ရသဆောင်းပါးစုံ

ကျော်ကျော်နိုင် ● ရန်ကုန်မြို့တော်စည်ပင်ရွေးကောက်ပွဲနှင့် ရန်ကုန်တိုင်းအစိုးရ

My Friend Tin Moe By Maung Swan Yi - Selection of MoeMaKa Articles

ကျော်ကျော်နိုင် ● ရန်ကုန်မြို့တော်စည်ပင်ရွေးကောက်ပွဲနှင့် ရန်ကုန်တိုင်းအစိုးရ
(မိုးမခ) ဧပြီ ၁၊ ၂၀၁၉

ရန်ကုန်မြို့တော်စည်ပင်သာယာရေးကော်မတီနှင့် မြို့နယ်စည်ပင်ရွေးကောက်ပွဲကို ကျင်းပခဲ့ပြီးဖြစ်သည်။ ငွေကျပ် ၂ ဘီလီယံခွဲခန့် အကုန်ခံ၍ ကျင်းပခဲ့သည့် အဆိုပါစည်ပင်ရွေးကောက်ပွဲကို ရန်ကုန်မြို့မှ မဲဆန္ဒရှင်များက စိတ်ဝင်စားမှု အလွန်နဲပါးသည်ဟု လေ့လာသူများက ဝေဖန်နေကြပါသည်။ သို့သော် ရန်ကုန်စည်ပင်ရွေးကောက်ပွဲကို အထူးတလည် စိတ်ဝင်စားနေသူအချို့ရှိသည်ဆိုပါမူ ထိုသူတို့မှာ ရန်ကုန်တိုင်းဒေသကြီး အစိုးရအဖွဲ့ ဖြစ်ပါလိမ့်မည်။

၂၀၁၈ ဇွန်လတွင်ပြဋ္ဌာန်းခဲ့သည့် ရန်ကုန်မြို့တော် စည်ပင်သာယာရေးဥပဒေသည် မူကြမ်း (၃) ဆင့် ပြင်ဆင်ရေးဆွဲခဲ့ရပါသည်။ မူကြမ်း (၃) ဆင့်လုံးတွင် စိတ်ပါဝင်စားသူ ပြည်သူများနှင့် တိုင်းဒေသကြီး လွှတ်တော်ကိုယ်စားလှယ်များ၏ အပြင်းအထန် ဝေဖန် မှုကို ခံခဲ့ရပါသည်။ အထူးသဖြင့် ရန်ကုန်မြို့တော်စည်ပင်သာယာရေးကော်မတီကို စီးပွားရေးလုပ်ပိုင်ခွင့်များ၊ အာဏာများ အပ်နှင်းသည့်ပုဒ်မများ ပါရှိခဲ့သောကြောင့်ဖြစ်ပါသည်။ တနည်းအားဖြင့် ရန်ကုန်တိုင်းအစိုးရသည် မိမိတို့ ဆောင်ရွက်လိုသည့် စီးပွားရေးလုပ်ငန်းများကို လွှတ်တော်၏ခွင့်ပြုချက်ယူရန်မလိုဘဲ တဖက်လှည့်ဖြင့် ရန်ကုန်မြို့တော်စည်ပင်သာယာရေးကော်မတီမှတဆင့် စည်ပင်ဥပဒေအရ ဆောင်ရွက်နိုင်စေရန် ထည့်သွင်းရေးဆွဲထားသော ပုဒ်မများလားဟု သံသယဖြစ်စရာ ဖြစ်ပါသည်။

သို့သော် ဥပဒေမူကြမ်းကို တိုင်းဒေသကြီးလွှတ်တော်တွင် ဆွေးနွေးကြသည့်အခါ အဆိုပါပုဒ်မများကို ပြည်သူများနှင့် တိုင်းဒေသကြီးလွှတ်တော်ကိုယ်စားလှယ်များက ပြင်းပြင်းထန်ထန် ဝေဖန်ကန့်ကွက်ခဲ့ကြသဖြင့် ဖြုတ်သည့်ပုဒ်မများကိုဖြုတ်၊ ပြင်သည့်ပုဒ်မများကိုပြင်ခဲ့ကြရပါသည်။ ရန်ကုန်တိုင်းဒေသကြီးအစိုးရ အားကိုးအားထားပြုရန် ကြံရွယ်ခဲ့ပုံပေါ်သော စည်ပင်ဥပဒေက မှန်းထားသလောက် လုပ်ခွင့်ကိုင်ခွင့်မသာတော့ဟု ဆိုရမည်ထင်ပါသည်။ မနက်ဖြန်ကျင်းပမည့် စည်ပင် ကော်မတီ ရွေးကောက်ပွဲတွင် တိုင်းဒေသကြီးအစိုးရအလိုကို အလွယ်တကူလိုက်လျောကြမည့် ကိုယ်စားလှယ်များ မပါလာ ခဲ့ပါမူ တိုင်းဒေသကြီးအစိုးရနှင့် မြို့တော်ဝန်တို့အတွက် စိတ်ကြိုက်ဆောင်ရွက်ခွင့် နည်းသွားပါလိမ့်မည်။

လက်ရှိအချိန်တွင်မူ မြို့တော်ဝန်အပါအဝင် အစိုးရခန့် ကော်မတီဝင် (၅) ဦးဖြင့်သာ ဆောင်ရွက်နေကြသည်ဖြစ်ရာ ရန်ကုန် မြို့တော်စည်ပင်သည် တိုင်းဒေသကြီးအစိုးရ၏ စီမံခန့်ခွဲမှုအောက်တွင် အပြည့်အဝ ဆောင်ရွက်နေသည်ဟု ပြောနိုင်ပါသည်။ မြို့တော်ဝန်ကြီးသည်ပင်လျင် သူ၏ရုံးခန်းရှိရာ မြို့တော်ခန်းမတွင် ရုံးမထိုင်နိုင်ဘဲ တိုင်းဒေသကြီးအစိုးရအဖွဲ့ ရုံးခန်းတွင်သာ ရုံးထိုင်သလိုဖြစ်နေသည်က ထင်ရှားသည့် သာဓက ဖြစ်ပါသည်။

တိုင်းဒေသကြီးအစိုးရအနေဖြင့် မနက်ဖြန်ရွေးကောက်ပွဲတွင် ရွေးကောက်ခံရမည့် ကော်မတီဝင်များတွင် သူ၏သြဇာ လွှမ်းမိုးမည့်သူများ ရွေးကောက်ခံရရေးကို မည်မျှအထိ စိုးရိမ်ပူပန်စိတ်ဖြင့် ဝါယမစိုက်ထုတ်သလည်းဆိုသော် တိုင်းဒေသကြီး အစိုးရ၏ facebook page တွင် NLD ပါတီကိုယ်စားပြု ကိုယ်စားလှယ်လောင်းများကို မဲပေးကြရန် တိုက်တွန်းမဲဆွယ်ခြင်း၊ တိုင်းဒေသကြီးအစိုးရအဖွဲ့အကြီးအကဲဖြစ်သူ ဝန်ကြီးချုပ်ကိုယ်တိုင် မဲဆန္ဒနယ်အချို့တွင် မဲဆွယ်စည်းရုံးခြင်းများ ပြုလုပ်ခဲ့ပါ သည်။ အဆိုပါဆောင်ရွက်မှုများသည် မလျှော်သြဇာသုံး၍ မဲဆွယ်စည်းရုံးခြင်းဖြစ်ရာ အခြားသောကိုယ်စားလှယ် လောင်း များအပေါ် တရားမျှတမှုမရှိသော အခွင့်အရေးယူမှုဖြစ်ပါသည်။

ထိုသို့ဆောင်ရွက်မှုများအပေါ် facebook စာမျက်နှာများပေါ်တွင် ဝေဖန်ရှုံ့ချမှုများ ရှိခဲ့ပါသည်။ သို့သော် စည်ပင်ရွေးကောက်ပွဲ ကော်မရှင်ကမူ ထိုအပြုအမူသည် မဲဆွယ်ရာမရောက်ဟု ပြောထားပါသည်။ တိုင်းဒေသကြီးအစိုးရ၏ ဆောင်ရွက်မှုသည် မလျှော်သြဇာသုံး၍ မဲဆွယ်ရာရောက်/မရောက်ဆိုသည်ကို အချိန်တန်၍ လိုအပ်လျှင် အဆုံးအဖြတ်ခံကြပါမည်။

လောလောဆယ်တွင်တော့ ရန်ကုန်မြို့သူမြို့သားတို့အား အသိပေးစရာ၊ မေးစရာအနည်းငယ်ရှိပါသည်။

လက်ရှိ ရန်ကုန်မြို့တော်စည်ပင်သာယာရေးကော်မတီမှ မြို့တော်ဝန်အပါအဝင် ကော်မတီဝင် (၅) ဦးလုံးသည် တိုင်းဒေသ ကြီး ဝန်ကြီးချုပ်ကခန့်အပ်ထားသူများသာ ဖြစ်ပါသည်။ လက်ရှိကော်မတီ၏ စွမ်းဆောင်ရည်ကို ရန်ကုန်မြို့သူမြို့သားတို့ လက်ခံကြပါသလား။ ကြိုက်နှစ်သက်ကြပါသလား။ ထောက်ခံကြပါသလား။ ကျွန်တော်တို့အားလုံးတွင် အဖြေအသီးသီး ရှိကြမည်ဟု ထင်ပါသည်။

တိုင်းဒေသကြီးအစိုးရသည် ရန်ကုန်မြို့တော် စည်ပင်သာယာရေးကော်မတီကို အလုံးစုံ သြဇာသက်ရောက်ပြီး အပြည့်အဝ ချုပ်ကိုင်နိုင်ရန်အတွက် ပြည်သူက ရွေးကောက်တင်မြှောက်ရမည့် ကော်မတီဝင်များကိုလည်း NLD ကိုယ်စားပြုကော်မတီဝင်များဖြစ်စေရန် အစွမ်းကုန် ဝါယမပြု အားထုတ်လျှက်ရှိပါသည်။ မဲဆန္ဒနယ် (၄) မှတစ်ပါး ကျန်မဲဆန္ဒနယ် (၅) နယ်တွင် NLD ကိုယ်စားလှယ်များ ဝင်ရောက်ယှဉ်ပြိုင်မည် ဖြစ်ပါသည်။

မြို့တော် စည်ပင်ကော်မတီတွင် ကော်မတီဝင် (၁၁) ဦးရှိမည်ဖြစ်ရာ အစိုးရခန့် (၅) ဦးနှင့် ပြည်သူမှရွေးချယ်သူ (၆) ဦးဖြစ်ပါသည်။ ပြည်သူမှရွေးချယ်သူ (၆) ဦးအနက် တစ်ဦးဦးကသာ NLD ကိုယ်စားပြုသူဖြစ်သွားမည်ဆိုပါလျှင် မြို့တော်စည် ပင်ကော်မတီတွင် ဝန်ကြီးချုပ်သြဇာညောင်းသူ (၆) ဦး ရှိသွားမည်ဖြစ်ရာ မဲခွဲဆုံးဖြတ်မှုများတွင် အမြဲတမ်း အသာရသွားတော့ မည် ဖြစ်ပါသည်။ ထို့အပြင် ဒု-မြို့တော်ဝန်ကိုလည်း ကော်မတီဝင် (၁၁) မှပင် မဲပေးရွေးချယ်မည်ဖြစ်ရာ NLD ကိုယ်စားပြု ကော်မတီဝင်သာလျင် သေချာပေါက် ဒု-မြို့တော်ဝန် ဖြစ်သွားပါလိမ့်မည်။

ဒီတော့ လက်ရှိ ရန်ကုန်စည်ပင်၏ စွမ်းဆောင်ရည်များကို လက်ခံသည်၊ အသိအမှတ်ပြုသည်၊ သဘောကျ နှစ်ခြိုက်သည်ဆိုပါ မူ မနက်ဖြန်ရွေးကောက်ပွဲတွင် NLD ကိုယ်စားပြု ကိုယ်စားလှယ်လောင်းများကို မဲပေးနိုင်ကြပါသည်။ လက်ရှိ ရန်ကုန်စည်ပင် ၏ စွမ်းဆောင်ရည်ကို လက်မခံ၊ အသိအမှတ်မပြု၊ သဘောကျ နှစ်ခြိုက်ခြင်း မရှိဘူးဆိုပါလျှင်မူ ရွေးကောက်ခံ ကော်မတီ ဝင်များတွင် NLD ကိုယ်စားပြုသူများ တစ်ဦးတစ်ယောက်မျှ ပါမလာစေရန် အရေးကြီးပါသည်။

ကျွန်တော်ကတော့ လက်ရှိ ရန်ကုန်စည်ပင်၏ စွမ်းဆောင်ရည်ကို လုံးဝ (လုံးဝ) နှစ်သက်သဘောကျခြင်း မရှိပါသောကြောင့် ကျွန်တော့်မဲဆန္ဒနယ်မှ NLD ကိုယ်စားပြု ကိုယ်စားလှယ်လောင်းကို လုံးဝ (လုံးဝ) မဲမပေးရန် ဆုံးဖြတ်ထားပြီး ဖြစ်ပါသည်။

NLD ပါတီဝင်များနှင့် NLD ကို ထောက်ခံသူများအနေဖြင့်လည်း စည်ပင်ရွေးကောက်ပွဲကို ကြားဖြတ်ရွေးကောက်ပွဲများကဲ့သို့ သဘောမထားကြမိစေလိုပါ။ အမှန်တကယ်ဆိုပါက လက်ရှိရန်ကုန်စည်ပင်၏ ဆောင်ရွက်မှုများကြောင့် NLD ၏ ပုံရိပ်ပင် ထိခိုက်နေရပြီဖြစ်ပါသည်။ ရွေးကောက်ခံစည်ပင်ကော်မတီဝင်များတွင် NLD ပါတီဝင်မဟုတ်သည့် ပြောရဲဆိုရဲ၊ လုပ်ရဲ ကိုင်ရဲရှိသူများ ပါလာမှသာလျှင် စည်ပင်ကို ထိုက်သင့်သော ပြောင်းလဲမှုများ ပြုလုပ်နိုင်မည်ဖြစ်ပြီး သို့မှသာလျှင် NLD ၏ ၂၀၂၀ လားရာမှာလည်း အကောင်းဘက်သို့ ဦးတည်နိုင်လိမ့်မည်ဟု ထင်မြင်ယူဆမိပါသည်။


သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ

Similar Posts