို မခံနိုင် တော့ဘူး၊ တဲနောက်ဖေး သွားပြီး ငိုကို ပစ်လိုက်ရတယ်။ အမြည်း ကုန်သွားရင် ထပ်ဖြည့်ဖို့ ငါးသလဲထိုးတွေ ကြော်ထားတာလည်း စေတနာ ပျက်သွားလို့ ချမပေး တော့ဘူး။ မှတ်ကရော။ တဲရှေ့လည်း ပြန်မထွက် တော့ဘူး။ တစ်ခါတည်း အိပ်ရာထဲ သွားနေလိုက်တယ်။

အိပ်လို့တော့ မရပါဘူး။ တော်တော်ကြီးကို မိုးချုပ်မှ ၀ိုင်းသိမ်းကြ တာလေ။ အကုန် ပြန်သွားကြတော့ လမ်းမှာအော်ကြီး ဟစ်ကျယ်နဲ့။ ကိုမြရှင်နဲ့ မာမာအေး စုံတွဲသီချင်း ဆိုထားတာ ကိုပဲ ရေဒီယိုက လာတော့မှာ လိုလို ဘာလိုလိုတွေ တဟားဟားနဲ့ ပြောသွားကြလေရဲ့။ ဟိုသေခြင်းဆိုး ငပြူး ဆိုတဲ့ ကောင်ကလည်း ကိုမြရှင် တစ်ယောက် မာမာအေးနောက် ပါသွားရင် ခွေးမတော့ မလွယ်ဘူး ဘာညာနဲ့ မီးလောင်ရာ လေပင့်သေးတာ။ ကာလနာတွေ။ အားလုံး ပြန်ကုန်ပေမယ့် ကိုမြရှင် အိပ်ရာထဲ ၀င်မလာ သေးလို့ ထွက်ကြည့်တော့ မြစ်ကမ်းစပ်ဘက် ထွက်သွား တာမြင်လို့ သူ့နောက် ထွက်လိုက်ခဲ့တယ်။ သဲသောင် ပေါ်ကို ထိုင်မိကြတော့ “ခွေးမ”တဲ့။ “မာမာအေးနဲ့ ငါ တွေ့ခဲ့ဖူးတယ် ဆိုတာကို နင်လည်း ယုံမှာ မဟုတ်ဘူး။ ဒါပေမဲ့ နင်ကတော့ ငါ့မယားမို့ ပြောပြမယ်” တဲ့။

ကျုပ်တို့ မညားခင် တစ်နှစ်ကတဲ့။ သူ့သူငယ်ချင်း တစ်ယောက်နဲ့ ရန်ကုန်ကို လိုက်သွားတာတဲ့။ တည်းခိုတဲ့ အိမ်မှာ လွတ်လွတ်လပ်လပ် ရှိတာနဲ့ သူငယ်ငယ်က သူ့အဖေဆီက ရလိုက်တဲ့ သီချင်း တစ်ပုဒ်ကို စိတ်လိုလက်ရ ဆိုမိသတဲ့။ အဲဒီ သီချင်းက သကြားမှန်ကူ အုန်းမှန်ကူ ဆိုတဲ့ မန္တလေး သီချင်း။ နောက်ပြောင် စပ်ထားတဲ့ သီချင်းပါ။ မန္တလေးမှာ ရနိုင်တဲ့ အစား အစာတွေကို စာရင်းလုပ်ပြီး သီချင်း စပ်ထားတာ။ အဲဒီ အချိန်မှာ တစ်ဖက်အိမ်ကို အလည် ရောက်နေတဲ့ အဆိုတော် မာမာအေးက ကြားသွားတော့ ဒီဘက်အိမ် ကူးလာပြီး သူ့ကိုယ်သူ မိတ်ဆက်ရင်း စာသားကို တောင်းပါသတဲ့၊ စာသား ပေးလိုက်တော့ အလိုက် ကလေး ပြန်ဆိုပြပါဦး ဆိုလို့ ဆိုပြရတာတဲ့။ မာမာအေး ကတော့ တကယ့် ပါရမီရှင် ဆိုတော့ ခဏ ကလေးနဲ့ အလိုက်ကိုလည်း ရသွားတာ ပါပဲတဲ့။ ဒီလိုဆိုတော့ သိပ်ဖြစ်နိုင် တာပေါ့။

ကျုပ်က-
“တော် အဟုတ်ပြော တာလား” လို့ ဆိုတော့။

“အဟုတ် ပြောတာပါကွာ” တဲ့။

ဒါနဲ့ “ဟိုလူတွေကို ဘာလို့ ပြောမပြ လိုက်တာလဲ” လို့ ဆိုတော့ “အစကတည်းက ငါကမှားပြီး ပြောလိုက် မိတာပါကွာ။ သူတို့ကို ရှင်းပြ နေစရာလည်း မလိုပါဘူး” တဲ့။ သူလည်း နောက်ထပ်ရှင်း နေတော့မှာ မဟုတ်ဘူးတဲ့။ ကျုပ်ကိုလည်း ဘယ်တော့မှ ပြန်မပြော ရဘူးလို့ အကျိန်ခိုင်းလို့ ကျိန်လိုက်ရ သေးတယ်။

ကျုပ် မခံနိုင်ဆုံး ကတော့ ကိုဝက်တို့၊ ငပြူးတို့ပဲ။ သူတို့အုပ်စုက ကိုမြရှင်နဲ့ မာမာအေး ကိစ္စကို မပြီး နိုင်တော့ဘူး။ ဟိုနေရာ တွေ့လည်း ဒါပဲ။ ဒီနေရာလည်း ဒါပဲ။ ကိုမြရှင်ကတော့ မချိ ပြုံး ကလေးနဲ့ ဘာမှကို မပြောတော့တာ။ ကျုပ်ကလည်း ကျိန်ထားရတာ မှုတ်လား၊ ကျုပ် သိတာကိုလည်း ပြန်မပြော ပါဘူး။ ပြောလည်း အလကား ပဲလေ၊ ဘယ်မှာလဲ သက်သေ၊ မာမာအေး သွားမေးရ မလို ဖြစ်နေတာ။ ကျုပ် ရင်ထဲမှာတော့ မခံချင်တဲ့ စိတ်တွေနဲ့ တင်းကျပ် နေတာပဲ။

တစ်နေ့တော့ မင်းကွန်း မရောက်ခင် မြစ်လယ်မှာ အသစ်ပေါ်တဲ့ သောင်ထိပ်က သရက်မှော် ကလေးကို ကျုပ်တို့ လင်မယား လှေကလေး ဆိုက်ပြီး ကွေ့လေးထဲ မန်ကျည်းကိုင်း တွေများ ချရကောင်း မလားလို့ ကြည့်နေကြတုန်း မော်တော်ကြီး တစ်စင်း မြစ်လယ်မှာ စက်ရပ်သွားလို့ ကျုပ်တို့ လှေနဲ့ မနီး မဝေးမှာ လာဆိုက်တယ်။ စက်ကို နည်းနည်း ပြင်ရဦးမှာ ဆိုတော့ မော်တော်ပေါ်မှာ ပါလာတဲ့ ခရီးသည် နည်းနည်း သောင်ပေါ်ကို အညောင်းပြေ အညာပြေ ဆင်းလာကြတယ်။ အဲ… အဲဒီ အုပ်စုထဲက အမျိုးသမီး တစ်ယောက်ဟာ ကိုမြရှင် ကိုလည်း မြင်ရော ၀မ်းသာအားရ ပြေးလာတဲ့ပြီး “ရှင် …ရှင်… ကိုမြရှင် မဟုတ်လား” တဲ့။ ၀မ်းပန်းတသာ နှုတ်ဆက်ရှာ တာလေ၊ ဘယ်သူ ရှိရဦးမှာလဲ။ အဆိုတော် မာမာအေး ပေါ့ရှင်။

ကျုပ်ယောက်ျား ကိုမြရှင် ပြောတာတွေ အားလုံး အမှန်တွေပဲတော့်။ ဒေါ်မာမာအေးက ရန်ကုန်မှာ တုန်းက ကိုမြရှင်ကို ဘာလက်ဆောင်မှ မပေးလိုက် ရလို့တဲ့ ငွေ ၅၀၀ ပေးတယ်။ နောက် သူတို့မှာ ပါလာတဲ့ ဘာကင်မရာကြီးမှန်း မသိပါဘူး။ ဓာတ်ပုံ ရိုက်လိုက်ရင် ချက်ချင်း အရုပ်တွေ ပေါ်လာပြီး ကြည့်လို့ရတယ်။ အဲဒါကြီးနဲ့ ကျုပ်တို့ လင်မယားနှစ် ယောက်ပုံတွေလည်း ရိုက်ပေးတယ်။ သူနဲ့လည်း တွဲပြီးတော့ ရိုက်တယ်။ ပြီးတော့ အဲဒီ ဓာတ်ပုံတွေ ကျုပ်တို့ကို ပေးခဲ့တာလေ။ ဓာတ်ပုံတွေမှ အားလုံး ရှစ်ပုံတောင်ပဲ။ ရောင်စုံတွေတော့် လှမှလှ။

ဒေါ်မာမာအေးက သိပ်သဘော ကောင်းတာ၊ ကျုပ်ကိုလည်း ညီမလေး၊ ညီမလေးနဲ့။ ကိုမြရှင်ကိုလည်း ကျေးဇူး တင်လွန်းလို့ ပါတဲ့ဆို။ ကိုမြရှင်ဆီက ရတဲ့ သီချင်းက ရှေးရုပ်သေး မင်းသမီးကြီး အမေပု ဆိုထားတဲ့ ရှားရှားပါးပါး သီချင်းတစ် ပုဒ်ပါတဲ့လေ။ သူဆိုပြတဲ့ နေရာတိုင်းမှာ သိပ်ကြိုက် ကြတာတဲ့။ သီချင်းက ရယ်စရာ ရွှင်စရာ ကလေး မဟုတ်လား။ အမလေး… ပြန်တောင် ဆိုပြသွား သေးတာ။ ဒေါ်မာမာအေးကို လိုက်ပို့ကြတဲ့ မန္တလေးက အမျိုးသမီးကြီး တွေဆို ကြိုက်ကြလွန်းလို့ သူတို့ မန္တလေးမှာ မွေးပေမယ့် တစ်ခါမှ မကြားဖူး ပါဘူးတဲ့။ ဒေါ်မာမာအေး ကတော့ သူကိုမြရှင်ဆီက ဘယ်လို တက်ယူ လိုက်ရတာ ဖြစ်ကြောင်း အားရ ပါးရကြီးကို ပြောပြနေတာ ပါတော်။ ကျုပ်ကတော့ ခုလိုချိန်များ ကိုဝက်တို့၊ ငပြူးတို့ အုပ်စု ရောက်လာရင် ဘယ်လောက်ကောင်း မလဲလို့တွေးပြီး အူကို ယားနေတာပဲ။

မော်တော်ကြီး စက်ပြင်တာပြီးလို့ ဒေါ်မာမာအေးတို့ အုပ်စုကြီးလည်း ခရီးဆက် ထွက်သွားကြရော ကျုပ်က ပြောတော့တာပေါ့။ ဒီကနေ့ ဘာမှ ဆက်မလုပ် တော့ဘဲ ရွာကိုပြန်ပြီး ဟိုသေခြင်းဆိုး တွေကို ဓာတ်ပုံတွေ ပြလိုက်မယ်ပေါ့။ ကျုပ်က အားရပါးရ ပြောလိုက်ပေမယ့် ကိုမြရှင်က ကျုပ်ကို မျက်နှာ တည်ကြီးနဲ့ ကြည့်နေတယ်၊ ပြီးတော့မှ ဒီဓာတ်ပုံတွေကို လုံးဝ မပြရဘူးတဲ့။ ဒီအဖြစ် အပျက်တွေ ကိုလည်း ဘယ်တော့မှ ပြန်မပြောရ ဘူးတဲ့။ သူမှန်တယ် ဆိုတာကို သူက သက်သေ ပြနေစရာ ဘာမှ မလိုဘူးတဲ့။ ကျုပ်ကိုလည်း ကျိန်ခိုင်းပြန်တယ်။ ကျုပ်မှာ အကျိန် ခက်လိုက်တာလေ။

ဒါပေမဲ့ သူ့မျက်နှာ တည်ကြီးကို ကြောက်တော့ ကျိန်လိုက် ရတာပါပဲ။ အဲဒီဓာတ်ပုံ တွေကို သူကိုယ်တိုင် သိမ်းထားတယ်တော့။ သူ့ ထင်းရှူး သေတ္တာလေး ထဲမှာရှိတယ်။ ဟိုလူတွေကို မပြဘူး။ ဟိုလူတွေ ကလည်း သူ့ကိုဆက်ပြီး လှောင်နေ ကြတာပဲ။ ကိုမြရှင် ကတော့ ကျုပ် မျက်နှာကိုတောင် လှမ်းမကြည့်ဘူး။ ပြုံးပြုံးပဲ။ အခုတော့ သူ့အပြုံးဟာ မချိပြုံး မဟုတ်ဘူး ဆိုတာ ကျုပ် သဘောပေါက် ပါပြီ။ ဒါပေမဲ့ ကျုပ်သူ့ကို နားကိုမလည် သေးပါဘူးတော်။

ဝင်းဖေ

(ရွှေအမြုတေ မဂ္ဂဇင်း၊ နိုဝင်ဘာလ ၂၀၁၁)

မှတ်ချက် ။ ။
ကိုမြရှင်က မာမာအေးကို ပေးလိုက်သည် ဆိုသော ရှေးရုပ်သေး မင်းသမီးကြီး အမေပု လက်တန်း စပ်ဆို ခဲ့သည်ဆိုသည့် သီချင်းကို ကြိုးစားရှာဖွေ ဖော်ပြ ပေးလိုက်ပါသည်။

“သကြားမှန်ကူ အုန်းမှန်ကူ xxx ဖရုံယိုနဲ့ ထပ်တရာ ဆိုင် xxx ကပ်ခါကိုင် xxx ကာဖီဆိုင် မလိုင်နံပြား xxx ထိုင်နားပါလို့ xxx တပါးပျို့xxx စားစို့ xxx နွားနို့နဲ့ ဖွာလူဒါ xxx ကြက်ဥနဲ့ထောပတ်ပါ xxx သည်မှာ နံသပုတစ်လုံး xxx ယခုသုံးစရာ xxx နှုန်းပြည့်ပါတဲ့ xxx ဘင်္ဂလားကွမ်းယာ xxx ကုလားကြီးထိုင်xxx အရီး ရှမ်းဆိုင် xxx ငါးဖောင်ရိုးကြော် xxx အမူစုက ကောင်းတဲ့ မောင်စိန်ခို xxx နံပြားချို xxx လမုန့်ပေါက်စီ xxx ဦးကြွယ်မုန့်တီ xxx တပါးခင်ကညာ စားချင်စရာ xxx ပဲသကြားပလာတာ xxx”

စသဖြင့် ဖြစ်ပါသည်။ အဆုံးထိ ရှာမရပါ။ စာသား အပြည့် ရသူ ရှိပါက ရွှေအမြုတေ မဂ္ဂဇင်း တိုက်သို့ ပေးပို့ စေလိုပါသည်။
အယ်ဒီတာ


သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ
MoeMaKa English Site

Similar Posts