သွေးနှင့်ပေးဆပ်နေသူများကို သွေးနှင့်ပြန်၍ ဂုဏ်ပြုသည့်ပွဲကျင်းပ

ယနေ့ ၂၆၊ ၆၊ ၂၀၁၂ မနက် ၈း ၀၀ နာရီမှာ မန္တလေးမြို့၊ မဟာအောင်မြေမြို့နယ်၊ မစိုးရိမ်တိုက်သစ်၌ ရဟန်းရှင်လူ ပြည်သူအများ စုပေါင်း ၍ သွေးလှူဒါန်းပွဲ ကျင်းပကြပါတယ်။

အဆိုပါသွေးလှူဒါန်းပွဲကို ဆရာတော် အရှင်ဝီရသူက ကြီးမှူးကျင်ပခြင်းဖြစ်ပြီး၊ ၂၆၊ ၆၊ ၂၀၁၂ မှာကျရောက်တဲ့ ဆရာတော်အရှင်ဝီရသူရဲ့(၄၄) နှစ်ပြည့် မွေးနေ့အထိမ်း အမှတ်အဖြစ်ကျင်းပခြင်းဖြစ်ကြောင်းလည်း သိရပါတယ်။

ကြိုတင်စာရင်းပေးထားသည့် ရဟန်ုးသံဃာများ (၁၃၀) ပါးရှိပြီး၊ ယနေ့မှကြွလာသည့် ရဟန်းသံဃာများရော လူပုဂ္ဂိုလ်များပါဆိုလင် (၁၇၅) ကျော်ရှိခဲ့သော်လည်း၊ သွေးပေါင်ချိန်မပြည့်ခြင်း၊ သွေးကျဆေးမသောက်ခဲ့ရခြင်းတို့ကြောင့် သွေးလှူဒါန်းခွင့်မရကြသူများက တစ်ဝက်နီးပါး ရှိတာကြောင့် (၉၁) ပုလင်းသာ လှူဒါန်းဖြစ်ကြောင်း သိရပါတယ်။

၁၂၊ ၂၊ ၂၀၁၂ တုန်းကလည်း ဗိုလ်ချုပ်မွေးနေ့နှင့် အရှင်ဝီရသူ လွတ်မြောက်မှုတစ်လပြည့် အထိမ်းအမှတ်အဖြစ် ကံတက်ကုန်း မစိုးရိမ်တိုက် သစ်မှာ စုပေါင်းသွေးလှူဒါန်းပွဲ ကျင်းပခဲ့သေးတာဖြစ်လို့ အခုတစ်ခါနှင့်ဆိုလျှင် နှစ်ကြိမ်ရှိပြီ ဖြစ်ပါတယ်။

သွေးလှူဒါန်းပွဲ ကျင်းပတာနဲ့ ပတ်သက်လို့ အရှင်ဝီရသူက အခုလို မိန့်ကြားခဲ့ပါတယ်။

“မွေးနေ့ကတော့ အစစ်အမှန်ပါပဲ၊ ဒါပေမဲ့ မွေးနေ့ပွဲကျင်းပဖို့က အဓိကမဟုတ်ဘူး။ မွေးနေ့ပွဲမှာ နိုင်/ကျဉ်းတွေကို ဂုဏ်ပြုလိုတာက အဓိ ကပါ။” “သွေးနှင့်ပေးဆပ်နေသူတွေကို သွေးနှင့်ပြန်ပြီး ဂုဏ်ပြုတဲ့ပွဲလေးပါ။”

နိုင်ငံရေးအကျဉ်းသားများ၊ လွတ်မြောက်ရေးလှုပ်ရှားမှုတွေ ဆောင်ရွက်တာနဲ့ပတ်သတ်ပြီးတော့လည်း အရှင်ဝီရသူက အခုလို ဆက်ပြော ပါတယ်။

“နိုင်/ကျဉ်းတွေလွတ်မြောက်ဖို့ အာဏာပိုင်တွေနှင့်အတိုက်အခံလုပ်ပြီး ဆုတောင်းပွဲကျင်းပပြီး တောင်းဆိုခဲ့တာလည်း အမှန်ပါပဲ။ မလွှတ်မ ချင်း တစ်လတစ်ခါ တောင်းဆိုပွဲတွေခြိမ့်ခြိမ့်သဲကျင်းပဖို့ ရည်ရွယ်ခဲ့တာလည်း အမှန်ပါပဲ။”

“မန္တလေးထောင်ထဲမှာ ကျန်ရစ်ခဲ့ကြတဲ့ နိုင်/ကျဉ်းတွေကို သွားရောက်အားပေးချင်လို့ ပြည်ခိုင်ဖြိုးပါတီအကူအညီနှင့် အလှူပြုခွင့်တင်ပြထား တာဖြစ်လို့ ဆက်မလုပ်ဖြစ်တာပါ။ အလှူလုပ်ခွင့်တော့ကျပြီး၊ အလှူရှင်စာရင်းနှင့် ထောင်အတွင်းထဲထိ ဝင်ရောက်လိုသူတွေရဲ့ အမည် နေရပ်လိပ်စာ အလုပ်အကိုင် မှတ်ပုံတင်နံပါတ် အပြည့်အစုံတင်ပါဆိုလို့ ဆက်တင်ထားခဲ့တာ။ တစ်နေ့ကျနိုးနိုး၊ တစ်နေ့ကျနိုးနိုးနဲ့ စောင့်မျှော် နေခဲ့ရတာဖြစ်လို့ တောင်းဆိုပွဲတွေ ဆက်မကျင်းပဖြစ်တော့တာပါ။”

“ဒါတောင် နယုန်လပြည့်နေတုန်းက ဆုတောင်းပွဲလုပ်ဖို့ စီစဉ်ခဲ့သေးတယ်။ အိုဘိုးထောင်ကို ဝင်ခွင့်ရပါပြီ။ ရက်ပိုင်းအတွင်း ဝင်ခွင့်ရက်ကို သတ်မှတ်ပေးပါတော့မယ်ဆိုလို့ မလုပ်ဖြစ်ခဲ့တာပါ။”

တောင်းဆိုပွဲ ဆုတောင်းပွဲတွေ မလုပ်တော့ဘဲနဲ့ ဂုဏ်ပြုပွဲပဲလုပ်ဖြစ်သွားတာနှင့်ပတ်သက်ပြီးတော့လည်း ပြည်ထောင်စုဝန်ကြီး ဦးစိုးသိန်း ကိုယ်တိုင်က ဇူလိုင်လဆန်းပိုင်းမှာ လွှတ်ပေးမှာပါလို့ ကတိပြုထားတာကတကြောင်း၊ ဦးဇင်းက လွှတ်စေချင်လို့ တောင်းဆိုတယ်။ ဦးဇင်း တောင်းဆိုမှ ပိုဆိုးသွားတယ်ဆိုတာမျိုး ဖြစ်မှာစိုးရိမ်တာကတစ်ကြောင်းပါ။ ဒါကြောင့် သွေးကို သွေးချင်း ပြန်လည်ဂုဏ်ပြုတဲ့သဘောနဲ့ သွေးလှူဒါန်းပွဲကျင်းပရတာပါဟု မိန့်ကြားသွားခဲ့ပါတယ်။

ဆရာတော် အရှင်ဝီရသူဟာ တရားဟောကြွရင်းလည်း နိုင်/ကျဉ်း တွေကို ထောက်ပံ့အားပေးခဲ့သူဖြစ်ပါတယ်။ စစ်ကိုင်းတိုင်း ကလေးမြို့၊ ကလေးထောင်မှ ကိုအေးအောင်နှင့် ကိုရန်ရွှေ ပဲခူးတိုင်း၊ တောင်ငူမြို့၊တောင်ငူထောင်မှ ကိုရင်ကြီးမျိုးမြင့် ကိုမျိုးသန့်တို့ထံလည်း ပါဆယ် များပို့လှူခဲ့၊ အလှူငွေများပေးအပ်ခဲ့ဖူးပါတယ်၊တောင်ငူထောင်ရှိ ၁၇/၁ (၄၂) ယောက်အတွက် အလှူငွေကျပ်နှစ်သိန်း တစ်သောင်းကိုလည်း အပ်နှံလှူဒါန်းခဲ့ဖူးပါတယ်။ “ဦးဇင်းရဲ့ဓာတ်ပုံထဲက စာတန်းအတိုင်းပါပဲ။ အပြစ်မဲ့အကျဉ်းသားအားလုံး ဝဋ်ကြွေးအမြန်ကြေပါစေ’’ ဟုဆန္ဒပြု သွားခဲ့ပါတယ်။

---

သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ