>
မိုးမခ အထောက်တော်၊ ရန်ကုန်
ဇူလိုင် ၄၊ ၂ဝ၁ဝ
တရားရုံးဆင့်ခေါ်မှုကို အာခံနေသော ထက်ထက်မိုးဦး
“ပရိသတ်က ရဲတိုက်အား မိမိကိုယ် ယုံကြည်မှု လွန်ကဲ့သည့် သဘောမျိုးဝေဖန် ပြောဆိုကြသည့် အပေါ် မည်သို့ တုံ့ပြန် ချင်ပါသလဲ”
ဆိုသည့် မေးခွန်းမေးခဲ့ဖူးရာ ရဲတိုက်က သရုပ်ဆောင်အလုပ်ရဲ့ သဘောသဘာဝမှာ ယုံကြည်မှု ပိုလျှင် အရေးမကြီးဘဲ လိုအပ်နေလျှင်သာ အခက်အခဲရှိသည့် အလုပ်ဖြစ်သည် ဆိုသည့် သဘော ဖြေကြားခဲ့ဖူးသည်။
ထို့ပြင် ဒါရိုက်တာ မင်းထင်ကိုကိုကြီးကိုမူ
“ သူရိုက်သည့် ဇတ်ကားများမှာ စီးပွားရေးအရ မအောင်မြင်သည့် အတွက် မည်ကဲ့သို့ ရပ်တည်ပါသလဲ…”
ဟု မေးမြန်းဖူးရာ မင်းထင်ကိုကြိုံကီးက ဒီလိုပဲ ခြိုးခြိုးခြံခြံ ချွေချွေတာတာ ရပ်တည်ရတာပေါ့ဗျာ ဟု ဖြေကြားခဲ့သည့် သာဓကရှိခဲ့သည်ဟု ယခင် 7Day ဂျာနယ်တွင် ဖော်ပြထားသည်။
အထက်က သာဓကများတွင် ဖော်ပြထားသကဲ့သို့ အနုပညာရှင်များအား မေးခဲ့ဖူးသည့် အလားတူ မေးခွန်းကို နာမည်ကျော် မိုဒယ် သရုပ်ဆောင် ထက်ထက်မိုးဦးအား မေးသည့်အခါ ကိုယ်ထိ လက်ရောက် တုံ့ပြန်မှု ပေါ်ပေါက်ခဲ့ခြင်း ဖြစ်သည်ဟု အဆိုပါ ဂျာနယ်ဖတ် ပရိသတ်က ပြောဆိုသည်။
“သတင်းထောက်တွေ အနေနဲ့ မေးတဲ့မေးခွန်းမှာ ဘောင်ကန့်သတ်မှု ထားစရာ သိပ်မရှိဘူးလို့ ထင်ပါတယ်။ သူများနိုင်ငံတွေမှာ ဒိထက် ဖြေရကျပ်တဲ့ မေးခွန်းမျိုး နောက်က လိုက်ပြီး အတင်းမေး၊ သတင်း ဓာတ်ပုံရိုက် အနုပညာရှင်တွေက မနည်းရှောင်ကြတာ ဖတ်ဖူး ကြားဖူးတယ်။ ဒီမှာတော့ သတင်းထောက်တွေက သူတို့လောက်တောင် ဖိပြီး မမေးကြ မလုပ်ကြဘူးလို့ ထင်ပါတယ်”
ဟု လည်း သတင်းဂျာနယ်မှ အယ်ဒီတာ တဦးက ဝေဖန်ပြောဆိုသည်။
ထက်ထက်မိုးဦးက ဖြေရကြပ်သည့် မေးခွန်းမေးသည့် သတင်းထောက် မိန်းကလေးအား ဆံပင်ဆွဲ၊ ပါးရိုက်ခဲ့သည့် အဖြစ်ကြောင့် ယခုအခါ ရန်ကင်းမြို့နယ် တရားရုံးတွင် အမှု ရင်ဆိုင်နေရပြီး ထက်ထက်မိုးဦးအား စစ်ဆေးရန် ဆင့်ခေါ်ထားသည့် ရုံးချိန်း ၂ချိန်းစလုံး မလာရောက်ခဲ့ကြောင်း သိရှိရသည်။
ပြန်ကြားရေး ဝန်ကြီးဌာန ဝန်ြံကီး ဖြစ်သူ ဗိုလ်ချုပ်ကျော်ဆန်းကမူ ယခု အမှုကိစ္စ တရားရုံး စီရင်ချက် ချသည့် အဆင့်မတိုင်ခင် ကျေအေးမှု ရစေရန် မြန်မာနိုင်ငံ ရုပ်ရှင်အစည်းအရုံးနှင့် မြန်မာနိုင်ငံစာနယ်ဇင်း အဖွဲ့တို့ကို ပြောဆိုလျက်ရှိသည်ဟု စာနယ်ဇင်းနှင့် ရုပ်ရှင်အစည်းအရုံး အသိုင်းအဝိုင်းမှ ထွက်ပေါ်လာသည့် သတင်းများအရ သိရှိရသည်။
သို့သော်လည်း ကိုယ်ထိလက်ရောက် ကျူးလွန်သူ ထက်ထက်မိုးဦးက သတင်းထောက် မအေးသူစံအား မတောင်းပန်လိုသည့် အတွက် ဤအမှုကို ဖြေရှင်းရခက်နေသည် ဟုလည်း မီဒီယာအသိုင်းအဝိုင်းတွင် ပြောဆိုနေကြသည်။