>
ရန်ကုန်သင်္ကြန်ဗုံးအကြောင်း NLD ကြေညာချက်မထုတ်သဖြင့် ကြေးမုံသတင်းစာက ရှုတ်ချရေးသား
မိုးမခအထောက်တော်၊ ရန်ကုန်
ဧပြီ ၂၁၊ ၂၀၁၀
သင်္ကြန်ပေါက်ကွဲမှုအပြီး တွေ့ရသော မြင်ကွင်း (ဓာတ်ပုံ-မိုးမခ)
မိုးမခအထောက်တော်၊ ရန်ကုန်
ဧပြီ ၂၁၊ ၂၀၁၀
သင်္ကြန်ပေါက်ကွဲမှုအပြီး တွေ့ရသော မြင်ကွင်း (ဓာတ်ပုံ-မိုးမခ)
ရန်ကုန် သင်္ကြန် ဗုံးကွဲမှု နှင့် ပတ်သက်ပြီး အမျိုးသားဒီမိုကရေစီ အဖွဲ့ချုပ် (NLD) က သဘောထား ကြေညာချက် ထုတ်ပြန်ခြင်း မရှိသည့်အတွက် ဗိုလ်ချုပ်ကြီးတို့၏အာဘော် ကြေးမုံသတင်းစာက ယနေ့ ဗုဒ္ဓဟူးနေ့တွင် ရှုတ်ချ ရေးသားလိုက်သည်။
သတင်းစာတွင် လေ့လာသူတစ်ဦး ဟူသည့် ကလောင်အမည်ဖြင့် ရေးသားသော မူဝါဒရေးရာ ဆောင်းပါးတွင် ယင်းသို့ ဖော်ပြထားခြင်း ဖြစ်သည်။
“အရင်တုန်းက ထစ်ခနဲရှိတာနဲ့ ကြေညာချက် အမျိုးမျိုး ထုတ်လေ့ရှိတဲ့ ပါတီကြီးတစ်ခုကတော့ အခုချိန်အထိ တုံဏှိဘာဝေ လုပ်ပြီး လက်ရှောင်နေတာကို တွေ့ရပါတယ်” ဟု ဆောင်းပါးရှင်က ဆိုသည်။
သင်္ကြန်ဗုံးကွဲမှု ဖြစ်ပွားပြီး နောက်တနေ့တွင် တိုင်းရင်းသား စည်းလုံးညီညွတ်ရေး ပါတီက ပြင်းထန်စွာရှုတ်ချကြောင်း ကြေညာချက် ထုတ်ခဲ့သည်၊ ရန်ကုန်မှ အပတ်စဉ်ထုတ် ဂျာနယ်များကလည်း ပြင်းထန်စွာ ရှုတ်ချကြောင်း ပြည်သူတို့၏ သဘောထား အမြင်များကို ရေးသား ဖော်ပြကြသည်ဟုလည်း ထောက်ပြထားသည်။
သင်္ကြန်ကာလ ရုံးပိတ်ရက်များအတွင်း NLD ခေါင်းဆောင်များက ရုံးတွင် စုဝေး တွေ့ဆုံလေ့ မရှိခြင်းကြောင့် ကြေညာချက် ရေးသားထုတ်ပြန်မှု မပြုခဲ့ခြင်းဖြစ်မည်ဟု ယူဆကြောင်း ရန်ကုန်မှ NLD အဖွဲ့ဝင်တဦးက သုံးသပ်သည်။
သင်္ကြန်အတွင်း ရန်ကုန်မြို့ မဏ္ဍပ်တခုတွင် ပေါက်ကွဲမှုများ ဖြစ်ပွားခဲ့ရာ အနည်းဆုံး ၉ ဦး သေဆုံးပြီး ဒဏ်ရာရသူ တရာကျော်ရှိကြောင်း သိရသည်။
အာဏာပိုင်တို့က ရန်ကုန်တွင် ဗုံးကွဲမှုများဖြစ်တိုင်း ပြည်တွင်းပြည်ပအဖျက်သမားတို့၏လက်ချက်ဖြစ်သည်ဟု ကြေညာလေ့ ရှိသည်။ ဗုံးခွဲသူတို့ကို ဖမ်းဆီးနိုင်ခြင်း မရှိခဲ့ပေ။
သို့သော်လည်း ယခုနှစ် သင်္ကြန်အတွင်း ပေါက်ကွဲမှုဖြစ်ပွားအပြီး ထိုနေရာတွင် ဓာတ်ပုံရိုက်သူတချို့ကို ခေါ်ယူ ထိန်းသိမ်းထားသည်ဟု သိရသည်။
ထိုဖမ်းဆီးမှုများနှင့် ပတ်သက်ပြီး NLD ခေါင်းဆောင် တဦးဖြစ်သူ ဦးဝင်းတင်က – “ကျနော်ကြားတယ်။ စာရေးဆရာ လင်းယုန်မောင်မောင်ရဲ့ သားနဲ့ မြေးကို ဖမ်းသွားကြတယ်တဲ့။ ကျနော့်အမြင်ကတော့ သူတို့တွေက စာပေသမားတွေ၊ မီဒီယာတို့ ဓာတ်ပုံတို့ လုပ်ကြတယ်။ သင်္ကြန်တွင်းမှာလည်း အများနဲ့အတူ သူတို့လုပ်စရာ သူတို့ ပုံမှန်လုပ်နေကြတာ ဖြစ်တယ်။ အဲသည်မှာ ဗုံးပေါက်တဲ့ဆီမှာ သားကို ဓာတ်ပုံရိုက်လို့ဆိုပြီး ဖမ်းတယ်။ ပြီးတော့ အဖေကို နောက်တရက် အိမ်မှာသွားပြီး ဖမ်းတယ် ဆိုတာကတော့ အလွန် စိတ်မကောင်း စရာ ကောင်းတဲ့ အဖြစ်ပါပဲ။ စာပေနဲ့ စာနယ်ဇင်းလုပ်ငန်း လုပ်ကိုင်နေကြတဲ့ စာပေအသိုင်း အ၀ိုင်း တခုလုံး အတွက် စိုးရိမ်စရာ ဖြစ်ပါတယ်” ဟု မိုးမခကို ပြောသည်။